(දමින්ද විජේසූරිය)
වෘත්තීය මට්ටමේ ක්‍රිකට් ක්‍රීඩාව මේ යයි කදිමට පෙන්වා දුන් කුසල් මෙන්ඩිස් (79) ඇතුළු ශ්‍රී ලංකා ක්‍රීඩකයෝ ජීලෝන්ග්හිදී අද (20 වැනිදා) පැවැති තරගයේදී නෙදර්ලන්තය ලකුණු 16 කින් පරාජය කරමින් ලෝක කුසලාන තරගාවලියේ සුපිරි 12 දෙනාගේ වටයට සුදුසුකම් ලබාගත්හ.
තරගාවලියේ ආරම්භක තරගයේදී, නැමීබියාව හමුවේ ලකුණු 108 කට දැවී යමින් ලකුණු 55 ක දරුණු පරාජයක් ලැබූ නමුත් ඉන් පසුව පැවැති තරග දෙකේදීම පූර්ණ වෘත්තිකයන් ලෙසින් පිටියට පිවිසි ශ්‍රී ලංකා කණ්ඩායම, ශල්‍යකර්මයකටවන් වෙදැදුරන් පිරිසක් සේ, කිසිම අත්වැරදීමක් වෙන්නට ඉඩ නොතබා තරග දෙකම ජයගනිමින් ප්‍රධාන තරගාවලියට සුදුසුකම් ලබාගත්තේය.
කාසියේ වාසිය දිනා පළමුවෙන් පන්දුවට පහර දීම තෝරාගත් ශ්‍රී ලංකාව ඕවර 20 ක් නිමාවේදී කඩුලු 6 ක් දැවී ලකුණු 162 ක් ලබාගත්තේය. සිය 9 වැනි විස්සයි-20 අර්ධ ශතකය ලබාගත් කුසල් මෙන්ඩිස්ට විශිෂ්ට සහයෝගක් දුන් චරිත් අසලංක සහ භානුක රාජපක්‍ෂ මෙම ශක්තිමත් ස්ථානය දක්වා ශ්‍රී ලංකා කණ්ඩායම කැඳවාගෙන ගියහ.
8 වැනි ඕවරය නිමාවේදී ශ්‍රී ලංකාවේ ලකුණු පුවරුව කියැවුණේ කඩුලු 2 කට 42 ක් ලෙසිනි. එහෙත් එතැන් සිට සෑම ඕවර දෙකකටම වරක් 60/2, 78/2, 96/2, 119/3, 138/4 සහ 162/6 ක් ලෙසින් ශ්‍රී ලංකා ලකුණු පුවරුව වෙනස් විය.
මෙන්ඩිස්ගේ පන්දු 44 ඉනිම, හයේ පහර 5 කින් සහ හතරේ පහර 5 කින් සමන්විත විය. ඔහුගේ හයේ පහර 5 ම හතරේ සීමාව වඩාත් ආසන්නයෙන් පිහිටි ලෝන්ග් ලෙග් කලාපයට ඉහළින් විය. එය සැලසුම් සහගත ආක්‍රමණයකි.
මෙන්ඩිස් සහ පැතුම් නිස්සංක දෙදෙනා හොඳින් පන්දුවට පහර දෙමින් සිටි මොහොතක, පෝල් වැන් මීකර්න් පිට පිටම යැවූ පන්දු දෙකකින් පැතුම් නිස්සංක සහ ධනංජය ද සිල්වා පිටියෙන් ඉවත් කළේය. ඒ හේතුවෙන් ශ්‍රී ලංකා පිල හදිසියේම අමාරුවේ වැටුණේය. වැන් මීකර්න්ගේ කඩුලු ත්‍රිත්වය වැළැක්වූ චරිත් අසලංක, එතැන් සිට ශ්‍රී ලංකා ඉනිමට ධෛර්යයත් ජවයත් එන්නත් කරමින් ශ්‍රී ලංකා ඉනිම පිළිසකර කිරීම ආරම්භ කළේය.
තම තුන්වැනි හයේ පහරින් අර්ධ ශතකය සම්පූර්ණ කළ කුසල් ලකුණු 100 කඩයිමෙන් එපිටට ශ්‍රී ලංකා කණ්ඩායම තල්ලු කරන අතරේ භානුක රාජපක්‍ෂ සිය සුපුරුදු පිතිහරඹ රටාවට අවතීර්ණ වෙමින් සිටියේය. භානුකට මෙන්ම චරිත් අසලංකටත් වඩාත් දිගු ඉනිම සඳහා යාමේ පහසු හැකියාවක් තිබුණද දෙදෙනාම කළේ ලකුණු අතර සිටි, ස්ථාවර පිතිකරුවා වූ කුසල් මෙන්ඩිස්ට කඩුල්ලේ රැඳී සිටීමට අවස්ථාව දෙමින් තම තමන් ආක්‍රමණයට පිවිසීමයි.
ප්‍රධානතම වේග පන්දු යවන්නන් දෙදෙනකු තුවාල ලබා කණ්ඩායමෙන් ඉවත්ව සිටියද, ශ්‍රී ලංකාව හමුවේ ලකුණු 163 ක ඉලක්කයක් කරායාම නෙදර්ලන්තයට පහසු නොවීය.
ළහිරු කුමාර යැවූ දෙවැනි ඕවරයේදී ලකුණු 9 ක් ලබාගත් නමුත් සෙසු පන්දු යවන්නෝ නෙදර්ලන්ත පිතිකරුවන් පාලනය කරගෙන සිටියහ. ආරම්භක පිතිකරු මැක්ස් ඕ’ඩාවුඩ් ඕවර 20 ම පිටියේ සිටිමින් හුදෙකළා සටනක නිරත වූ නමුත්, වනිඳු හසරංග (28/3) සහ මහීෂ් තීක්‍ෂණ (32/2) දෙදෙනාගේ පන්දු යැවීමත්, විශේෂයෙන්ම ශ්‍රී ලංකා ක්‍රීඩකයන්ගේ පන්දු රැකීමත් හමුවේ නෙදර්ලන්තය අසරණ විය.
හසරංග සහ තීක්‍ෂණ දෙදෙනාගේ පන්දු යැවීම හේතුවෙන්, වරෙක කඩුලු 4 කට ලකුණු 100 ක් ලෙසින් සටහන් වූ නෙදර්ලන්ත ලකුණු පුවරුව, ඕවර 2.3 ක් ඇතුළත කඩුලු 8 කට 109 ක් ලෙසින් සටහන් වූයේය.
තරගය ජයගැනීමට නම් අවසන් පන්දු 18 න් ලකුණු 54 ක් අවශ්‍යව තිබුණද නෙදර්ලන්තය සතුව පැවැතියේ කඩුලු දෙකකි. එතැන් සිට මියෙම්වා - රැකෙම්වා පිතිහරඹයක නිරත වූ මැක්ස් ඕ’ඩාවුඩ් අවසන් ඕවර තුනේදී ලබාගත් ලකුණු කිහිපයට අතිරේක ලකුණු වැඩි ප්‍රමාණයක් ද එකතු වූයේය.
මැක්ස් ඕ’ඩාවුඩ්ගේ පන්දු 53 ඉනිම හයේ පහර 3 කින් සහ හතරේ පහර 6 කින් සමත්විත වූ නමුත් 146 නෙදර්ලන්ත ඉනිමේ නිමාව විය.
ලකුණු පුවරුව
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
