(නාමල් පතිරගේ)
පොදු ව්‍යාපාර පිළිබඳ පාර්ලිමේන්තු කාරක සභාව (කෝප් කමිටුව) විසින් හෙට (3 වැනිදා) පස්වරු 2 ට තමන් හමුවේ පෙනී සිටින ලෙස ශ්‍රී ලංකා පාපන්දු සම්මේලනයේ ප්‍රධානීන්ට නියෝග කර තිබේ. ඒ අනුව පාපන්දු සම්මේලනයේ ජුනි 01 වැනිදා පැවති නිලවරණයෙන් පත් වූ එහි විධායක සභාවේ සභාපති ජස්වර් උමාර්, එහි ලේකම් උපාලි හේවගේ යන මහත්වරු ඇතුළු එහි මූල්‍ය හා නීති අංශවල ප්‍රධානීන් හෙට පාර්ලිමේන්තුවේ පොදු ව්‍යාපාර පිළිබඳ කාරක සභා රැස්වීම් ශාලාවේ දී කෝප් කමිටුව හමුවේ පෙනී සිටීමට නියමිතය.
පාපන්දු සම්මේලන නිලධාරීන් සමග ක්‍රීඩා අමාත්‍යාංශයේ ලේකම් අනුරාධ විජේකෝන්, එහි අධ්‍යක්ෂ ජනරාල් අමල් එදිරිසූරිය යන මහත්වරු ඇතුළු ක්‍රීඩා අමාත්‍යාංශයේ නියෝජිතයන් පිරිසක්ද හෙට කෝප් කමිටුව හමුවේ පෙනී සිටීමට නියමිතය.
කෙසේවුවත් මැයි 6 වැනිදා පැවැත්වීමට සූදානම් කර තිබිය දී අත්හිටුවූ කෝප් කමිටු රැස්වීම හමුවේ පෙනී සිටීමට නියම කර සිටි ශ්‍රී ලංකා පාපන්දු සම්මේලනයේ හිටපු කළමනාකරණ මණ්ඩලයේ සභාපති ලෝක පාපන්දු සමුළුවේ හිටපු විධායක සභික මනිලාල් ප්‍රනාන්දු මහතාට මෙන්ම එම කැඳවීම කරන විට ශ්‍රී ලංකා පාපන්දු සම්මේලනයේ සභාපති ධූරය දැරූ අනුර ද සිල්වා මහතා හෙට පැවැත්වෙන රැස්වීමට කැඳවා නැතැයි ද වාර්තා වේ.
ඒ පිළිබඳව ලංකාදීපය කළ විමසුමකදී අනුර ද සිල්වා මහතා පැවසුවේ ඒ සඳහා තමන්ට අවස්ථාව සළසා දෙන ලෙස කෝප් කමිටුවේ සභාපතිවරයාගෙන් කළ ඉල්ලීමකට මෙතෙක් ප්‍රතිචාරයක් ලැබී නැති බවයි.
අනුර ද සිල්වා මහතා මෙසේද පැවසීය. අප්‍රේල් 22 වැනිදා කෝප් කමිටුව කැඳ වූ අවස්ථාවේදී එදිනට මගේ පුතාගේ විවාහ උත්සවය යෙදී තිබුණු නිසා මට වෙනත් දිනයක් ලබාදෙන ලෙස ඉල්ලීමක් කළා. නමුත් කෝප් කමිටුව එදින රැස්වූ අවස්ථාවේ දී පාපන්දු සම්මේලනයේ විධායක සභාව සම්බන්ධයෙන් විකෘති වූ අදහස් පළවුණා. එයින් පාපන්දු සම්මේලනයේ ඒ අවස්ථාවේ සභාපතිවරයා හැටියට කටයුතු කළ මට විශාල හානියක් සිදුවුණා.
එතනදී අපේ පාර්ශ්වයේ නියෝජිතයන් පාපන්දු සම්මේලනය වෙනුවෙන් නිවැරදිව පෙනී සිටීමක් කළේ නෑ. මේ තත්ත්වය නිවැරදිව පැහැදිලි කරලා දෙන්න මට අවස්ථාවක් සළසන්න කියලා මම කෝප් කමිටුවෙන් ඉල්ලීමක් කළා.
