(නාමල් පතිරගේ)
රටවල් පහක් පමණක් සහභාගි වන බැවින් ලබන ඔක්තෝබර් 1 වැනිදා ‘මාලේ’ නුවරදී ආරම්භ වන 13 වැනි දකුණු ආසියානු ශූරතා පාපන්දු තරගාවලිය ලීග් තරගාවලියක් ලෙස පැවැත් වේ.
ප්‍රතිවාදීන් පස්දෙනා එකිනෙකා මුණ ගැසෙන ලීග් තරගාවලියෙන් පසුව වැඩිම ප්‍රසාද ලකුණුලාභීන් බවට පත්වන ප්‍රතිවාදීන් දෙදෙනා අතර අවසන් මහ තරගය ඔක්තෝබර් 16 වැනිදා ශ්‍රී ලංකා වේලාවෙන් රාත්‍රී 8.30 ට පැවැත්වීමට නියමිතය. සියලුම තරග ‘මාලේ’ ජාතික පාපන්දු ක්‍රීඩාංගනයේදී පැවැත්වේ.
ප්‍රේක්ෂකයන් 12,000 කට ආසන්න ගණනක් අසුන් ගත හැකි මෙම ක්‍රීඩාංගණයේදී මුළු තරගාවලියම පවත්වා අවසන් කෙරේ. කොවිඩ් අවදානම හේතුවෙන් බංග්ලාදේශය තරගාවලියේ සත්කාරයෙන් ඉවත් වීමෙන් පසුව දකුණු ආසියානු පාපන්දු ශූරතාවලිය ‘මාලේ’ නුවරදී පැවැත්වීමට මාලදිවයින කැමැත්තෙන් ඉදිරිපත් විය. ඒ සඳහා දකුණු ආසියානු පාපන්දු සම්මේලනයේ අවසරය ලැබිණ.
මාලදිවයින ශ්‍රී ලංකාව හා සම සත්කාරයෙන් වසර 2002 තරගාවලිය සංවිධානය කිරීමෙන් පසුව මාලදිවයින එහි සත්කාරය දරන පළමු අවස්ථාව මෙයයි. ශ්‍රී ලංකාව මෙවර තරගාවලියට එක්වෙමින් ඔක්තෝබර් 1 වැනිදා බංග්ලාදේශයට එරෙහිව පළමු තරගයට මුහුණ දෙයි.
මෙම තරගාවලිය ඉලක්ක කරමින් ක්‍රීඩකයන් 23 දෙනකුගෙන් සමන්විත ශ්‍රී ලංකා කණ්ඩායම තෝරා ගැනීම සඳහා ජාතික පාපන්දු සංචිතයේ නේවාසික පුහුණුවීම් ලබන බදාදා (25) සිට පවත්වා ගෙන යාමට ශ්‍රී ලංකා පාපන්දු සම්මේලනය කටයුතු සූදානම් කරගෙන යයි.
ඒ සඳහා කැඳවීම් ලබන ක්‍රීඩකයන් 28 දෙනකු සඳහා වන පී.සී.ආර්. පරීක්ෂණ අද (22 වැනිදා) සිට පැවැත්වීමට කටයුතු කෙරේ. ජෛව බුබුළක් යටතේ ජාතික පාපන්දු සංචිතයේ නේවාසික පුහුණුවීම් ආරම්භ කිරීමට සැළසුම් කර ඇත.
වාර්තා වන පරිදි වත්මන් ජාතික පාපන්දු පුහුණුකරුවා වන, බොස්නියානු ජාතික අමීර් ඇලජික් මහතාගේ අවසන් පැවරුම විය හැක්කේද මෙම තරගාවලියයි. ඇලජික් මහතා මෙම සංචාරයෙන් පසුව ජාතික පුහුණුකරු ධුරයෙන් ඉවත්ව පාපන්දු සම්මේලනයේ තාක්ෂණික අධ්‍යක්ෂවරයා ලෙස තවදුරටත් කටයුතු කරනු ඇත.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
