(නාමල් පතිරගේ)
සහභාගි වන කණ්ඩායම් 10ම එකම ජෛව ආරක්ෂක බුබුළක් යටතට ගනිමින් සුපර්ලීග් පාපන්දු තරගාවලියේ ඉතිරි තරග ලබාන නොවැම්බර් 16 වැනිදා සිට දෙසැම්බර් 22 වැනිදා දක්වා රීඩ් මාවත ක්‍රීඩා සංකීර්ණයේදී පැවැත්වීමට ශ්‍රී ලංකා පාපන්දු සම්මේලනය දැන් සැලසුම් කර තිබේ.
මෙම තරගාවලියේ තරග 30 කින් සමන්විත ඉතිරි තරග වටය පැවැත්වීමට පසුගිය මැයි මාසයේ සිට පාපන්දු සම්මේලනය දරන උත්සාහය කොවිඩ් උවදුර හේතුවෙන් මේ දක්වා සාර්ථක කර ගැනීමට නොහැකි වී තිබේ. එම තත්ත්වය සැළකිල්ලට ගනිමින් පාපන්දු සම්මේලනය නව තීරණයට එළඹ තිබේ.
ශ්‍රී ලංකා ක්‍රිකට් ආයතනය මේ අන්දමට සංවිධානය කරන ලද විස්සයි-20 තරගාවලිය අවධානයට ලක්කරමින් තරගාවලියට සහභාගි වන කණ්ඩායම් එකම හෝටලයක ජෛව ආරක්ෂිත බුබුළක් යටතේ රඳවා ගැනීමටත්, ඒ අනුව සුපර් ලීග් තරගාවලිය පවත්වා අවසන් කිරීමටත් පාපන්දු සම්මේලනයේ සභාපති ජස්ටර් උමාර් මහතා යෝජනා කර තිබේ. ඒ අනුව සුපර්ලීග් තරගාවලියේ සහභාගි වන කණ්ඩායම් 10 ක්‍රීඩකයන් හා සහාය කාර්ය මණ්ඩල නිරන්තර පී.සී.ආර්. හා ඇන්ටිජන් පරීක්ෂාව යටතේ එකම හෝටලයක හෝ
තරගාවලිය අවසන් වනතුරු නතර කර ගැනීමට කටයුතු කෙරේ.
මෙතැන් සිට තරගාවලියට සහභාගි වී සිටින ක්‍රීඩා සමාජ සඳහා ගෙවීම් කිරීම වෙනුවට පාපන්දු සම්මේලනයේ සෘජු මැදිහත්වීමෙන් ක්‍රීඩකයන්ට මාසිකව දීමනාවක් ගෙවීමටද යෝජනා වී තිබේ. එහිදී කණ්ඩායමක පුහුණුකරු හා සහාය පුහුණුකරුටද සම්මේලනයෙන් අර්ධ වැඩුපක් ගෙවනු ලබන අතර ඔවුන්ගේ වැටුපේ ඉතිරිය ක්‍රීඩා සමාජ විසින් දැරිය යුතුය.
ඒ පිළිබඳව පාපන්දු සම්මේලනයේ සභාපති ජස්ටර් උමාර් මහතා මෙසේ පැවසීය.
“‘මෙම ක්‍රමයෙන් පාපන්දු සම්මේලනයට ක්‍රීඩා සමාජ සඳහා කෙළින්ම ගෙවීම් කරනවාට වඩා විශාල වියදමක් යනවා. නමුත් එය වඩාත් ඵලදායි ක්‍රමයක් ලෙස පෙනෙන නිසා අපි එය තරගාවලියේ මෙතැන් සිට ක්‍රියාත්මක කරන්න කැමැත්තෙන් ඉන්නවා.“
අන්තර් ජාතික පාපන්දු සම්මේලනයේ මූල්‍ය ආධාරයෙන් පළමු වතාවට ක්‍රියාත්මක සුපර් ලීග් පාපන්දු තරගාවලියේ තරග 14 ක් දැනට පවත්වා තිබේ.
ඩිෆෙන්ඩර්ස් (යුද හමුදාව) හා නාවලපිටිය අප්කන්ට්‍රි යන කණ්ඩායම් දෙක අතර තරගය රීඩ් මාවත ක්‍රීඩා සංකීර්ණයේදී පැවැත්වීමට සූදානම් කර තිබියදී දෙපිලේම ක්‍රීඩකයන් පිරිසක් කොවිඩ් ආසාදිතයන් ලෙස හඳුනා ගැනීමෙන් එම තරගය අත්හිටුවන ලදි. මෙම අත්හිටවූ තරගය පසුගිය 11 වැනිදා නැවත පැවැත්වීමට ගත් උත්සාහය ද අසාර්ථක විය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
