යූරෝ 2020 පාපන්දු තරගාවලියේ අවසන් 16 දෙනාගේ වටය ආරම්භ කරමින් ඩෙන්මාර්කයට එරෙහිව වේල්සය හෙට (26 වැනිදා) නෙදර්ලන්තයේ ඇම්ස්ටර්ඩෑම්හි ජොහාන් කරූෆ් ක්‍රීඩාංගණයේදී තරග බිමට පිවිසීමට නියමිතය. මෙම තරගයෙන් ජයගන්නා කණ්ඩායම තරගාවලියේ අර්ධ අවසන් පූර්ව වටයට සුදුසුකම් ලබාගන්නා පළමු කණ්ඩායම බවට පත්වනු ඇත.
මූලික වටයේ තරග අවසානයේ ‘ඒ’ කාණ්ඩයේ දෙවැනි ස්ථානය හිමිකර ගැනීමට වේල්සය සමත් වූ අතර ඩෙන්මාර්කය ‘බී’ කාණ්ඩයේ දෙවැනි ස්ථානයට පත් විය. ඩෙන්මාර්කය මේ වන විට ලෝක පාපන්දු ශ්‍රේණිගත කිරීම්හි 10 වැනි ස්ථානයේ පසුවන අතර වේල්සය එහි 17 වැනි ස්ථානයේ රැදී සිටියි.
2018 වසරේ නොවැම්බර් මාසයේදී ගෝල 2-1 කින් වේල්සය පරාජය කිරීමට ඩෙන්මාර්කය සමත් වීමෙන් පසු මෙම කණ්ඩායම් දෙක එකිනෙකාට එරෙහිව තරග වදින පළමු අවස්ථාව මෙයයි. මින් පෙර ඔවුන් එකිනෙකාට එරෙහිව තරගවැදී ඇති අවසන් අවස්ථාවන් 10 දී ඩෙන්මාර්කය 6 වරක්ද, වේල්සය සිවුවරක්ද ජය ලබා ඇත.
මෙම තරගයෙන් පසුව ඉතාලියට එරෙහිව ඔස්ට්‍රියාවද, නෙදර්ලන්තයට එරෙහිව චෙක් ජනරජයද හෙට (27 වැනිදා) තරග බිමට පිවිසෙන අතර බෙල්ජියමට එරෙහිව පෘතුගාලයද, ක්‍රොයේෂියාවට එරෙහිව ස්පාඤ්ඤයද අනිද්දා (28 වැනිදා) තරග වැදීමට නියමිතය.
මේ මස 29 වැනිදා පැවැත්වෙන තරගවලදී ප්‍රංශයට එරෙහිව ස්විට්සර්ලන්තයද, එංගලන්තයට එරෙහිව ජර්මනියද තරග වදින අතර 30 වැනිදා පැවැත්වෙන 16 දෙනාගේ වටයේ අවසන් තරගයේදී ස්වීඩනයට එරෙහිව යුක්රේනය තරග බිමට පිවිසෙනු ඇත.
එම තරග අතරන් බෙල්ජියම් - පෘතුගාල තරගය සහ එංගලන්ත - ජර්මනි තරගය කෙරෙහි වැඩි දෙනාගේ අවධානය යොමුවී ඇත. ඊට හේතුවී ඇත්තේ එම කණ්ඩායම් 4 ම ලෝක ලෝක පාපන්දු ශ්‍රේණිගත කිරීම්හි පළමු කණ්ඩායම් 12 අතර රැදී සිටින කණ්ඩායම් වීමය.
මේ වන විට බෙල්ජියම ශ්‍රේණිගත කිරීම්හි පෙරමුණේ පසුවන අතර එංගලන්තය එහි සිවුවැනි ස්ථානයේද, පෘතුගාලය 5 වැනි ස්ථානයේද, ජර්මනිය 12 වැනි ස්ථානයේද රැදී සිටිති. ඔවුන්ට අමතරව ප්‍රංශය (2), ඉතාලිය (7) සහ ඩෙන්මාර්කයද (10) ශ්‍රේණිගත කිරීම්හි මුල් 12 දෙනා අතර සිටින කණ්ඩායම් වෙති.
ඔස්ට්‍රියාව (23), යුක්රේනය (24) සහ චෙක් ජනරජය (40) හැරුණු කොට තරගාවලියේ අවසන් 16 දෙනා අතරට සුදුසුකම් ලබා සිටින සෙසු කණ්ඩායම් 13 ම ලෝක පාපන්දු ශ්‍රේණිගත කිරීම්හි මුල් කණ්ඩායම් 20 තුළ රැදී සිටින කණ්ඩායම් විම නිසා පිළිමළුන් පිටුදැකීමේ තරගවලදී වැඩි තරගකාරීත්වයක් බලාපොරොත්තු විය හැකිය.
අවසන් 16 දෙනාගේ වටයේ තරග
26 වැනිදා - වේල්සයට (17) එරෙහිව ඩෙන්මාර්කය (10)
27 වැනිදා - ඉතාලියට (7) එරෙහිව ඕස්‍ට්‍රියාව (23)
27 වැනිදා - නෙදර්ලන්තයට (16) එරෙහිව චෙක් ජනරජය (40)
28 වැනිදා - බෙල්ජියමට (1) එරෙහිව පෘතුගාලය (5)
28 වැනිදා - ක්‍රොයේෂියාවට (14) එරෙහිව ස්පාඤ්ඤය (6)
29 වැනිදා - ප්‍රංශයට (2) එරෙහිව ස්විට්සර්ලන්තය (13)
29 වැනිදා - එංගලන්තයට (4) එරෙහිව ජර්මනිය (12)
30 වැනිදා - ස්වීඩනයට (18) එරෙහිව යුක්රේනය (24)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