අප්‍රේල් 23 වැනිදා කෝප් කමිටුව මාධ්‍ය නිවේදනයක් මගින් ප්‍රකාශ කර සිටියේ අප්‍රේල් 22 එහි දී කැඳවු රැස්වීමට පාපන්දු සම්මේලනයේ සභාපතිවරයා සහභාගී නොවීම නිසා එය අත්හිටුවීමට තීරණය කළ බවයි.
කෝප් කමිටුවේ සභාපති මහාචාර්ය චරිත හේරත් මහතා ප්‍රකාශ කළේ විශාල ලෙස මුදල් ප්‍රතිපාදන ලැබුණත් ශ්‍රී ලංකාවේ පාපන්දු ක්‍රීඩාවේ කඩා වැටීම අතිශයින්ම ඛේදනීය තත්ත්වයක් වන බැවින් සම්මේලනයේ වත්මන් සභාපතිවරයා ඇතුළු හිටපු ප්‍රධානීන් කීප දෙනෙකු ද කෝප් කමිටුව හමුවට කැඳවිය යුතු බවයි.
එදින කෝප් කමිටුවේ සාකච්ඡා වූ කරුණු අතර පාපන්දු සම්මේලනයේ විධායක සභාව පත්කිරීමේ දී එහි සභාපතිවරයාගේ තීරණ අභිබවා යාමට නොහැකි වීම, සම්මේලනයේ නිලවරණය කැඳවීමේ දී මෙහෙයුම් කමිටුව රුපියල් 30 ලක්ෂයකට ආසන්න මුදලක් ගෙවීම් කර තිබීම, ශ්‍රී ලංකාවට ලබා දුන් සුනාමි ආධාර අවභාවිත කර ඇතැයි කියන සිදුවීම, සම්මේලනයේ සිදුව ඇතැයි කියන මූල්‍ය වංචාවන් කීපයක් පිළිබඳ අපරාධ විමර්ශන කොට්ඨාසය අධිකරණයේ නඩු පවරා ඇති අවස්ථාවක එය ඉල්ලා අස්කර ගන්නා ලෙස දක්වමින් පාපන්දු සම්මේලනයේ සභාපතිවරයා අධිකරණයට දිවුරුම් පෙත්සමත් ඉදිරිපත් කර ඇතැයි කියන සිදුවීමක් ඇතුළු කරුණු කීපයක් සම්බන්ධයෙන් එදින රැස්වීම අත්හිටුවන විට සාකච්ඡා වෙමින් තිබුණු බව ඒ පිළිබඳ නිකුත් කර තිබු මාධ්‍ය නිවේදනයේ වැඩිදුරටත් දැක්වුණි.
මේ අතර ලංකාදීපය කළ විමසුමකදී මනිලාල් ප්‍රනාන්දු මහතා පැවසුවේ මැයි 6 වැනිදා කැඳවා තිබිය දී අත්හිටු වූ කෝප් කමිටුවේ රැස්වීමට සහභාගී වීමට තමත් සූදානමින් සිටි බවයි. සුනාමි ආධාර මුදල් අවභාවිත කර ඇතැයි කියන සිදුවිම් සම්බන්ධයෙන් පාපන්දු සම්මේලනයේ හිටපු සභාපතිවරයෙකු වන රංජිත් රුද්‍රිගු මහතා තමන්ට එරෙහිව ඉදිරිපත් කර තිබු චෝදනා සියල්ල සම්බන්ධයෙන් රජයේ නීතිපතිවරයා තමන් නිදොස් කර ඇතැයි ද ඔහු එහි දී පැවසීය.
අප්‍රේල් 22 වැනිදා කෝප් කමිටුවේ කැඳවීම් හමුවේ ශ්‍රී ලංකා පාපන්දු සම්මේලනය වෙනුවෙන් පෙනී සිටි පාර්ශ්වයේ ප්‍රධානියා වූයේ ඒ වන විට එහි ලේකම් ධුරය දැරූ වත්මන් සභාපති ජස්වර් උමාර් මහතාය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
