බ්‍රෙස්ට් ක්‍රීඩා සමාජයට එරෙහිව අද (21 වැනිදා) පැවැත්වෙන තරගයේදී ලයනල් මෙසී, පැරිස්හි ශාන්ත ජර්මේන් ක්‍රීඩා සමාජය නියෝජනය කරමින් පළමු වරට තරග බිමට පිවිසෙන්නේද යන්න පිළිබඳව තවමත් අවසන් තීරණයක් ගෙන නැතැයි වාර්තා වේ.
හයවරක් ලොව දක්ෂතම පාපන්දු ක්‍රීඩකයා වශයෙන් බැලන් ඩි'ඕර් කුසලානට හිමිකම් කී 34 හැවිරිදි මෙසී, ඉකුත් සතියේදී ස්පාඤ්ඤයේ බාර්සිලෝනා ක්‍රීඩා සමාජයෙන් ඉවත් වීමෙන් අනතුරුව පැරීසියේ ශාන්ත ජර්මේන් ක්‍රීඩා සමාජයට එක්විය.
දකුණු ඇමරිකානු පාපන්දු තරගාවලියේ අවසන් තරගයට ක්‍රීඩා කිරීමෙන් පසුව මේ වෙන තෙක් මෙසී යළිත් තරග බිමට පිවිස නැත. කෙසේ වුවත් ඔහු දිගින් දිගටම ශාන්ත ජර්මේන් කණ්ඩායම සමග පුහුණුවීම්වල නිරතව සිටියි.
"අද තරගයට ක්‍රීඩා කරන කණ්ඩායම අපි තවම තීරණය කරලා නැහැ. මෙසී අද ක්‍රීඩා කරනවා නම් අපිත් හුඟක් කැමතියි." යැයි ශාන්ත ජර්මේන් කණ්ඩායමේ පුහුණුකරු මොරිෂියෝ පොචෙටිනෝ මහතා පැවසීය.
"කණ්ඩායම තුළ සෑම දෙයක්ම ඉතාමත් හොඳින් සිද්ධ වෙනවා. මෙසී ඉතාමත් ඉක්මනින් කණ්ඩායමේ වාතාවරණයට අනුව හැඩ ගැහිලා ඉන්නවා. ඒ නිසා ඔහුට යළිත් තරග බිමට පිවිසෙන්න වැඩි දවසක් යන එකක් නැහැ." යැයිද පොචෙටිනෝ මහතා සඳහන් කළේය.
ජර්මේන් කණ්ඩායමේ ඉදිරිපෙළ ක්‍රීඩකයකු වන කයිලියන් බාපේ කණ්ඩායමෙන් ඉවත්ව රියල් මැඩ්රීඩ් ක්‍රීඩා සමාජය සමග එක්වන බවට පළවන ප්‍රචාර අසත්‍ය බවද එහිදී පොචෙටිනෝ මහතා කියා සිටියේය.
"බාපේ කියන්නේ අපිට ඉන්න දක්ෂතම ක්‍රීඩකයෙක්. ඔහු මේ තරග වාරය පුරා අපේ කණ්ඩායමට ක්‍රිඩා කරාවි. ඔහුගේ ගිවිසු‍ම අවසන් වීමට තවත් වසරක කාලයක් තිබෙනවා. ඒ නිසා අපි හිතන්නේ නෑ එය අවසන් වීමට කළින් ඔහු කණ්ඩායම හැර යාවි කියලා." යැයි පොචෙටිනෝ මහතා පැවසීය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
