සකීබ්ගේ තුන් ඉරියව් දස්කම් බංග්ලාදේශට ජය ගෙනෙයි

සකීබ් අල් හසන්ගේ තුන් ඉරියව් දස්කම් හමුවේ සංචාරක බටහිර ඉන්දීය කොදෙව් කණ්ඩායමට එරෙහිව ඩකාහිදී අද (20 වැනිදා) පැවැති දෙවැනි විස්සයි20 තරගය ලකුණු 36 කින් ජයගැනීමට බංග්ලාදේශ කණ්ඩායම සමත්විය. ඒ අනුව තරග 3 කින් සමන්විත විස්සයි20 තරගාවලිය 1-1 ක් ලෙස සමකර ගැනීමට බංග්ලාදේශ කණ්ඩායමට හැකිවිය.

ජයග්‍රහණය සඳහා ලකුණු 212 ක ඉලක්කයක් හඹාගිය බටහිර ඉන්දීය කොදෙව් කණ්ඩායමට ඕවර 19.2 කදී සියලුදෙනා දැවී රැස්කිරීමට හැකිවූයේ ලකුණු 175 ක් පමණි.

පන්දු 19 කදී හතරේ පහර 6 ක් සමගින් ලකුණු 36 ක් රැස්කළ ශායි හෝප් වේගවත් ආරම්භයක් ලබාගත්තද මුල්පෙළ පිතිකරුවන් අඩු ලකුණු සංඛ්‍යාවකට දැවී ගියහ. 

හුදකාල සටනක නිරතවූ රොව්මන් පවෙල් පන්දු 34 කදී හයේ පහරක් සහ හතරේ පහර 5 ක් සමගින් ලකුණු 50 ක් රැස්කර සිටියදී මුස්ටෆීසූර් රහ්මන්ගේ පන්දුවක් හමුවේ ටමීම් ඉක්බාල් අතට උඩපන්දුවක් දෙමින් දැවී ගියේය.

පන්දු 16 කදි හයේ පහර 2 ක් සහ හතරේ පහරක් සමගින් ලකුණු 29 ක් රැස්කළ කීමෝ පෝල් කොදෙව් කණ්ඩායම ජයග්‍රහණය කරා රැගෙන යාමට උත්සහ කළද එය අසාර්ථක විය.

විශිෂ්ට පන්දු යැවීමක නිරතවූ සකීබ් අල් හසන් සිය ඕවර 4 ලකුණු 20 කට සීමාකරමින් කඩුලු 5 ක් දවාගැනීමට සමත්විය. ඒ අනුව විස්සයි 20 තරගයක හොදම පන්දු යැවීම වාර්තා කිරීම සකීබ් අල් හසන් අද සමත්විය. මුස්ටෆීසූර් රහ්මන් කඩුලු 2 ක් දවාගත්තේය.

කාසියේ වාසිය දිනාගත් බටහිර ඉන්දීය කොදෙව් කණ්ඩායම පළමුව පන්දුවට පහරදීම සඳහා බංග්ලාදේශ කණ්ඩායමට ආරාධනා කළ අතර ඕවර 20 අවසානයේ කඩුලු 4 ක් දැවී ලකුණු 211 ක් රැස්කිරීමට ඔවුන් සමත්වූහ.

ආරම්භක පිතිකරු ලිටන් දාස් වේගවත් පිතිහරඹයක නිරතවෙමින් පන්දු 34 කදී ලකුණු 60 ක් රැස්කිරීමට සමත්විය. හයේ පහර 4 ක් සහ හතරේ පහර 6 කින් ඔහුගේ ඉනිම අලංකාර විය.

ටමීම් ඉක්බාල් සමගින් එක්ව පළමු කඩුල්ල සඳහා පන්දු 25 කදී ලකුණු 42 ක සම්බන්ධතාවයක් ගොඩනැගූ ලිටන් දාස් දෙවැනි කඩුල්ල සඳහා සෞම්‍ය සර්කාර් සමගින් එක්ව පන්දු 42 කදී ලකුණු 68 ක තවත් සම්බන්ධතාවයක් ගොඩනැගීය.

ලකුණු 120 කට කඩුලු 4 ක් දැවී තිබියදී පස්වැනි කඩුල්ල සඳහා එක්වූ සකීබ් අල් හසන් සහ මහමුදුල්ලා පන්දු 42 කදී ලකුණු 91 ක වේගවත් නොබිඳුණු සම්බන්ධතාවයක් ගොඩනැගූහ. සකීබ් අල් හසන් පන්දු 26 කදී හයේ පහරක් සහ හතරේ පහර 5 ක් සමගින් නොදැවී ලකුණු 42 ක් රැස්කළ අතර මහමුදුල්ලා පන්දු 21 කදී හතරේ පහර 7 ක් සමගින් නොදැවී ලකුණු 43 ක් රැස් කළේය.

ශෙල්ඩන් කොට්ටේ්‍රල් කඩුලු 2 ක් දවාගත් අතර ඔශේන් තෝමස් සහ ෆාබියන් ඇලන් අතර කඩුල්ල බැගින් බෙදී ගියහ.

බංග්ලාදේශ කණ්ඩායම - ඕවර 20 කදී කඩුලු 4 ක් දැවී 211
(ලිටන් දාස් 60, සෞම්‍ය සර්කාර් 32, සකීබ් අල් හසන් නොදැවී 42, මහමුදුල්ලා නොදැවී 43, ශෙල්ඩන් කොට්ටේ්‍රල් 38/2)

කොදෙව් කණ්ඩායම - ඕවර 19.2 කදී සියලුදෙනා දැවී 175
(ශායි හෝප් 36, රොව්මන් පවෙල් 50, කීමෝ පෝල් 29, සකීබ් අල් හසන් 20/5, මුස්ටෆීසූර් රහ්මන් 50/2)