බංග්ලාදේශ ‘ඒ’ පිලෙන් ප්‍රබල පිළිතුරක්

මොසඩක් හොසේන් (135) සහ සබීර් රෙහ්මන් (නොදැවී 144) ශතක ලබාගත් හෙයින් සංචාරක ශ්‍රී ලංකා ‘ඒ’ කණ්ඩායමට එරෙහිව චිතගොන්හිදී පැවැත්වෙන පළමු නිල නොවන ටෙස්ට් තරගයේ තෙවැනි දිනය වන අද (28 වැනිදා)ූ ක්‍රීඩාව නතර කරන විට බංග්ලාදේශ ‘ඒ’ කණ්ඩායම සිය පළමු ඉනිම වෙනුවෙන් කඩුලු 4 ක් දැවී ලකුණු 360 ක් රැස්කිරීමට සමත්ව සිටියේය. මෙම තරගයේදී පළමුවෙන් පන්දුවට පහර දුන් ශ්‍රී ලංකා ‘ඒ’ කණ්ඩායම කඩුලු 8 ක් දැවී ලකුණු 449 ක් ලබාගත්තේය. 

සබීර් රෙහ්මන් (නොදැවී 144) සහ සකීර් හුසේන් (නොදැවී 27) කඩුල්ලේ රැඳී සිටින අතර ශ්‍රී ලංකා ‘ඒ’ කණ්ඩායම පළමු ඉනිමේදී රැස්කළ ලකුණු සංඛ්‍යාවට වඩා තවත් ලකුණු 89 ක් පසුපසින් බංග්ලාදේශ ‘ඒ’ කණ්ඩායම රැඳී සිටී. පන්දු 257 කට මුහුණදී සිටින සබීර් රහ්මන්ගේ ඉනිමට හයේ පහර 2 ක් සහ හතරේ පහර 13 ක්ද ඇතුළත් විය.

නායකත්වයේ ඉනිමක් ක්‍රීඩාකළ මොසඩක් හොසේන් පන්දු 243 කට මුහුණදුන් අතර ප්‍රභාත් ජයසූරියගේ පන්දුවක් කඩුල්ලේ වැදීමෙන් ලකුණු 135 කට දැවී ගියේය. හයේ පහර 3 ක් සහ හතරේ පහර 9 ක් සමගින් සිය ඉනිම අලංකාර කිරීමට මොසඩක් හොසේන්ට හැකිවිය. මොසඩක් හොසේන් සමගින් එක්ව සිවුවැනි කඩුල්ල සඳහා ලකුණු 209 ක සම්බන්ධතාවක් පැවැත්වූ සබීර් රෙහ්මන් පස්වැනි කඩුල්ල සඳහා සකීර් හුසේන් සමඟින් එක්වද තවත් ලකුණු 77 ක නොබිඳුණු සම්බන්ධතාවයක් ගොඩනගමින් සිටී. 

තරගය දෙවැනි දිනට ඊයේ නතර කරනවිට බංග්ලාදේශ ‘ඒ’ කණ්ඩායම ලකුණු 44 කට කඩුලු 2 ක් අහිමිකරගෙන සිටියේය. අද පෙරවරුවේදී ලකුණු 25 ක් රැස්කර සිටි තුෂාර් ඉම්රාන් කඩුල්ල මුවා කිරීමේ වරදට හසුකර ගැනීමට ලක්ෂාන් සඳකැන් සමත්විය.

ශ්‍රී ලංකා ‘ඒ’ කණ්ඩායමේ නායක දිමුත් කරුණාරත්න පන්දු යවන්නන් අට දෙනෙකු යොදාගනිමින් බංග්ලාදේශ ‘ඒ’ පිතිකරුවන් මෙල්ල කිරීමට උත්සහ ගත්තද ඉන් පලක් නොවීය. පන්දු යවන්නන් අටදෙනා අතර වේගපන්දු යවන්නන් දෙදෙනෙකු සහ දඟපන්දු යවන්නන් හය දෙනෙකු සිටින අතර නිසල තාරක, චරිත් අසලංක, ප්‍රභාත් ජයසූරිය සහ ලක්ෂාන් සඳකැන් කඩුල්ල බැගින් දවාගැනීමට සමත් වූහ.