ජර්මනියේ සදාතනික පාපන්දු වීරයකු වන ගර්ඩ් මුලර් අද (15 වැනිදා) සිය දිවියෙන් සමුගත්තේය. ජර්මනියට පාපන්දු ලෝක කුසලානයක් දිනාදුන් අති දක්ෂ ක්‍රීඩකයන් අතරේ ඉදිරිපෙළ ප්‍රහාරකයකු වූ ගර්ඩ් මුලර් මිය යන විට 75 වැනි වියේ පසුවිය.
එවකට බටහිර ජර්මනිය වූ ජර්මානු කණ්ඩායම වෙනුවෙන් ජාත්‍යන්තර තරග 62 කට ක්‍රීඩා කර ඇති මුලර් එහිදී ගෝල 68 ක් රැස්කර ඇත. 1970 වසරේ පැවැති පාපන්දු ලෝක කුසලාන තරගාවලියේදී ගෝල 10 ක් රැස්කරමින් වැඩිම ගෝල ලාභියා ලෙස 'රන් සපත්තුව' සම්මානයට හිමිකම් කී ඔහු, 1974 වසරේදී පැවැති පාපන්දු ලෝක කුසලාන තරගාවලියේ ශූරතාව බටහිර ජර්මනියට දිනා දීම සඳහා ජයග්‍රාහී ගෝලයද වාර්තා කළේය.
බයර්න් මියුනිච් පාපන්දු සමාජය වෙනුවෙන් තරග 607 කට ක්‍රීඩා කළ මුලර්, එහිදී ගෝල 566 ක් වාර්තා කළ අතර බන්ඩෙස්ලිගා තරගාවලීන්හිදි ඔහු රැස්කළ ගෝල සංඛ්‍යාව 365 කි. ජර්මනියේ ප්‍රධානතම පාපන්දු තරගාවලිය වන බන්ඩෙස්ලීගා තරගාවලියේ
අවස්ථා 7 කදී වැඩිම ගෝල ලාභියා බවට පත්වීමටද ඔහු සමත් විය.
"ගර්ඩ් මුලර් තමයි ලෝක පාපන්දු ක්‍රීඩාවේ මෙතෙක් සිටි ශ්‍රේෂ්ඨතම ප්‍රහාරකයා. ඔහු ඉතාමත් හොඳ පුද්ගලයෙක්. අපි ඔහුගේ බිරිඳ වන උස්චි සහ ඔහුගේ පවුලේ අය සමඟ දැඩි ශෝකයෙන් පසුවෙනවා." යැයි ජර්මන් කණ්ඩායමේ වත්මන් පුහුණුකරු ෆ්ලික් ඩිමාන්ඩ්ස් පැවසීය.
"ගර්ඩ් මුලර් නොමැති නම් අද අපි කවුරුත් ප්‍රිය කරන මේ සමාජයත් නොතිබෙන්න ඉඩ තිබුණා. ඔහුගේ නාමය සහ මතකය සදාකල් පවතීවි. ඔහුගේ මරණය පිළිබඳ පුවත අපි සැවොම කම්පාවට පත් කරන්නක්." යැයි බයර්න් මියුනිච් ක්‍රීඩා සමාජයේ ප්‍රධාන විධායක නිලධාරී ඔලිවර් ඛාන් මහතා සඳහන් කළේය.
බටහිර ජර්මනිය වෙනුවෙන් තරග 62 කදී ඔහු ලබාගත් ගෝල 68 හේතුවෙන් ඔහුට පටබැඳුනු අන්වර්ත නාමය වූයේ ‘බෝම්බකාරයා“ යන්නයි. ප්‍රතිවාදී කණ්ඩායම් කොතෙක් ආරක්ෂක ක්‍රම උපයෝගී කරගත්තත් ඒ සියල්ල අතරින් ගොස් පන්දුව දැළ තුළට යැවීමට ගර්ඩ් මුලර්ට හැකියාව තිබිණ.
ජර්මනිය වෙනුවෙන් අදටත් වැඩිම අන්තර්ජාතික ගෝල වාර්තාවේ හිමිකරුවා වන මිර්සෝව් ක්ලෝස්ට (ගෝල 71) මුලර්ගේ වාර්තාව ලබාගැනීම සඳහා ගර්ඩ් මුලර් ක්‍රීඩාකළ තරග සංඛ්‍යාව මෙන් දෙගුණයකටත් වැඩි තරග සංඛ්‍යාවක් (137) අවශ්‍ය විය. 1971-72 තරගවාරයේදී ලීග් තරග 34 කදී ගෝල 40 ක් ලබාගැනීමට ඔහු සමත් විය. එම වාර්තාව බිඳ වැටුණේ පසුගිය සතියේදී රොබට් ලෙවැන්ඩොස්කි සිය 41 වැනි ගෝලය ලබාගැනීමත් සමගිනි.
බයර්න් මියුනිච් ක්‍රීඩා සමාජය දෙවැනි පෙළ ක්‍රීඩා සමාජයක්ව සිටි 1964 දී මුලර්ව ඊට බඳවා ගන්නා ලදි. එවකට ඔහුට තිබූ පුළුල් පපුව නිසා “බර ඉසිලීමේ ක්‍රීඩකයක් එක්ක මම මොනවා කරන්නද“ යයි පාපන්දු පුහුණුකරුවා කීවේලු.
එහෙත් ඔහුගේ කලවා ඉතා මහත් වූ අතර අතිශයින් ශක්තිමත් ඒවාද විය. ඔහුගේ කලවයක වටප්‍රමාණය සෙන්ටිමීටර 64 ක් විය. එවන් පාද වලින් ඔහු ලබාගත් ගෝල පාපන්දු ඉතිහාස පොතේ ඔහුගේ නම රන් අකුරින් ලියැවීය.
“බයර්න් මියුනිච් පිල අද කිසියම් දෙයක් ලබාගෙන තියෙනවාද, ඒ සියල්ලම ගර්ඩ් මුලර් නිසායි“ යයි මුලර්ගේ සමකාලීන සගයකු මෙන්ම බටහිර ජර්මනියේ ලෝක කුසලාන දිනූ නායකයාද වන ෆ්‍රාන්ස් බෙනක්බවර් පැවසීය.
(ඡායාරූප - ඒ.එෆි.පී. අනුග්‍රහයෙනි)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
