අබුඩාබි දහයයි-10 තරගාවලියට ක්රීඩා කරන චෙන්නායි බ්‍රේව්ස් කණ්ඩායමේ නායකත්වයෙන් දසුන් ශානක ඉවත්කර ඒ සඳහා ඇන්ජලෝ පෙරේරා පත්කිරීමට එම කණ්ඩායමේ හිමිකරුවෝ පියවර ගෙන තිබේ. බ්‍රේව්ස් කණ්ඩායම සහභාගි වූ මුල් තරග 6 දීම කණ්ඩායමේ නායකත්වය දැරු දසුන් ශානක ඉන් එක් තරගයකදී හෝ සිය කණ්ඩායම ජයග‍්‍රහණය කරා මෙහෙයවීමට අසමත් වීම ඊට හේතු වී ඇතැයි වාර්තා වේ.
කණ්ඩායම් 6 ක සහභාගීත්වයෙන් පැවැත්වෙන මෙම තරගාවලියේ මූලික වටයේදී එක් කණ්ඩායමක් තරග 10 කට බැගින් සහභාගිවනු ඇත. එහිදී චෙන්නායි බ්‍රේව්ස් කණ්ඩායම මෙතෙක් සහභාගි වූ තරග 8 ම පරාජයට පත්වී තිබේ. ඒ අනුව තරගාවලියේ අවසන් පූර්ව වටයට සුදුසුකම් ලැබීමේ අවස්ථාව පළමුවෙන්ම අහිමි වූයේද බ්‍රේව්ස් කණ්ඩායමටය.
බ්‍රේව්ස් කණ්ඩායම සහභාගි වූ 6 වැනි තරගයේ පරාජයෙන් අනතුරුව කණ්ඩායමේ නායකත්වයේ වෙනසක් කරමින් ඇන්ජලෝ පෙරේරා නායකත්වයට පත්කිරීමට කණ්ඩායමේ හිමිකරුවෝ පියවර ගත්හ. ඉන් අනතුරුව තරග 2 කදී කණ්ඩායමේ නායකත්වය දැරූ ඇන්ජලෝටද ඉන් එක් අවස්ථාවකදී හෝ කණ්ඩායම ජයග‍්‍රහණයක් කරා මෙහෙයවීමට නොහැකි විය.
මූලික වටයේදී බ්‍රේව්ස් කණ්ඩායම තවත් තරග 2 කට කී‍්‍රඩා කිරීමට නියමිත අතර ඉන් පළමුවැන්න අද (29 වැනිදා නොදර්න් වොරියර්ස් කණ්ඩායමට එරෙහිවද, දෙවැන්න අනිද්දා (1 වැනිදා දිල්ලි බුල්ස් කණ්ඩායමට එරෙහිවද පැවැත්වීමට නියමිතය.
දසුන් ශානක සහ ඇන්ජලෝ පෙරේරාට අමතරව ඉදිරි පෙළ පිතිකරු භානුක රාජපක්ෂ, තුන් ඉරියව් කී‍්‍රඩක ධනංජය ලක්ෂාන්, වේග පන්දු යවන කී‍්‍රඩක නුවන් ප‍්‍රදීප් සහ පා දඟ පන්දු යවන කී‍්‍රඩක කෙවින් කොත්තිගොඩ යන ශ්‍රී ලංකා කී‍්‍රඩකයෝද චෙන්නායි බ්‍රේව්ස් කණ්ඩායමට කී‍්‍රඩා කරති.
බ්‍රේව්ස් කණ්ඩායම වෙනුවෙන් ඉනිම 7 කදී ලකුණු 194 ක් රැස්කරගෙන ඇති භානුක රාජපක්ෂ තරගාවලියේ වැඩිම ලකුණු ලාභීන් අතර 6 වැනි ස්ථානයේ පසුවේ. ඉනිම 8 කදී ලකුණු 147 ක් ලබා සිටින ඇන්ජලෝ පෙරේරා එම ලැයිස්තුවේ 12 වැනි ස්ථානයේ රැුදී සිටියි. එක් ඉනිමකදී ඕවර 2 ක් යවමින් ලකුණු 16 කට කඩුලූ 2 ක් දවාගැනීමටද ඇන්ජලෝ සමත් වී ඇත.
තරගාවලියේ වැඩිම ලකුණු ලාභීන්ගේ ලැයිස්තුවේ 32 වැනි ස්ථානයේ පසුවන දසුන් ශානක ඉනිම 7 කදී රැස්කරගෙන ඇත්තේ ලකුණු 59 ක් පමණි. පන්දු යවන්නකු ලෙසද අසාර්ථක වී ඇති ඔහු ඉනිම 4 කදී ඕවර 6.2 ක් යවා ප‍්‍රතිවාදීන්ට ලකුණු 103 ක් ලබා දෙමින් දවාගෙන ඇත්තේ එක් කඩුල්ලක් පමණි.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
