(නාමල් පතිරගේ)
යේමනයට ගෝල 3-0 කින් පරාජයවූ ශ්‍රී ලංකාව ආසියානු සමුළු වයස 23 න් පහළ පාපන්දු සුදුසුකම් තේරීමේ තරග වටයේ සහභිගී වූ තරග තුනෙන්ම පරාජයට පත්විය. මෙම තරග වටය කටාර් රාජ්‍යයේ සත්කාරයෙන් දෝහා නගරයේදී පැවැත්වුණි.
පළමු තරගයෙන් සිරියාව හමුවේ ගෝල 5-0 කින් පරාජය වූ ශ්‍රී ලංකාව දෙවැනි තරගයේදී කටාරය හමුවේ ගෝල 5-0 කින්ද පරාජය විය. ඒ අනුව තරග තුනේදීම ප්‍රතිවාදීන් ශ්‍රී ලංකාවට එරෙහිව ගෝල 13 ක්ම රැස් කර ගෙන තිබුණත් මෙම තරග තුනේදීය එකම ගෝලයක් හෝ ලබාගැනීමට ශ්‍රී ලංකාව අපොහොසත් විය.
යේමනයට එරෙහිව පැවැති තරගයේ පළමු භාගය ගෝල 1-0 ක් ලෙස පෙරමුණ ගනිමින් එය ජයගත් යේමන ක්‍රීඩකයෝ තරගයේ 30 වැනි, 60 වැනි හා 68 වැනි විනාඩි වලදී ගෝල වාර්තා කළහ. ශ්‍රී ලංකා ක්‍රීඩකයන් දෙදෙනෙකු යේමනයට එරෙහිව පැවැති තරගයේදී විනිසුරු වෙතින් දැඩි අවවාද ලබන කහ කාඩ්පත ලැබූහ. ශ්‍රී ලංකා ක්‍රීඩක තස්ලිම් බදුර්දීන් විනිසුරු වෙතින් රතු කාඩ් පත් ලැබීමෙන් පිටියෙන් පිටමන් කෙරුණි.
දෙපිලම ක්‍රීඩකයන් තිදෙනෙකු ආදේශ කරමින් ක්‍රිඩා කළ අතර මෙම තරග වටයේ සමස්ත ප්‍රතිඵලයට අනුව ලබන වසරේදී පැවැත්වෙන ආසියානු සමුළු වයස 23 න් පහළ පාපන්දු තරගාවලියේ අවසන් වටය සඳහා කටාරය සුදුසුකම් ලබාගත්තේය.
ශ්‍රී ලංකා කණ්ඩායමේ ප්‍රධාන පුහුණුකරු ලෙස ජාතික පාපන්දු පිලේ පුහුණුකරුවෙකුද වන මොහොමඩ් අමුනුල්ලා මහතා මෙම තරග සංචාරයේදී කටයුතු කළේය. තවත් සහය පුහුණුවකරුවන් දෙදෙනෙකුගේද සේවයද ශ්‍රී ලංකා කණ්ඩායමට හිමි විය.
තරග සංචාරය නිමවා සංචාරක ශ්‍රී ලංකා වයස 23 න් පහළ පාපන්දු කණ්ඩායම අද (2) දිවයිනට ළඟාවීමට නියමිතය. කටාර් තරග සංචාරයට සහභාගීවූ ක්‍රීඩකයන් 23 දෙනෙකුගෙන් සමන්විත වයස 23 න් පහළ ජාතික සංචිතය වසර 2023 දක්වා අඛන්ඩව පවත්වාගෙන යන බව ශ්‍රී ලංකා පාපන්දු සම්මේලනයේ සභාපති ජස්වර් උමාර් මහතා පවසයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
