(දමින්ද විජේසූරිය)
අංජල බණ්ඩාර (නොදැවී 84) සහ ජනිත් ලියනගේ (51) දෙදෙනාගේ ධෛර්යවන්ත පිතිහරඹයත්, පසුපෙළ පිතිකරුවන්ගේ සහයෝගයත් මතින් ඉදිරියට ඇදෙන යාපනය පිතිකරුවෝ ගාල්ල ක්‍රීඩාංගණයේදී පැවැත්වෙන එන්.එස්.ඒල්. තරගාවලියට අයත් පළමු පෙළ තරගයේදී සටන්කාමී ගමනක නිරතව සිටිති. තරගයේ දෙවැනි දිනය වූ අද (14 වැනිදා) සවස ක්‍රීඩාව නතර කරන විට යාපනය ක්‍රීඩකයෝ සිය පළමු ඉනිම වෙනුවෙන් කඩුලු 7 ක් දැවී ලකුණු 227 ක් ලබා සිටියහ.
අවිශ්ක ප්‍රනාන්දුගේ (144) ශතකයෙන් සවිමත් වූ කොළඹ පිල සිය පළමු ඉනිම වෙනුවෙන් ලකුණු 386 ක් ලබාගත්තේය. එහෙත් යාපනයට ලැබුණේ අවාසනාවන්ත ආරම්භයකි.
ලකුණු 22 ක් ඇතුළත යාපනය පිලේ ආරම්භක පිතිකරුවන් දෙදෙනාම දැවී ගිය අතර මහත් බලාපොරොත්තු තබා සිටි උපනායක අහන් වික්‍රමසිංහ ලකුණු 09 කට දුවද්දී දැවී ගියේය. නිශාන් පීරිස්ගේ පන්දුවක් හමුවේ රවිඳු රසන්ත ලකුණු 13 කට දැවී යාමත් සමගින් යාපනය පිලේ කඩුලු 4 ක් ලකුණු 41 කට ඇද වැටිණ.
එතැන් සිට එක්වූ ජනිත් ලියනගේ සහ අංජල බණ්ඩාර පසුපෙළ පිතිකරුවන් සමගින් එක්ව ලකුණු සංඛ්‍යාව ඉදිරියට තල්ලු කරගෙන යමින් සිටිති.
කොළඹ - පළමු ඉනිම 386 යි
(නවෝද් පරණවිතාන 39, අවිශ්ක ප්‍රනාන්දු 144, ධනංජය ලක්ෂාන් 23, කවීන් බණ්ඩාර 77, චරිත් අසලංක 51, දුෂාන් හේමන්ත 31, මූවින් අබිනාශ් 93/2, ජෙෆ්රි වැන්ඩසේ 86/6)
යාපනය - පළමු ඉනිම කඩුලු 7 ට 227 යි
(ෂෙවොන් ඩැනියෙල් 13, රවිඳු රසන්ත 13, ජනිත් ලියනගේ 51, අංජල බණ්ඩාර නොදැවී 84, චාමික කරුණාරත්න 29, ජෙෆ්රි වැන්ඩසේ 18, නිශාන් පීරිස් 55/3)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
