ශද්මන් - සකීබ් බංග්ලාදේශ පිල ඔසවා තබති

සංචාරක බටහිර ඉන්දිය කොදෙව් කණ්ඩායම සහ බංග්ලාදේශ කණ්ඩායම අතර ඩකාහිදී අද (30 වැනිදා) ආරම්භවූ දෙවැනි ටෙස්ට් තරගය පළමු දිනට අවසන් කරනවිට කාසියේ වාසිය දිනා පළමුව පන්දුවට පහරදුන් බංග්ලාදේශ කණ්ඩායම කඩුලු 5 ක් දැවී ලකුණු    259 ක් රැස්කිරීමට සමත්විය.

සකීබ් අල් හසන් ලකුණු 55 ක් සහ මහමුදුල්ලා ලකුණු 31 ක් රැස්කරමින් නොදැවී කඩුල්ලේ රැඳී සිටින අතර හයවැනි කඩුල්ල සඳහා ලකුණු 69 ක සම්බන්ධතාවයක්ද ගොඩනැගීමට සමත්වූහ.

මංගල තරගයට ක්‍රීඩා කරන ශද්මන් ඉස්ලාම් ලකුණු 76 ක් රැස්කර සිටියදී දේවේන්ද්‍ර බිශූගේ පන්දුවක් හමුවේ කඩුල්ල මුවා කිරීමේ වරදට හසුව දැවී ගියේය.

ලකුණු 87 කට කඩුලු 2 ක් දැවී තිබියදී තෙවැනි කඩුල්ල සඳහා එක්වූ ශද්මන් ඉස්ලාම් සහ මොහොමඞ් මිතුන් එක්ව ලකුණු 64 ක සම්බන්ධතාවයක් ගොඩනැගීය.

දේවේන්ද්‍ර බිශූ කඩුලු 2 ක් ද කෙමාර් රෝච්, ශර්මන් ලෙවිස් සහ රොස්ටන් චේස් කඩුල්ල බැගින් දවාගනිමින් බටහිර ඉන්දිය කොදෙව් පිල වෙනුවෙන් පන්දුවෙන් දස්කම් දැක්වීය.

තරග 2 කින් සමන්විත ටෙස්ට් තරගාවලියේ පළමු තරගය බංග්ලාදේශ කණ්ඩායම ජයගෙන ඇති අතර තරගාවලිය සමව අවසන් කර ගැනීමට නම් කොදෙව් කණ්ඩායමට මෙම තරගය ජයගත යුතුව ඇත.

බංග්ලාදේශ පළමු ඉනිම - ඕවර 90 කදී කඩුලු 5 ක් දැවී 259
(ශද්මන් ඉස්ලාම් 76, මොමිනුල් හක් 29, මොහොමඞ් මිතුන් 29, සකීබ් අල් හසන් නොදැවී 55, මහමුදුල්ලා නොදැවී 31, දේවේන්ද්‍ර බිශූ 69/2)