මහානාම විදුහල අර්ධ අවසන් පූර්ව වටයට

අන්තර් පාසල් වයස 15 න් පහළ ‘සිංගර් කුසලාන’ සීමිත ඕවර ක්‍රිකට් තරගාවලියේ I වැනි කාණ්ඩයේ අර්ධ අවසන් පූර්ව වටයට සුදුසුකම් ලබා ගැනීමට කොළඹ මහානාම විදුහල සමත් විය.
 
පානදුර ශාන්ත ජෝන් විදුහල් ක්‍රීඩාංගණයේදී පැවැති පෙර අර්ධ අවසන් පූර්ව වටයේ තරගයකදී කළුතර තිස්ස විදුහලට එරෙහිව ලකුණු 31 ක ජයක් අත්කර ගනිමින් මහානාම විදුහල අර්ධ අවසන් පූර්ව වටයට සුදුසුකම් ලබා ගත්තේය.

එහිදී මහානාම විදුහලේ මිහිඳු පෙරේරා (58) අර්ධ ශතකයක් ලබාගත් අතර ඉනුක කරන්නාගොඩ ලකුණු 18 කට කඩුලු 3 ක් දවාගනිමින් මහානාම විදුහලේ ජයග්‍රහණය ඉක්මන් කළේය.  

මහානාම විදුහල - ඕවර 49 කදී සියලු දෙනා දැවී 155
(මිහිඳු පෙරේරා 58, නිකිල් සහස්මික 23/3, උරේෂ් සල්ගාදු 34/2, කවින් ප්‍රනාන්දු 10/3)

තිස්ස විදුහල - ඕවර 46.5 කදී සියලු දෙනා දැවී 124
(ඉරන්ද සිල්වා 25, සෙතුම් කෙනුල 19/2, මහේන් කුලතිලක 28/2, ඉනුක කරන්නාගොඩ 18/3)

- 036