දයා හේමන්ත සිල්වා මහතා 2023 – 2025 කාල වකවානුවේදී ශ්‍රී ලංකා සැහැල්ලු පන්දු ක්‍රිකට් සංගමයේ කිසිදු තනතුරක් හොබවා නැති බවත් 17 දෙනකුගේ අත්සනින් යුතුව ක්‍රීඩා අමාත්‍යංශයට යවන ලදැයි කියැවෙන ලිපිය මුළුමනින්ම නීතිවිරෝධී ලිපියක් බවත් සැහැල්ලු පන්දු ක්‍රිකට් සංගමයේ සභාපති තිසර ගුණසිංහ මහතා කියා සිටී. පසුගිය 12 වැනිදා ලංකාදීප පුවත්පතේ පළවූ ලිපියක් සම්බන්ධයෙන් කරුණු පැහැදිළි කරමින් ශ්‍රී ලංකා සැහැල්ලු පන්දු ක්‍රිකට් සංගමයේ සභාපතිවරයා එසේ කියයි.
ක්‍රීඩා අමාත්‍යංශයට යවන ලදැයි කියැවෙන ලිපිය නීති විරෝධී වන බැවින්, ශ්‍රී ලංකා සැහැල්ලු පන්දු ක්‍රිකට් සංගමයේ ලිපි ශීර්ෂ නිසි අවසරයකින් තොරව අවභාවිත කිරමින් එකී ලිපියට තමන්ගේ නම සහ තනතුර ඇතුළත් කිරීමත් යන චෝදනා සම්බන්ධයෙන්
එම ලිපියේ ලේකම් යැයි සඳහන් කරමින් අත්සන් තබා ඇති අයට විරුද්ධව කූඨ ලේඛන සැකසීම සම්බන්ධයෙන් නීත්‍යානුකූල ක්‍රියාමාර්ග ගැනීමේ කටයුතු මේ වන විටත් ආරම්භ කර ඇති බවත් තිසර ගුණසිංහ මහතා වැඩිදුරටත් කියා සිටී.
ක්‍රීඩා අමාත්‍යංශයට යවන ලදැයි කියැවෙන ලිපියට අත්සන් තබා ඇතැයි කියන 17 දෙනාගෙන් 13 දෙනකු 2023 – 2025 කාල වකවානුව සඳහා තේරී පත්වූ නිලධාරී මණ්ඩලයේ කිසිදු තනතුරක් දැරූ අය නොවන බවත්, ඔවුන් පසුගිය අවුරුදු දෙකක් පුරා සෑම මසකම පැවැත්වූ කිසිදු විධායක සභා රැස්වීමකට සහභාගි වී නැති බවත් සංගමයේ සභාපතිවරයා විසින් එවන ලද ලිපියේ සඳහන් වේ.
නියමිත කාලවකවානුවක් තුළ නිලවරණ කමිටුවක් පත්කර, ක්‍රියාකාරී සියලුම ක්‍රීඩා සංගම් ලිඛිතව දැනුවත් කරමින්, ක්‍රීඩා අමාත්‍යාංශයේ නිලධාරිනියකගේ සහභාගීත්වයෙන් සහ අධීක්ෂණයෙන් යුතුව නීත්‍යානුකූලව නිලවරණය පැවැත්වූ බවත් සභාපතිවරයා කියයි. ක්‍රීඩාවේ උන්නතිය උදෙසා කැපවෙන ඕනෑම අයකුට ශ්‍රී ලංකා සැහැල්ලු පන්දු ක්‍රිකට් සංගමයට සම්බන්ධ වී කටයුතු කිරීමට කිසිදු බාධාවක් නැති බවත් සියලු කටයුතු සංගමයේ ව්‍යවස්ථාවට අනුකූලවත්, පවතින ක්‍රීඩා පනතට අනුවත් විනිවිදභාවයකින් කටයුතු කිරීම සංගමයේ ක්‍රමවේදය බවත් සභාපතිවරයා සිය ලිපියෙන් අවධාරණය කර සිටී.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
