(කරන්දෙණිය එම්.සුසිල් ප්‍රියන්ත)
අම්බලන්ගොඩ ධර්මාශෝක විද්‍යාලය සහ අම්බලන්ගොඩ දේවානන්ද විද්‍යාලය අතර පැවැත්වෙන 56 වැනි ‘සුනිල සංග්‍රාමය’ වාර්ෂික මහ ක්‍රිකට් තරගය අප්‍රේල් මස 5 සහ 6 දෙදින අම්බලන්ගොඩ නගර සභා ක්‍රීඩංගණයේදී පැවැත්වේ. මෙවර තරගයේ සත්කාරකත්වය දරනු ලබන්නේ ධර්මශෝක විද්‍යාලය විසිනි.
අම්බලන්ගොඩ මහා මංගල්‍ය සේ සැලකෙන මෙම ක්‍රිකට් තරග ඉතිහාසයේ ගෙවී ගිය තරග 55 න් තරග 12 කම ජය ධර්මාශෝක විද්‍යාලය සතුවූ අතර දේවානන්ද විද්‍යාලයට හිමිකර ගැනීමට හැකි වූයේ ජයග්‍රහණ දෙකක් පමණි. එහෙත් මේ වනවිට මෙම තරගයේ කුසලාන හිමිකර ගෙන සිටිනුයේ දේවානන්ද විද්‍යාලයයි.
ඒ අවසන් වරට 2022 වසරේදී පැවැති තරගය ජයගැනීමට දේවානන්ද විද්‍යාලය සමත් වීම හේතුවෙනි. ඉන් අනතුරුව 2023 සහ 2024 දෙවසරේදීම සුනිල සංග්‍රාම ක්‍රිකට් තරගය ජය පරාජයෙන් තොරව නිමාවට පත්වූ අතර එම තරග 2 ද ඇතුළුව තරග 41 ක්ම ජය පරාජයෙන් තොරව නිමාවට පත්වී තිබේ.
1963 වසරේදී ආර්ම්භ කෙරුණු මෙම තරගයට වසර 62 ක දිගු ඉතිහාසයක් තිබේ. වසර 7 ක්ම මේ තරගය පැවැත්වී නැත්තේ විවිධ හේතු කාරණා නිසාය. මාරාන්තික කොරෝනා ව්‍යසනය නිසා වසර දෙකක්ම තරගය නොපැවැත්වුණු අතර අනෙක් තරග පහ නොපැවැත්වී ඇත්තේ වෙනත් ප්‍රශ්න කිහිපයක්ම මුල්කර ගෙනය.
1963 වසරේ ආරම්භ කෙරුණු මංගල සුනිල සංග්‍රාම ක්‍රිකට් තරගයේ ජය භුක්තිවිද ඇත්තේ අම්බලන්ගොඩ ධර්මාශෝක විද්‍යාලයයි. එයින් වසර තුනක් ගිය තැනේදී එනම් 1966 දී දේවානන්ද විද්‍යාලය සිය මංගල සුනිල සංග්‍රාමයේ ජය පැන් බිව්වේය. එම ජයග්‍රාගහණයත් සමගම දේවානන්ද විද්‍යාලයට 2022 වනතෙක්ම එකම තරගයක් හෝ ජය ගැනීමට ධර්මාශෝක විද්‍යාලය ඉඩ ලබා නොදීමද විශේෂයෙන්ම කැපී පෙණුනි.
ඒ අතරවාරයේදී ධර්මාශෝක විද්‍යාලය තරග 12 ක්ම ජය අත්කර ගැනීමට සමත්වූ අතර දේවානන්ද විද්‍යාලය 2022 වසරේදී සුනිල සංග්‍රාම ක්‍රිකට් තරගය දෙවැනි වතාවට ජය ගත්තේ වසර 56 කට පසුව වීමද කැපී පෙණුන සිදුවීමක් විය.
