ඉදිරි වසර දෙකක (2022-23) කාලයට අදාළව ඇෆ්ඝනිස්තාන පිල ජාත්‍යන්තර තරග කාළසටහන නිවේදනය කර තිබේ. එහිදී ශ්‍රී ලංකාව සමගින් එක්දින තරගාවලියක්ද පැවැත්වීමට නියමිතව ඇත. එම වසර දෙක තුලදී ඇෆ්ඝනිස්තානය විසින් ටෙස්ට් තරග 3 ක්, එක්දින තරග 37 ක් සහ විස්සයි20 තරග 12 ක් ක්‍රීඩා කරනු ලැබේ.
තරග 3 කින් සමන්විත එක්දින තරගාවලියක් සඳහා ඇෆ්ඝනිස්තානය 2023 වසරේ ජනවාරී මාසයේදී ශ්‍රී ලංකාවේ සංචාරය කරනු ඇත.
ලෝක කුසලාන සුපර් ලීග් තරඟාවලිය යටතේ ඇෆ්ගනිස්තානය තරඟාවලි 7 ක් ක්‍රීඩා කරයි. ඊට අමතරව ලබන වසරේ පැවැත්වෙන විස්සයි20 ආසියානු කුසලානය සහ විස්සයි20 ලෝක කුසලානයද, 2023දී පැවැත්වෙන ආසියානු කුසලානය සහ ලෝක කුසලාන ඇතුළුව ප්‍රධාන තරගාවලි 4 කට ද ඇෆ්ගනිස්තානය ක්‍රීඩා කරයි.
ලබන වසරේ ජනවාරී මාසයේදී නෙදර්ලන්තයට එරෙහිව තරග 3 කින් සමන්විත එක්දින තරගාවලියක් සඳහා ඇෆ්ඝනිස්තානය සත්කාරකත්වය දරනු ඇත. ඉන් පසුව ජනවාරී සහ පෙබරවාරී මාසයන්හිදී තරග 3 කින් සමන්විත එක්දින තරගාවලියකට සහ තරග 5 කින් සමන්විත විස්සයි20 තරගාවලියක් සඳහා ඇෆ්ඝනිස්තාන පිල සිම්බාබ්වේ බලා පිටත්ව යයි.
පෙබරවාරී සහ මාර්තු මාසවලදී තරග 3 කින් සමන්විත එක්දින තරගාවලියක් සහ විස්සයි20 තරග 2 ක් සඳහා බංග්ලාදේශය බලා පිටත්ව යන ඇෆ්ඝනිස්තාන පිල ඉන්පසුව එක්දින තරග 3 ක් සඳහා ඉන්දියාවට යනු ඇත. මැයි සහ ජුනී මාසවලදී තරග 3 කින් සමන්විත විස්සයි20 තරගාවලියක් සඳහා ඕස්ට්‍රේලියාව බලා පිටත්ව යන ඇෆ්ඝනිස්තානය ජුලී සහ අගෝස්තු මාසවලදී එක් ටෙස්ට් තරගයක් සහ එක්දින තරග 5 ක් සඳහා අයර්ලන්තයේදී ක්‍රීඩා කිරීමට නියමිතය. නොවැම්බර් සහ දෙසැම්බර් මාස වලදී ටෙස්ට් තරග 2 ක්, එක්දින තරග 5 ක් සහ විස්සයි20 තරග 2 ක් සඳහා ඇෆ්ඝනිස්තාන කණ්ඩායම සිම්බාබ්වේ බලා පිටත්ව යාමට සුදානම්ව සිටියි.
2023 වසරේ ජනවාරී මාසයේදී තරග 3 ක සංචාරයක් සඳහා ශ්‍රී ලංකාවට පැමිණෙන ඇෆ්ඝනිස්තාන කණ්ඩායම, පෙබරවාරී, මාර්තු, අප්‍රේල් සහ සැප්තැම්බර් මාසවලදී පාකිස්තානය, ඕස්ට්‍රේලියාව, බටහිර ඉන්දීය කොදෙව් සහ නවසීලන්තය සමග තරග 3 කින් සමන්විතව පැවැත්වෙන එක්දින තරගාවලි 4 ක් සඳහා සත්කාරකත්වය දැරීමට නියමිතව ඇත.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
