(ශානුක අරවින්ද)
ශ්‍රී ලංකා ක්‍රිකට් ආයතනය සංවිධානය කරන අන්තර් සමාජ පළමු පෙළ ක්‍රිකට් තරගාවලිය යටතේ ද්‍රවිඩ සංගම් ක්‍රීඩා සමාජය සහ නුගේගොඩ ක්‍රීඩා සමාජaය අතර පනාගොඩ යුද හමුදා ක්‍රීඩාංගණයේදී පැවැති තරගයෙන් ඉනිමක සහ ලකුණු 126 ක ජයක් වාර්තා කිරීමට ද්‍රවිඩ සංගම් ක්‍රීඩා සමාජය සමත් විය.
ඉනිමක පරාජයකින් ගැළවීම සඳහා ලකුණු 305 ක් රැස්කිරීමේ අභියෝගයක නිරත වූ නුගේගොඩ ක්‍රීඩා සමාජයට සිය දෙවැනි ඉනිම වෙනුවෙන් සියලු දෙනා දැවී ලබාගත හැකි වූයේ ලකුණු 179 ක් පමණි. නායක තරිඳු රත්නායක ලකුණු 68 කට කඩුලු 5 ක් බිඳහෙළමින් ද්‍රවිඩ සංගම් කණ්ඩායමේ ජයග්‍රහණය ඉක්මන් කළේය.
කාසියේ වාසිය දිනා පළමුවෙන් පන්දුවට පහරදුන් නුගේගොඩ කණ්ඩායම ලබාගත් ලකුණු 90 ට පිළිතුරු වශයෙන් ද්‍රවිඩ සංගම් කණ්ඩායම සියලු දෙනා දැවී ලකුණු 395 ක් ලබාගත්තේය. එහිදී වේගවත් පිතිහරඹයක නිරත වූ සඳුන් වීරක්කොඩි හයේ පහර 8 ක් සහ හතර් පහර 13 ක් සමග පන්දු 91 කින් ලකුණු 128 ක් රැස්කළේය.
තුලින දිල්ෂාන් (28) සමග එක්ව තෙවැනි කඩුල්ල වෙනුවෙන් පන්දු 67 කදී ලකුණු 106 ක වේගවත් සම්බන්ධතාවක් ගොඩගැනීමටද සඳුන් සමත් විය. ආරම්භක පිතිකරුවන් වූ නවෝද් පරණවිතාන (38) සහ සිනෙත් ජයවර්ධන (47) ද්‍රවිඩ සංගම් කණ්ඩායමේ පළමු කඩුල්ල වෙනුවෙන් ගොඩනැගූ සම්බන්ධතාව ලකුණු 76 කි.
නුගේගොඩ පළමු ඉනිම - සියලු දෙනා දැවී 90
(රොෂාන් විජේනායක 29, චාමිකර එදිරිසිංහ 20, ළහිරු සමරකෝන් 30/4, විජේකාන්ත් වියස්කාන්ත් 23/3, තරිඳු රත්නායක 24/2)
ද්‍රවිඩ සංගම් පළමු ඉනිම - සියලු දෙනා දැවී 395
(නවෝද් පරණවිතාන 38, සිනෙත් ජයවර්ධන 47, තුලින දිල්ෂාන් 28, සඳුන් වීරක්කොඩි 128, රිසිත් උපමාල් 43, ළහිරු සමරකෝන් 41, තරිඳු රත්නායක 34, මධුක ලියනපතිරණගේ 100/3, තිලකරත්න සම්පත් 141/3, චාමිකර එදිරිසිංහ 51/2)
නුගේගොඩ දෙවැනි ඉනිම - සියලු දෙනා දැවී 179
(අවිෂ්ක පෙරේරා 17, ඩිලෝන් පීරිස් 30, අක්‍රම් මුතාලිබ් 62, මධුක ලියනපතිරණ 18, සඳුන් මධුෂංක 20, තරිඳු රත්නායක 68/5)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
