පිතිකරුවෝ ලක්නව් පිලට ජය ගෙනෙති

ඉන්දීය ප්‍රිමියර් ලීග් තරගාවලියේ 21 වැනි තරගය ලෙස ලක්නව් සුපර් ජයන්ට්ස් කණ්ඩායම සහ කොල්කටා නයිට් රයිඩර්ස් කණ්ඩායම අතර කොල්කටා නුවර ඊඩ්න් ගාඩ්න් ක්‍රීඩාංගණයේදී අද (8 වැනිදා) පැවැති තරගයෙන් ලකුණු 3 ක තියුණු ජයක් වාර්තා කිරීමට ලක්නව් කණ්ඩායම සමත් විය. ලක්නව් කණ්ඩායම මෙවර තරගාවලියේදී ලැබූ තෙවැනි ජය මෙය විය. 

ජයග්‍රහණය සඳහා ලකුණු 239 ක ඉලක්කයක් හඹාගිය කොල්කටා ක්‍රීඩකයන්ට ඕවර 20 ක් අවසානයේ කඩුලු 7 ක් දැවී ලබාගත හැකි වූයේ ලකුණු 234 ක් පමණි. වේගවත් පිතිහරඹයක නිරත වූ රිංකු සිං පන්දු 15 කදී හයේ පහර 2 ක් සහ හතරේ පහර 6 ක් සමග නොදැවී ලකුණු 38 ක් රැස්කළද, ඔහුට සිය කණ්ඩායම ජයග්‍රහණය කරා ගෙන යෑමට නොහැකි විය. 

එහිදී නායකත්වයේ ඉනිමක් ක්‍රීඩා කළ අජින්ක්‍යා රහනේ පන්දු 35 කදී හයේ පහර 2 ක් සහ හතරේ පහර 8 ක් සමග ලකුණු 61 ක් රැස්කළ අතර ආරම්භක පිතිකරු සුනිල් නරේන් පන්දු 13 කදී හයේ පහර 2 ක් සහ හතරේ පහර 4 ක් සමග ලකුණු 30 ක්ද, වෙන්කටේෂ් අයියර් පන්දු 29 කදී හයේ පහරක් සහ හතරේ පහර 6 ක් සමග ලකුණු 45 ක්ද රැස්කළහ. 

පළමුවෙන් පන්දුවට පහරදුන් ලක්නව් කණ්ඩායම ඕවර 20 අවසානයේ කඩුලු 3 ක් දැවී ලකුණු 238 ක් ලබාගත් අතර එහිදී ප්‍රවේගකාරී පිතිහරඹයක නිරත වූ නිකලස් පූරන් පන්දු 36 කින් නොදැවී ලකුණු 87 ක් රැස්කළේ හයේ පහර 8 ක් සහ හතරේ පහර 7 ක් සමගිනි. මෙවර තරගාවලියේ වැඩිම ලකුණු ලාභියා බවට පත්ව සිටින පූරන් මේ වන විට තරග 4 කදී ලබා සිටින ලකුණු සංඛ්‍යාව 201 කි. 

මිචෙල් මාෂ් (81) සමග එක්ව දෙවැනි කඩුල්ල වෙනුවෙන් පන්දු 30 කදී ලකුණු 71 ක සම්බන්ධතාවක් ගොඩනැගූ පූරන්, ඉන් නොනැවතී අබ්දුල් සමාඩ් (6) සමග එක්ව තෙවැනි කඩුල්ල වෙනුවෙන් පන්දු 18 කදී ලකුණු 51 ක වේගවත් සම්බන්ධතාවක්ද ගොඩනගමින් ලක්නව් කණ්ඩාමේ ලකුණු සංඛ්‍යාව 230 සීමාවෙන් ඔබ්බට ගෙන ගියේය. 

පන්දු 48 කදී වාර්තා වූ මාෂ්ගේ අර්ධ ශකකය හයේ පහර 5 කින් සහ හතරේ පහර 6 කින් සමන්විත වූ අතර පන්දු 28 කට මුහුණදුන් ඒඩ්න් මාක්‍රම් (47) හයේ පහර 2 කින් සහ හතරේ පහර 4 කින් සිය ඉනිම සැරසුවේය. එහිදී ඔවුන් දෙදෙනා එක්ව ලක්නව් කණ්ඩායමේ ආරම්භක කඩුල්ල වෙනුවෙන් පන්දු 62 කදී ගොඩනැගූ සම්බන්ධතාව ලකුණු 99 කි.

ලක්නව් සුපර් ජයන්ට්ස් පිල - ඕවර 20 කදී කඩුලු 3 ක් දැවී 238 
(ඒඩ්න් මාක්‍රම් 47, මිචෙල් මාෂ් 81, නිකලස් පූරන් නොදැවී 87, හර්ෂිත් රානා 51/2) 

කොල්කටා නයිට් රයිඩර්ස් පිල - ඕවර 20 කදී කඩුලු 7 ක් දැවී 234 
(සුනිල් නරේන් 30, අජින්ක්‍යා රහනේ 61, වෙන්කටේෂ් අයියර් 45, රිංකු සිං නොදැවී 38, ශර්ධුල් ඨාකූර් 52/2, ආකාෂ් දීප් 55/2) 
 
-036