(දමින්ද විජේසූරිය)
ලකුණු 50 කට කඩුලු දෙකක් අහිමි කරගත් ගාල්ල කණ්ඩායම, ටෙස්ට් පිතිකරුවන් වන දිනේෂ් චන්දිමාල් (40) සහ ඕෂධ ප්‍රනාන්දු (62) එක්ව කඩුලු 2 කට 141 ක් දක්වා ඉදිරියට ගෙන ගියහ. එහෙත් ලකුණු 169 ක් වෙද්දී ගාල්ල ක්‍රීඩකයන්ගේ කඩුලු 6 ක් බිඳ වැටී තිබිණ.
එවර එක්වූ දුනිත් වෙල්ලාලගේ (නොදැවී 68) සහ රමේෂ් මෙන්ඩිස් (නොදැවී 36) දෙදෙනා හත්වැනි කඩුල්ල වෙනුවෙන් ලකුණු 91 ක අඛණ්ඩ සම්බන්ධතාවක් පවත්වාගෙන යන බැවින් සූරියවැව දී පැවැත්වෙන ජාතික සුපර් ලීග් කුසලාන (පළමු පෙළ) තරගයදී ගාල්ල ක්‍රීඩකයන්ගේ බලාපොරොත්තු දැල්වී තිබේ.
පළමුවෙන් පන්දුවට පහර දුන් යාපනය කණ්ඩායම ලකුණු 305 කට දැවී ගියේය. සිකුරාදා (4 වැනිදා) සන්ධ්‍යාව වන විට ගාල්ල ක්‍රීඩකයෝ තවත් කඩුලු 4 ක් අතැතිව, ලකුණු 45 කින් සිය ප්‍රතිවාදීන් ආසන්නයට පැමිණ සිටිති.
සිව්දින පළමු පෙළ තරගාවලියක් වන මෙම තරගාවලියේ මෙතෙක් තරග පැවැති සති අන්ත තුනේදීම අපරාජිතව සිටින ගාල්ල කණ්ඩායම, තරග දෙකකට පමණක් සහභාගි වෙමින්, ප්‍රසාද ලකුණු පුවරුවේ පෙරමුණ ගෙන සිටී.
ආරම්භක පිතිකරු රවිඳු රසන්ත ලකුණු නොලබා දැවී ගිය නමුත් ෂෙවොන් ඩැනියෙල් (56), තනුක දාබරේ (81) සහ ඇන්ජලෝ මැතිව්ස් ඇතුළු මැද පෙළ පිතිකරුවෝ එක්ව කඩුලු 3 කට 224 ක් දක්වා යාපනය කණ්ඩායම ඉදිරියට ගෙන ගියහ. එහෙත් ඉනිමේ පසු කොටසේදී ක්‍රියාත්මක වූ දිලුම් සුධීර (6045) අගනා පන්දු යැවීමක නිරත වෙමින් යාපනය ඉනිම ලකුණු 305 කට සීමා කළේය.
යාපනය පළමු ඉනිම - සියලු දෙනා දැවී 305 යි
(ෂෙවොන් ඩැනියෙල් 56, තනුක දාබරේ 81, ඇන්ජලෝ මැතිව්ස් 52, ජනිත් ලියනගේ 28, නිරෝෂන් දික්වැල්ල 11, චාමික කරුණාරත්න 35, නිමේෂ් විමුක්ති 16, දිලුම් සුධීර 60/5)
ගාල්ල පළමු ඉනිම - කඩුලු 6 ට 260 යි
(ඕෂධ ප්‍රනාන්දු 62, නිපුන් ධනංජය 14, දිනේෂ් චන්දිමාල් 40, දුනිත් වෙල්ලාලගේ නොදැවී 68, රමේෂ් මෙන්ඩිස් නොදැවී 36, සිතුම් දිසානායක 39/3)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
