මෙම වසරේ (2022) නොවැම්බර් මස 21 වැනිදා සිට දෙසැම්බර් මස 18 වැනිදා දක්වා රටවල් 32 ක සහභාගීත්වයෙන් කටාර් රාජ්‍යයේදී පැවැත්වෙන ලෝක කුසලාන පාපන්දු තරගාවලියට සුදුසුකම් ලබාගන්නා අවසන් කණ්ඩායම් 3 අතරට එක්වීම සඳහා රටවල් 8 ක් එළබෙන ජූනි මාසයේදී තරග වැදීමට නියමිතය.
යුරේපීය කළාපයේ පළමු සුදුසුකම් ලැබීමේ වටය අවසානයේ කණ්ඩායම් 10 ක් ලෝක කුසාලන තරගාවලිය සඳහා වරම් හිමිකරගත් අතර එහි දෙවැනි වටය යටතේ තවත් කණ්ඩායම් 3 කට ඊට සුඳුසුකම් ලබාගැනීම සඳහා අවස්ථාව හිමිවිය. එහිදී උතුරු මෙසඩෝනියාව පරාජය කරමින් පෘතුගාලයත්, ස්වීඩනය පරාජය කරමින් පෝලන්තයත් ඉකුත් 29 වැනිදා ලෝස කුසලාන තරගාවලියට සුදුසුකම් ලබාගත්හ.
යුරේපීය කළාපයෙන් ලෝක කුසලාන තරගාවලිය සඳහා සුදුසුකම් ලබාගන්නා අවසන් කණ්ඩායම තෝරා ගැනීමේ තරගයට වේල්සය දැනටමත් සුදුසුකම් ලබා සිටියි. කාඩිෆ්හිදී පැවැත්වීමට නියමිත එම තරගයේදී වේල්සයේ ප්‍රතිවාදීන් බවට පත්වීම සඳහා ස්කොට්ලන්තය සහ යුක්රේනය ජූනි මාසයේ ග්ලස්ගොව්හිදී තරග වැදීමට නියමිතය.
ලෝක කුසලාන තරගාවලියට සුදුසුකම් ලබන සෙසු කණ්ඩායම් දෙක තෝරා ගැනීම සඳහා අන්තර් කළාපීය පිළිමළුන් පිටුදැකීමේ තරග වටයක් පැවැත්වෙන අතර ඒ සඳහා කළාප 4 කින් කණ්ඩායම් 4 ක් සහභාගී වීමට නියමිතය. දකුණු ඇමරිකානු කලාපයෙන් පේරු රාජ්‍යයත්, ‘උතරු, මධ්‍යම ඇමරිකානු සහ කැරිබියන්’ කලාපයෙන් කොස්ටාරිකාවත්, ශාන්තිකර කලාපයෙන් නවසීලන්තයත් මේ වන විට පිළිමළුන් පිටුදැකීමේ තරග වටයට ඇතුළත්ව සිටිති.
කෙසේ වුවත් ආසියානු කලාපයෙන් පිළිමළුන් පිටුදැකීමේ තරග වටයට ඇතුළත් වන කණ්ඩායම තවමත් තෝරාගෙන නොමැත. ජූනි මස 7 වැනිදා එක්සත් අරාබි එමීර් රාජ්‍යය සහ ඕස්ටේ්‍රලියාව අතර පැවැත්වෙන තරගයේ ජයග්‍රාහකයන් ආසියානු කලාපය නියෝජනය කරමින් එම තරග වටයට ඇතුළත් වනු ඇත.
අන්තර් කළාපීය පිළිමළුන් පිටුදැකීමේ තරග වටයේදී තරග 2 ක් පැවැත්වෙන අතර එහිදී පේරු රාජ්‍යයට එරෙහිව එක්සත් අරාබි එමීර් රාජ්‍යය හෝ ඕස්ටේ්‍රලියාවත්, නවසීලන්තයට එරෙහිව කොස්ටාරිකාවත්, තරග බිමට පිවිසීමට නියමිතය. ජූනි මස 13 වැනිදා හෝ 14 වැනිදා පැවැත්වෙන එම තරග දෙකේ ජයග්‍රාහකයන් මෙවර පාපන්දු ලෝක කුසාලන තරගාවලියට සුදුසුකම් ලබාගන්නා අවසන් කණ්ඩායම් දෙක බවට පත්වනු ඇත.
සත්කාරක කටාර් රාජ්‍යය සමගින් රටවල් 29 ක් මේ වන විටත් ලෝක කුසලාන තරගාවලිය සඳහා සුදුසුකම් ලබා සිටිති. ජර්මනිය, ඩෙන්මාර්කය, බ්‍රසීලය, ප්‍රංශය, බෙල්ජියම, ක්‍රොයේෂියාව, ස්පාඤ්ඤය, සර්බියාව, එංගලන්තය, ස්විට්සර්ලන්තය, නෙදර්ලන්තය සහ ආර්ජන්ටිනාව යන රටවල් ඉකුත් වසර (2021) අවසන් වන විටත් ඊට සුදුසුකම් ලබා සිටියහ.
ඉරානය මෙම වසරේ (2022) ජනවාරි මාසයේදීද, දකුණ කොරියාව පෙබරවාරි මාසයේදීද ලෝක කුසලානයට සුදුසුකම් ලැබූ අතර ජපානය, සවුදි අරාබිය, ඉක්වදෝරය, උරුගුවේ, කැනඩාව, ගහනාව, සෙනගලය, පෘතුගාලය, පෝලන්තය, ටියුනීසියාව, මොරොක්කෝව, කැමරූනය, ඇමරිකාව සහ මෙක්සිකෝව ඊට සුදුසුකම් ලැබුවේ මාර්තු මාසයේදීය.
මෙවර ලෝක කුසලාන පාපන්දු තරගාවලිය සඳහා කළාප 6 ක් යටතේ සුදුසුකම් ලැබීමේ තරගාවලි පැවැත්විණ. ඒ අනුව යූරෝපීය කලාපයෙන් කණ්ඩායම් 13 ක්ද, ආසියානු කලාපයෙන් සහ දකුණු ඇමරිකානු කලාපයෙන් රටවල් 10 ක්ද, අප්‍රිකානු කලාපයෙන් කණ්ඩායම් 5 ක්ද, ‘උතරු, මධ්‍යම ඇමරිකානු සහ කැරිබියන්’ කලාපයෙන් සහ ශාන්තිකර කලාපයෙන් කණ්ඩායම් 4 ක්ද මෙවර ලෝක කුසාලන තරගාවලියට සහභාගිවීමට නියමිතය.
(සැකසුම - ශානුක අරවින්ද)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
