(රොෂාන් ගුණරත්න)
ශ්රී ලංකා කණ්ඩායමේ හිටපු පිටදඟපන්දු යවන්නකු වන ඩිල්රුවන් පෙරේරාට කොරෝනා වයිරසය ආසාදනයවී ඇති බව වාර්තා වේ. අන්තර්සමාජ සීමිත ඕවර තරගාවලියේදී ඩිල්රුවන් පෙරේරා පානදුර ක්රීඩා සමාජය නියෝජනය කරන බැවින් දොඹගොඩ ක‍්‍රීඩාංගණයේදී අද (26 වැනිදා) පැවැත්වීමට නියමිතව තිබූ පානදුර සහ ඒස් කැපිටල් කණ්ඩායම් අතර තරගය උදෑසනම නතර කිරීමට ශ්රී ලංකා ක්රිකට් ආයතනය තීරණය කර ඇත.
ඩිල්රුවන් පෙරේරාගේ පවුලේ සාමාජිකයකුට මුලින් කොරෝනා වයිරය වැළඳී ඇති අතර පසුව ඔහුටද වයිරසය ආසාදනයවී තිබේ.
පසුගිය 23 වැනිදා පානදුර ක‍්‍රීඩාංගණයේදී ගාල්ල කණ්ඩායම සමගින් පැවැති තරගයටද ඩිල්රුවන් පෙරේරා සහභාගිවී ඇති අතර ඊට පසුදා (24) මග්ගොන සරේ ක‍්‍රීඩාංගණයේදී සැරසන්ස් කණ්ඩායම සමගින් පැවැති තරගයටද ඔහු සහභාගිවී ඇත.
24 වැනිදා ඔහු ක‍්‍රීඩාංගණයට පැමිණි පසු ඔහුගේ පවුලේ සාමාජිකයාට කොරෝනා වයිරසය වැළ`දී ඇති බව පරීක්‍ෂණ වාර්තා ලැබීමත් සමගින් ඔහු ක‍්‍රීඩාංගණයෙන් ඉවත්ව ගොස් ඇත. එදිනම පී.සී.ආර්. පරීක්‍ෂණයක් සිදුකර ගෙන ඇති ඩිල්රුවන් පෙරේරාගේ පරීක්‍ෂණ වාර්තාවද කොරෝනා වයිරසයට ධනාත්මක ප‍්‍රතිපල පෙන්වා තිබේ.
දින 2 කට පසුව අද දොඹගොඩ යුද හමුදා ක‍්‍රීඩාංගණයේදී ඒස් කැපිටල් කණ්ඩායම සමගින් පැවැති තරගයට පානදුර කණ්ඩායම පැමිණ ඇති නමුත් ඔවුන් ඇන්ටිජන් පරීක්‍ෂාවකට හෝ ලක්කර නොතිබුණි. ඇන්ටිජන් පරීක්‍ෂාවක් සිදුකර ගැනීම සඳහා අවම වශයෙන් දින 3 ක කාලයක් සම්පූර්ණවී තිබිය යුතු බැවින් තරගය අවලංගු කිරීම සඳහා තරග තීරක ලෙස කටයුතු කළ සී.පී.රිචඞ් මහතා ශ්රී ලංකා ක්රිකට් ආයතනයෙන් විමසා ඇත.
පානදුර කණ්ඩායමේ ක‍්‍රීඩකයන් ඇන්ටිජන් පරීක්‍ෂාවක් සිදුකර නොමැති බැවින් අනෙක් කණ්ඩායමේ ක‍්‍රීඩකයන් සහ සහයක කණ්ඩායම් වල ආරක්‍ෂාව සලකා බලා තරගය අවලංගු කළ බව ශ්රී ලංකා ක්රිකට් ආයතනයේ දේශීය තරගාවලි ප‍්‍රධානී චින්තක එදිරිමාන්න මහතා ලංකාදීපයට පැවසීය.
”පානදුර සහ එස් කැපිටල් කණ්ඩායම් අතර තරගය නැවත පැවැත්වීම ම`ගින් කණ්ඩායම් දෙකටම අවසන් පූර්ව වටයට සුදුසුකම් ලබාගන්න අවස්ථාවක් නෑ. ඒ නිසා තරගය අතහැර දමන බවත් ප‍්‍රසාද ලකුණු 2 ක් ඒස් කැපිටල් පිලට පිරිනමනවා” යයි එදිරිමාන්න මහතා වැඩිදුරටත් පැවසීය.
එංගලන්ත ප‍්‍රාන්ත තරගාවලීන්ට සහභාගිවී පැමිණෙන ක‍්‍රීඩකයක් ලඟ ඕනෑම මොහොතක ඇන්ටිජන් පරීක්‍ෂාවක් සිදුකර ගැනීමට අවශ්‍ය උපකරණ තිබෙන බැවින් ඔව්හු සැමවිටම පරීක්‍ෂා කර ගනිති. නමුත් ශ්රී ලංකා ක්රිකට් ආයතනය මගින් එවැනි පහසුකමක් ලබානොදීමත් ඒ සඳහා අධික වියදමක් දැරීමට සිදුවන බැවින් දේශීය තරගාවලියන්ට එක්වන ක‍්‍රීඩකයෝ මුදල් වියදම් කර එවැනි පරීක්‍ෂාවන් කර ගැනීමට මැලිවෙති.
පසුගියදා ඒස් කැපිටල් පිලේ ක‍්‍රීඩකයකුට රෝග ලක්‍ෂණ පහල වීමේදීම ඇන්ටිජන් පරීක්‍ෂාවක් කර ගැනීමට ඔහු සතුව එම උපකරණ තිබීම හේතුවෙන් තවත් බොහෝ පිරිසකට රෝගය ව්‍යාප්ත වීම වලක්වා ගැනීමට හැකිවිය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
