බී-ලව් කැන්ඩි පිල පළමු ජය ලබයි

(ශානුක අරවින්ද)

ලංකා ප්‍රිමියර් ලීග් (2023) තරගාවලියේ හයවැනි තරගය ලෙස දඹුල්ල අවුරා කණ්ඩායම සහ බී-ලව් කැන්ඩි කණ්ඩායම අතර පල්ලෙකැළේ ජාත්‍යන්තර ක්‍රිකට් ක්‍රීඩාංගණයේදී අද (4 වැනිදා) පැවැත්වෙන තරගයෙන් කඩුලු 7 ක ජයක් වාර්තා කිරීමට බී-ලව් කැන්ඩි කණ්ඩායම සමත් විය. පරාජයන් දෙකක් ලබා ලකුණු සටහනේ පතුළේ රැදී සිටි කැන්ඩි කණ්ඩායම, මෙම තරගාවලියේදී ලැබූ පළමු ජයග්‍රහණය මෙය විය.

ජයග්‍රහණය සඳහා ලකුණු 157 ක ඉලක්කයක් හඹාගිය කැන්ඩි ක්‍රීඩකයෝ ඕවර 18.3 ක් අවසානයේ කඩුලු 3 ක් පමණක් දැවී ඉලක්කය පසුකර ගියහ. ඇන්ජලෝ මැතිව්ස් පන්දු 20 කදී හයේ පහරක් සහ හතරේ පහර 2 ක් සමග නොදැවී ලකුණු 28 ක්ද, අසීෆ් අලී පන්දු 8 කදී හතරේ පහර 3 ක් සමග නොදැවී ලකුණු 16 ක්ද රැස්කරමින් කැන්ඩි කණ්ඩායම ජයග්‍රහණය කරා ගෙන ගියහ.

ආරම්භක පිතිකරුවන් වූ ෆකාර් සමාන් (28) සහ දිනේෂ් චන්දිමාල් (48) පළමු කඩුල්ල වෙනුවෙන් පන්දු 48 කදී ලකුණු 69 ක වේගවත් සම්බන්ධතාවක් ගොඩනගමින් සිය කණ්ඩායමේ ජයග්‍රහණය සඳහා මනා අඩිතාලමක් දැමූහ. පන්දු 26 කදී වාර්තා වූ ෆකාර්ගේ ඉනිමට හතරේ පහර 5 ක්ද, පන්දු 29 කදී වාර්තා වූ චන්දිමාල්ගේ ඉනිමට හතරේ පහර 7 ක්ද අන්තර්ගත විය.

කාසියේ වාසිය දිනා පළමුවෙන් පන්දුවට දඹුල්ල අවුරා කණ්ඩායම ඕවර 20 අවසානයේ කඩුලු 6 ක් දැවී ලකුණු 156 ක් ලබාගත්තේය. මුල් පෙළ පිතිකරුවන් අසාර්ථක වෙද්දී, එක් අන්තයක් රැකගෙන ඉනිමේ අවසන් පන්දුව දක්වාම පන්දුවට පහරදුන් ධනංජය ද සිල්වා පන්දු 39 කදී හයේ පහර 3 ක් සහ හතරේ පහර 5 ක් සමග ලකුණු 61 ක් රැස්කළේය.

ආරම්භක පිතිකරු අවිෂ්ක ප්‍රනාන්දු (32) සමග එක්ව සිවුවැනි කඩුල්ල වෙනුවෙන් පන්දු 36 කදී ලකුණු 42 ක සම්බන්ධතාවක් ගොඩනැගූ ධනංජය, ඉන් නොනැවතී ඇලෙක්ස් රොස් (21) සමග එක්ව පස්වැනි කඩුල්ලට ලකුණු 40 ක්ද, හේඩ්න් කේර් (නොදැවී 12) සමග එක්ව හයවැනි කඩුල්ලට ලකුණු 39 ක්ද එක්කරමින් දඹුල්ල ඉනිම ගොඩනැගුවේය.

පන්දු 31 කදී වාර්තා වූ අවිෂ්කගේ ඉනිමට හයේ පහරක් සහ හතරේ පහර 3 ක් ඇතුළත් වූ අතර පන්දු 18 කදී වාර්තා වූ රොස්ගේ ඉනිම හතරේ පහර 3 කින් සමන්විත විය. දක්ෂ පන්දු යැවීමක නිරත වූ මුජිබුර් රහමන් සිය ඕවර 4 ලකුණු 17 කට සීමා කරමින් කඩුලු 2 ක් දවාගත් අතර ඉසුරු උදාන ලකුණු 33 කට කඩුලු 2 ක් බිඳහෙළීය.

දඹුල්ල අවුරා පිල - ඕවර 20 කදී කඩුලු 6 කට 156
(අවිෂ්ක ප්‍රනාන්දු 32, සධීර සමරවික්‍රම 14, ධනංජය ද සිල්වා 61, ඇලෙක්ස් රොස් 21, හේඩ්න් කේර් නොදැවී 12, මුජිබුර් රහමන් 17/2, ඉසුරු උදාන 33/2)

බී-ලව් කැන්ඩි - ඕවර 18.3 කදී කඩුලු 7 කට 160
(ෆකාර් සමාන් 28, දිනේෂ් චන්දිමාල් 48, කමිඳු මෙන්ඩිස් 18, ඇන්ජලෝ මැතිව්ස් නොදැවී 28, අසීෆ් අලී නොදැවී 16)