(දමින්ද විජේසූරිය)
“සැමදා නියං එකදා වැහි වළාවේ” යන්න නැවත වරක් තහවුරු කළ පැතුම් නිස්සංකගේ ද්විත්ව ශතකය නිසා ජාතික සුපර් ලීග් තරගාවලියේ දඹුල්ල පිලට එරෙහිව පැවැත්වෙන තරගයේදී මහනුවර ක්‍රීඩකයෝ තරගයේ පාලනය සියතට ගෙන සිටිති. කොළඹ ආර්. ප්‍රේමදාස ක්‍රීඩාංගණයේදී පැවැත්වෙන මෙම තරගයේ දෙවැනි දිනය වූ අද (4 වැනිදා) සවස ක්‍රීඩාව නතර කරන විට දඹුල්ල ක්‍රීඩකයෝ කඩුලු 4 ක් දැවී ලකුණු 207 ක් ලබා සිටියහ.
අද සවස ක්‍රීඩාව නතර කරන විට දඹුල්ල නායක ධනංජය ද සිල්වා නොදැවී ලකුණු 81 ක් ලබා සිටි අතර ශ්‍රී ලංකා එක්දින පිලේ හිටපු නායක දසුන් ශානක ද දඹුල්ල පිල වෙනුවෙන් නොදැවී ලකුණු 34 ක් ලබා සිටියේය.
ජාතික සුපර් ලීග් තරගාවලිය ආරම්භ වූ දිනයේ සිටම පැතුම් නිස්සංකට ලබා තිබුණේ අසුබ දසාවකි. මෙම තරගාවලියේ මීට පෙර පැවැති තරග 3 ක ඉනිම 5 කදී පැතුම්ගේ ලකුණු ලබාගැනීම් වාර්තා වූයේ 4, 0, 18, 14 සහ 51 ක් ලෙසිනි. ඒ සියල්ලේම වාඩුව ඊයේ දිනයේදී ගත් ශ්‍රී ලංකා ආරම්භක පිතිකරුවා, පන්දු 260 කට මුහුණ දී, ඒවායින් 19 ක් හතරේ සීමාවෙන් එපිටට යවමින්, ලකුණු 202 ක් ලබාගත්තේය.
මහනුවර පිලේ සිව්වැනි කඩුල්ල ලෙසින් අශේන් බණ්ඩාර දැවී ගිය පසුව සොහාන් ද ලිවේරා සමගින් එක්වූ පැතුම් නිස්සංක, පස්වැනි කඩුල්ල වෙනුවෙන් ලකුණු 245 ක සම්බන්ධතාවක් ගොඩනැංවීය. ඒ වෙනුවෙන් පිතිකරුවන් දෙදෙනා මුහුණ දුන්නේ පන්දු 297 කට පමණි. පන්දු 169 කට මුහුණ දුන් සොහාන් ද ලිවේරාගේ ඉනිම හතරේ පහර 17 කින් සමන්විත විය.
ජාතික සුපර් ලීග් තරගාවලියේදී මේ දක්වා තරග 3 කට සහභාගි වී සිටින නමුත් එකම තරගයක් හෝ ජයගැනීමට සමත් නොවූ මහනුවර පිල එකම තරගයක් හෝ පරාජය වීත් නැත. තරග තුනම ජය පරාජයෙන් තොරව නිමා වූ බැවින් මහනුවර ක්‍රීඩකයෝ ප්‍රසාද ලකුණු පුවරුවේ තුන්වැනි ස්ථානයේ සිටිති.
මහනුවර - පළමු ඉනිම සියලු දෙනා දැවී 453 යි
(පැතුම් නිස්සංක 202, පවන්ත වීරසිංහ 20, සොහාන් ද ලිවේරා 142, රවිඳු ප්‍රනාන්දු 37, අශියන් ඩැනියෙල් 12, දිනුර කළුපහන 64/2, අකිල ධනංජය 140/5, චමිඳු විජේසිංහ 59/3)
දඹුල්ල - පළමු ඉනිම කඩුලු 4 ට 207 යි
(නිශාන් මධුෂ්ක 31, රොන් චන්ද්‍රගුප්ත 17, ධනංජය ද සිල්වා නොදැවී 81, සහන් කෝසල 34, දසුන් ශානක නොදැවී 34, අශියන් ඩැනියෙල් 62/2)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
