දකුණු ආසියානු වයස අවුරුදු 15 න් පහළ සහ 17 න් පහළ කනිෂ්ඨ බැඩ්මින්ටන් ශූරතාවලියේදී රන් පදක්කම් 7 ක්, රිදී පදක්කම් 5 ක් සහ ලෝකඩ පදක්කම් 3 ක් සමගින් පදක්කම් 15 ක් දිනාගැනීමට ශ්‍රී ලංකා ක්‍රීඩක ක්‍රීඩිකාවෝ සමත් වූහ.
නේපාලයේ කත්මණ්ඩු නුවරදී ඉකුත්දා නිමාවට පත් වූ මෙම ශූරතාවලියේ අවුරුදු 15 න් පහළ බාලිකා කේවල රන් පදක්කම සහ රිදී පදක්කම, අවුරුදු 17 න් පහළ බාලිකා කේවල රන් පදක්කම සහ රිදී පදක්කම, අවුරුදු 15 න් පහළ මිශ්‍ර යුගල රන් පදක්කම සහ රිදී පදක්කම, අවුරුදු 17 න් පහළ මිශ්‍ර යුගල රන් පදක්කම සහ රිදී පදක්කම, අවුරුදු 15 න් පහළ බාලක යුගල රන් පදක්කම, අවුරුදු 15 න් පහළ බාලිකා යුගල රන් පදක්කම, අවුරුදු 17 න් පහළ බාලිකා යුගල රන් පදක්කම, අවුරුදු 17 න් පහළ පිරිමි කේවල රිදී පදක්කම ගැනීමට ශ්‍රී ලංකා ක්‍රීඩක ක්‍රීඩිකාවෝ සමත් වූහ.
අවුරුදු 15 න් පහළ බාලිකා කේවල අවසන් මහ තරගයේදී සිතුලි රණසිංහ ලකුණු 21-13 ක් සහ 21-10 ක් ලෙස පරාජය කරමින් ශූරතාව දිනා ගැනීමට නෙත්මි රත්නායක සමත් වූ අතර අවුරුදු 17 න් පහළ බාලිකා කේවල අවසන් මහ තරගයේදී රනිත්මා ලියනගේ ශූරතාව දිනා ගනු ලැබුවේ ලකුණු 21-6 ක් සහ 21-8 ක් ලෙස රනුමි මානගේ පරාජයට පත් කරමිනි.
අවුරුදු 15 න් පහළ මිශ්‍ර යුගල අවසන් මහ තරගයේදී ලකුණු 21-20 ක් සහ 21-12 ක් ලෙස කෙනෙත් අරුක්ගොඩ සහ සිතුලි රණසිංහ පරාජය කිරීමට සෙනුත් සෙත්මිණ පෙරේරා සහ නෙත්මි රත්නායක සමත් වූ අතර අවුරුදු 17 න් පහළ මිශ්‍ර යුගල අවසන් මහ තරගයේදී හිරුක අලුත් පටබැඳිගේ සහ රනුමි මානගේ ලකුණු 21-14 ක් සහ 21-16 ක් ලෙස පරාජය කිරීමට තිඩස වේරගොඩ සහ රනිත්මා ලියනගේ සමත් වූහ.
මේ අතර අවුරුදු 15 න් පහළ පිරිමි මිශ්‍ර යුගල අවසන් මහ තරගයේදී බංග්ලාදේශයේ මොස්ටාකින් හොසේන් සහ වාලි උල්ලා ලකුණු 21-15 ක්, 19-21 ක් සහ 23-21 ක් ලෙස පරාජය කිරීමට කෙනෙත් අරුක්ගොඩ සහ සෙනුත් සෙත්මිණ පෙරේරා සමත් වූහ. අවුරුදු 15 න් පහළ කාන්තා යුගල අවසන් මහ තරගයේදී ලකුණු 21-12 ක් සහ 21-04 ක් ලෙස නේපාලයේ ඩිලේෂා රානා සහ රිහානා ෂෙර්චන් පරාජය කිරීමට සිතුලි රණසිංහ සහ නෙත්මි රත්නායක සමත් වූහ.
අවුරුදු 17 න් පහළ කාන්තා යුගල අවසන් මහා තරගයේදී රනුමි මානගේ සහ රනිත්මා ලියනගේ ජයග්‍රහණය අත්කර ගනු ලැබුවේ ලකුණු 21-06 ක් සහ 21-01 ක් ලෙස අසාත් සෝයා හොසේන් සහ මොහොමඩ් ෂරීෆ් ෂයිබා පරාජයට පත් කරමිනි.
අවුරුදු 17 න් පහළ බාලක කේවල රිදී පදක්කම හිමිකර ගැනීමට තිඩස වේරගොඩ සමත් විය. අවුරුදු 15 න් පහළ බාලක කේවල තරග ඉසව්වේ තෙවැනි ස්ථානය කෙනෙත් අරුක්ගොඩට හිමි වූ අතර හිරුක අලුත් පටබැඳිගේ අවුරුදු 17 න් පහළ බාලක කේවල තරග ඉසව්වේ තෙවැනි ස්ථානයට පත් විය. අවුරුදු 17 න් පහළ බාලක යුගල ශුරතා තරග ඉසව්වේ තෙවැනි ස්ථානය හිරුක අලුත් පටබැඳිගේ සහ තිඩස වේරගොඩ දිනාගත්හ.
දකුණු ආසියානු අවුරුදු 15 න් පහළ සහ 17 න් පහළ කනිෂ්ඨ බැඩ්මින්ටන් ශූරතාවලියේ කේවල, යුගල හා මිශ්‍ර යුගල තරග ඉසව්වලදී ජයග්‍රහණ අත්කර ගැනීමට දින කිහිපයකට පෙර ශ්‍රී ලංකා ක්‍රීඩක ක්‍රීඩිකාවෝ, එම වයස් කාණ්ඩ ද්විත්වයේදීම මිශ්‍ර කණ්ඩායම් ශූරතාව දිනා ගැනීමට සමත් විය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
