(නාමල් පතිරගේ)
පළමු විනාඩියේදීම ගෝලයක් වාර්තා කරමින් ශ්‍රී ලංකාව ගෝල 5 – 0 කට පරාජය කළ සිරියාව කටාර් රාජ්‍යයේදී දැන් පැවැත්වෙන ආසියානු පාපන්දු සමුළු වයස 23 න් පහළ සුදුසුකම් ලැබීමේ තරග වටයේ ‘‘ඒ’’ කාන්ඩයේ ප්‍රසාද ලකුණු සටහනේ පෙරමුණට පත් විය. ඒ ප්‍රසාද ලකුණු තුනක් රැස් කරමිනි.
තරගයේ පළමු භාගයේදීම ගෝල 3–0 කට පෙරමුණ ගත් සිරියාව ඉතා පහසු ජයග්‍රහණයකට යමින් දෙවැනි භාගයේදී තවත් ගෝල දෙකක් සිය ලකුණු පුවරුවට එක් කළේය. 25, 42, 70 හා 85 වැනි විනාඩිවලදී සිරියානුවෝ සෙසු ගෝල වාර්තා කළහ.
මෙහිදී 70 වැනි විනාඩියේදී වාර්තාවූ ගෝලය අත් වැරදීමකින් ශ්‍රී ලංකා ක්‍රීඩක අබ්දුල් බසීක් වෙතින් ශ්‍රී ලංකා දැල තුළට පන්දුව යොමුවීමකි.
තරගාවලියේ සත්කාරකයන් වන කටාර් රාජ්‍යයේදී කෙටි කාලීන නේවාසික පුහුණුවක් හදාරමින් ශ්‍රී ලංකා වයස 23 න් පහළ පාපන්දු කණ්ඩාම මෙම තරග වටයට සහභාගී වී සිටියි.
ශ්‍රී ලංකාව මුහුණදෙන දෙවැනි තරගය සත්කාරක කටාර් රාජ්‍යයට එරෙහිව පැවැත්වීමට නියමිතව ඇත්තේ අද (28 වැනිදාය)
මෙම තරග වටයේ ‘‘ඒ’’ කාණ්ඩය යටතේ පැවැති තවත් තරගයකදී කටාරය ජය වාර්තා කළේ ගෝල 3 – 0 ක් ලෙසිනි.
ශ්‍රී ලංකාවේ මෙම තරග වටයේ සෙසු ප්‍රතිවාදියා වන්නේ යේමනයයි. ශ්‍රී ලංකාව සහ යේමනය අතර එම තරගය ලබන ඉරිදා (31) පැවැත්වීමට නියමිතය. තරග 3 කින් පසුව වැඩිම ප්‍රසාද ලකුණු ලාභියා තරගාවලියේ දෙවැනි වටයට පිවිසේ.
පසුගියදා මාලේ නුවරදී නිමාවට පත්වූ 13 වැනි දකුණු ආසියානු (සාෆ්) පාපන්දු ශූරතා තරගාවලියට සහභාගී වූ ශ්‍රී ලංකා ජාතික පාපන්දු කණ්ඩායමේ ක්‍රීඩා කළ ක්‍රීඩකයෝ 6 දෙනෙක් මෙම තරග සංචාරය ඇතුළත්ව සිටිති.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
