(රොෂාන් ගුණරත්න)
අන්තර් සමාජ සීමිත ඕවර ක්‍රිකට් තරගාවලියේ අවසන් පූර්ව තරග සඳහා ‘ඒ‘ කාණ්ඩයෙන් යුදහමුදා සහ එන්.සී.සී. කණ්ඩායම්ද, ‘බී’ කාණ්ඩයෙන් රාගම සහ ද්‍රවිඩ සංගමය යන කණ්ඩායම්ද සුදුසුකම් ලබාගැනීමට සමත්ව සිටිති.
පානදුර සහ බ්ලූම්ෆීල්ඞ් ක්‍රීඩා සමාජ සමගින් ඒස් කැපිටල් පිලට මූලික වටයේ තවත් තරග 2 ක් හෙට (26 වැනිදා) සහ අනිද්දා (27 වැනිදා) ක්‍රීඩා කිරිමට නියමිතව ඇත. නමුත් මෙම කණ්ඩායම් තුනෙක් එකම කණ්ඩායමකටවත් අවසන් පූර්ව වටය සඳහා සුදුසුකම් ලබාගැනීමේ අවස්ථාවක් නොමැත.
ප්‍රසාද ලකුණු 22 ක් ලබාගනිමින් ‘ඒ’ කාණ්ඩයෙන් ප්‍රසාද ලකුණු සටහනේ පෙරමුණට පැමිණි යුදහමුදා පිල තරග 12 කට ක්‍රීඩා කරමින් ඉන් තරග 6 ක් ජයගෙන එක් තරගයක් පරාජයට පත්විය. තවත් තරග 5 ක් විසඳුමකින් තොරව අවසන් වූ අතර අතිරේක ප්‍රසාද ලකුණු 5 ක් ද ඔවුන්ට හිමිවිය.
එන්.සී.සී. පිල ප්‍රසාද ලකුණු 19 ක් ලබාගනිමින් ‘ඒ’ කාණ්ඩයෙන් ප්‍රසාද ලකුණු සටහනේ දෙවැනි ස්ථානයට පත්විය. තරග 12 කට ක්‍රීඩා කරමින් ඉන් තරග 4 ක් ජයගත් එන්.සී.සී පිල එක් තරගයක් ලකුණු සමව අවසන් කරගනු ලැබීය. එන්.සී.සී. පිල කිසිදු තරගයක් පරාජයට පත් නොවූ අතර තරග 7 ක් විසඳුමකින් තොරව අවසන් විය. අතිරේක ප්‍රසාද ලකුණු 3 ක් ද ඔවුන්ට හිමිවිය.
ලකුණු 18 ක් ලබාගත් රාගම සහ ද්‍රවිඩ සංගමය සම ප්‍රසාද ලකුණු ලබාගනිමින් ‘බී’ කාණ්ඩයෙන් ඉදිරියට පැමිණි අතර ශූද්ධ ලකුණු වේගය මත රාගම පිල පෙරමුණ ගැනීමට සමත්විය. තරග 12 කට ක්‍රීඩාකළ රාගම පිල තරග 4 ක් ජයගෙන ඇති අතර කිසිදු තරගයක් පරාජයට පත්නොවීය. තරග 8 ක් විසඳුමකින් තොරව අවසන් කරගෙන ඇති ඔවුන්ට අතිරේක ප්‍රසාද ලකුණු 2 ක් ද හිමිවේ.
ද්‍රවිඩ සංගමය තරග 12 කින් තරග 5 ක් ජයගෙන ඇති අතර එක් තරගයක් පරාජයට පත්වී ඇත. තරග 6 ක් ජය පරාජයෙන් තොරව අවසන් කරගෙන ඇති ඔවුන්ටද අතිරේක ප්‍රසාද ලකුණු 2 ක් හිමිවේ.
මූලික වටයේ තරග ඊයේ (24 වැනිදා) අවසන්වීමට නියමිතව තිබුනද ඒස් කැපිටල් පිලේ ක්‍රීඩකයකුට කොරෝනා වයිරසය වැළඳීම හේතුවෙන් දින තුනක් මූලික වටයේ තරග කල්දැමීමට ශ්‍රී ලංකා ක්‍රිකට් ආයතනය කටයුතු කළේය. ඒ අනුව මූලික වටයේ තරග 27 වැනිදා අවසන් වන අතර අවසන් පූර්ව තරග 28 වැනිදාත්, අවසන් තරගය 30 වැනිදාත් පැවැත්වීමට තීරණය කෙරුණි.
යුදහමුදා පිල සහ ද්‍රවිඩ සංගමය පළමු අවසන් පූර්ව තරගයේදී හමුවන අතර රාගම සහ එන්.සී.සී කණ්ඩායම් දෙවැනි අවසන් පූර්ව තරගයේදී හමුවනු ඇත.
මූලික අදියර අවසන් වීමට තවත් දින 2 ක් ඉතිරිව ඇති නමුත් පැවැත් වූ තරග 154 කින් තරග 85 ක්ම වර්ෂාවට සේදී ගියේය. ඉන් තරග 69 කදී එකඳු පන්දුවක් හෝ යැවීමට නොහැකි වූ අතර තවත් තරග 16 ක් තීරණයක් නොලඹාම අවසන් කිරීමට සිදුවිය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
