(නාමල් පතිරගේ)
අන්තර්ජාතික පාපන්දු සම්මේලනය අගෝස්තු 12 වැනිදා කළ අලුත්ම ශ්‍රේණිගත කිරීම් අනුව ශ්‍රී ලංකාව තවත් පියවරක් පස්සට යමින් 205 වැනි ස්ථානය දක්වා පහළට වැටී තිබේ.
කටාර් (2022) ලෝක ශූරතා සුදුසුකම් ලැබීමේ තරග වටයේදී ලෙබනනයට හා දකුණු කොරියාවට පරාජය වීම හේතුවෙන් ශ්‍රී ලංකාව 205 වැනි ස්ථානයට ඇදවැටී තිබේ.
පසුගිය ජුනි 5 – 9 යන දිනවල සෝල් නුවරදී පැවැති ලෝක කුසලාන සුදුසුකම් තේරීමේ වටයේ තරගයකදි ශ්‍රී ලංකාව ලෙබනනය හමුවේ ගෝල 3–2කින් පරාජය විය. අනතුරුව දකුණු කොරියාව හමුවේ ගෝල 5–0කින් පරාජය විය.
මේ වසරේ මැයි 27 වැනිදා අන්තර්ජාතික පාපන්දු සම්මේලනය කළ ශ්‍රේණිගත කිරීම් අනුව ශ්‍රී ලංකා පසු වූයේ 204 වැනි ස්ථානයේය. ඒ වනවිට 205 වැනි ස්ථානයේ පසු වූ කැරිබියන් දූපත් රාජ්‍යයක් වන අරුබා රාජ්‍යය අගෝස්තු 12 වැනිදා සිදුකළ ලෝක ශ්‍රේණිගත කිරීම් අනුව 201 වැනි ස්ථානය දක්වා ඉහළට යාමට සමත්ව තිබේ. ඊට ආසන්නතම හේතුව, ලෝක කුසලාන (2022) සුදුසුකම් ලැබීමේ තරග වටයේදී ජුනි 2 වැනිදා පැවැති තරගයකදී අරුබා රාජ්‍යය විසින් සයිමන් දූපත් රාජ්‍යය ගෝල 3–1 කින් පරාජය කරනු ලැබිමයි.
කෙසේ වුවත්, මාස තුනකට ආසන්න කාලයක් තිස්සේ ශ්‍රී ලංකාව ආසියානු ශ්‍රේණිගත කිරීම් අතරේ අවසන් (46 වැනි) ස්ථානයට වැටී තිබේ.
වසර 2015 දී 194 වැනි ස්ථානයේ පසුවූ ශ්‍රී ලංකාව වසර 2017 වනවිට 200 වැනි ස්ථානය දක්වා පසුබැස ගියේය. එය තවදුරටත් තීව්‍ර කරමින් 2019 දී 205 වැනි ස්ථානය දක්වා ගොස් 2020 වසරේදී 206 වැනි ස්ථානයට පත්වීම ශ්‍රී ලංකා පාපන්දු කණ්ඩායම අන්තර්ජාතික ශ්‍රේණිගතකිරීම් අතරේ ලබාගත් දුර්වලම ස්ථානය ලෙස සටහන් විය.
ශ්‍රී ලංකාව, එම තත්ත්වයෙන් මිදුණේ 2021 අප්‍රේල් 7 වැනිදා සිදුකළ ශ්‍රේණිගත කිරීමේදී 204 දක්වා ඉහළට පැමිණීමෙනි. ශ්‍රී ලංකාව ජාත්‍යන්තර තරගවලට සහභාගි නොවූ අවධියක ශ්‍රේණිගත කිරීම්හි ඉදිරියට යාමට ආසන්නතම හේතුව වූයේ, ඒ වනවිට ශ්‍රී ලංකාවට ඉහළින් සිටි රටවල් කිහිපයක් ජාත්‍යන්තර තරගවලදී ලබාගත් පරාජය වීම හේතුවෙනි.
වත්මන් ජාතික පාපන්දු පුහුණුකරුවා වන අමීර් ඇලජික් මහතා ශ්‍රී ලංකාවේ සේවය බාරගත් 2020 පෙබරවාරි මාසයේදී ශ්‍රී ලංකාව ලෝක ශ්‍රේණිගත කිරීම් අනුව පසු වූයේ ද 206 වැනි ස්ථානයේය.
පාකිස්තානය අලුත්ම ශ්‍රේණිගත කිරීම් අනුව ලෝකයේ 198 වැනි තැනත්, ආසියාවේ 44 වැනි තැනේත් පසු වේ. එහෙත් පාකිස්තානය වසර 2019 ජුනි මාසයේ පැවැති ලෝක කුසලාන (2022) ආසියානු කලාප පළමු වටයේ තරග දෙකකට සහභාගිවීමෙන් පසුව මේ වනවිට අන්තර්ජාතික පාපන්දු සම්මේලනයේ රෙගුලාසි උල්ලංඝනය කිරීමේ චෝදනා මත තරග තහනමකට ලක්ව සිටියි.
නවතම ලෝක පාපන්දු ශ්‍රේණිගත කිරීම් අනුව බෙල්ජියම තවදුරටත් අංක එකේ පසුවන අතර, අවසන් වරට පැවැති (2018) ලෝක කුසලාන තරගාවලියේ ශූරතාව දිනාගත් ප්‍රංශය දෙවැනි තැන ද එහිදී අනුශූරතාව ලද ක්‍රොඑෂියාව 14 වැනි ස්ථානයේ ද පසු වේ.
ආසියාවේ අංක එකේ තවදුරටත් පසුවන්නේ ජපානයයි. ඔවුන්ට ලෝකයේ දැන් හිමි තැන 28 වැනි ස්ථානයයි.
පාපන්දු ක්‍රීඩාවේ ඉහළම රටවල් 10
1. බෙල්ජියම
2. බ්‍රසීලය
3. ප්‍රංශය
4. එංගලන්තය
5. ඉතාලිය
6. ආජන්ටිනාව
7. ස්පාඤ්ඤය
8. පෘතුගාලය
9. මෙක්සිකෝව
10. ඇමෙරිකාව.
පාපන්දු ක්‍රීඩාවේ පහළම රටවල් 10
201 - අරුබා
202 - බහමාස්
203 - ගුවාම්
204 - එත්‍රියාව
205 - ශ්‍රී ලංකාව
206 - තුර්කි හා තයිසෝස් දූපත්
207 - එක්සත් ජනපද වර්ජිනියා දූපත්
208 - බ්‍රිතාන්‍ය වර්ජිනියා දූපත්
209 - ශාන්ත මරීනා දූපත්
210 - ඇන්ගෝලාව.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