මෙතෙක් කළක් පළමු කොටසෙන් අන්තර් පාසල් ක්‍රිකට් තරගාවලියට සහභාගීවූ ධර්මාශෝක විදුහල, මේ වසරේදී (2025) පළමු වරට දෙවැනි කොටසට ඇද වැටී ඇත්තේ දේවානන්ද විද්‍යාලය මෙන් දෙවැනි කොටසින් තරග වදින ලංකාවේ තවත් පාසලක් බවට පරිවර්ථනය වෙමිනි.
දෙවනි කොටසින් මෙවර අන්තර් පාසල් ක්‍රිකට් තරගාවලියට මුහුණදුන් ධර්මාශෝක විද්‍යාලය මෙතෙක් පැවැති තරග 11 දී, එක් පූර්ණ ජයක්, පළමු ඉනිමේ ජයග්‍රහණ 5 ක්, පලමු ඉනිමේ පරාජ 4 ක්, සහ එක් පූර්ණ පරාජයක් ලබා තිබේ. අජිත් ද සිල්වා, උපුල් තරංග, දිනේෂ් චන්දිමාල්, රමේෂ් මෙන්ඩිස් අම්බලන්ගොඩ ධර්මාශෝක විද්‍යාලයෙන් හෙළ ක්‍රිකට් කෙතට දායාද කළ ක්‍රිකට් ක්‍රීඩකයෝය.
මෙවර ධර්මාශෝක විදුහල් කණ්ඩායමට නායකත්වය සපයනුයේ තුන් ඉරියව් ක්‍රීඩක ඉෂාන් අනුරාධය. ඔවුන් මෙවර සුනිල සංග්‍රාම ක්‍රිකට් පිටියට පිවිසෙන්නේ 2022 වසරේදී වසර 56 කට පසුව දේවානන්ද විද්‍යාලය දිනාගෙන තවමත් සන්තකයේ තබා සිටින කුසලානය 13 වැනි වරටත් තමන් සතු කර ගැනීමේ අරමුණෙනි.
දේවානන්ද විදුහල් කණ්ඩායමේ නායකයා ලෙස මයුර මල්ෂාන් කටයුතු කරයි. මේ වසරේදී තරග 14 කට සහභාගීවී ඇති දේවානන්ද විද්‍යාලය ඉන් තරග 4 ක පූර්ණ ජයග්‍රාහණද, තරග 4 ක පළමු ඉනිමේ ජයග්‍රාහණද, තරග 4 ක පූර්ණ පරාජයන්ද ලබමිනි. ඔවුන්ගේ තවත් තරග දෙකක් අයහපත් කාලගුණික තත්වයන් නිසා අතහැර දමා තිබේ.
ධර්මාශෝක විදුහල් කණ්ඩායම
ඉෂාන් අනුරාධ (නායක)ල ජිතිර සන්සික (උප නායක), කවීෂ මතීෂ්, චන්දූප කවීෂ, දිනෙත් ගිම්හාන, පසිදු නදීෂ්, සුහස් ද සිල්වා,ඔමේග කරුණාරත්න, කවීෂ සදරුවන්, ඔෂාන් මිහිරාන්, හිවන් දිල්මික, රෙෂිත රුවිස්ක, නිමේෂ් සෙලන්ග, අකේන් සෙනෙත්, දිනුක ප්‍රභාසර, චනුක කරුණාරත්න, තමිනු කවීෂ්වර සහ සෙහන්ස සේමගේ
දේවානන්ද විදුහල් කණ්ඩායම
මයුර මල්ෂාන් (නායක), දනිදු ඉනෝෂ (උප නායක), රවිදු ජීවන්ක, මිනිදු ඕෂධ, සදලු රෂ්මික, සවීන් තියනුවන්, ලුදීෂ නිම්සර, මහිම් කුසිදු, ලසන් රශ්මික, රජිත ලක්ෂාන්, රාහුල් රුචිරංග, විහග මයුරන්ග, නිසිත් තේජව, සචින්ත සසික, සවිනු ගිහන්සිත්, තෙනුෂ් වීරසිංහ, අංසු චන්දු සහ ඩේන් ක්‍රිස්ටිනො
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
