මෙම වසරේ (2022) නොවැම්බර් මස 21 වැනිදා සිට දෙසැම්බර් මස 18 වැනිදා දක්වා රටවල් 32 ක සහභාගීත්වයෙන් කටාර් රාජ්‍යයේදී පැවැත්වෙන ලෝක කුසලාන පාපන්දු තරගාවලියට සුදුසුකම් ලබාගන්නා අවසන් කණ්ඩායම් 3 අතරට එක්වීම සඳහා රටවල් 8 ක් ලබන ජූනි මාසයේදී තරග වැදීමට සූදානමින් සිටිති.
යුරෝපීය කලාපයේ පළමු සුදුසුකම් ලැබීමේ වටය අවසානයේ කණ්ඩායම් 10 ක් ලෝක කුසලාන තරගාවලිය සඳහා වරම් හිමිකරගත් අතර එහි දෙවැනි වටය යටතේ තවත් කණ්ඩායම් 3 කට ඊට සුඳුසුකම් ලබාගැනීම සඳහා අවස්ථාව හිමිවිය. එහිදී උතුරු මෙසිඩෝනියාව පරාජය කරමින් පෘතුගාලයත්, ස්වීඩනය පරාජය කරමින් පෝලන්තයත් ඉකුත් 29 වැනිදා ලෝක කුසලාන තරගාවලියට සුදුසුකම් ලබාගත්හ.
යුරෝපීය කලාපයෙන් ලෝක කුසලාන තරගාවලිය සඳහා සුදුසුකම් ලබාගන්නා අවසන් කණ්ඩායම තෝරා ගැනීමේ තරගයට වේල්සය දැනටමත් සුදුසුකම් ලබා සිටියි. ලබන ජූලි මාසයේදී එංගලන්තයේ කාඩිෆ් නුවරදී පැවැත්වීමට නියමිත එම තරගයේදී වේල්සයේ ප්‍රතිවාදීන් වන්නේ ස්කොට්ලන්තය හෝ යුක්රේනයයි. රුසියාව විසින් යුක්රේනය ආක්‍රමණය කිරීම හේතුවෙන් ස්කොට්ලන්තය සහ යුක්රේනය අතර සුදුසුකම් ලබාගැනීමේ තරගය ජූනි මාසය දක්වා කල්දමන ලදි. මෙම තරගය ස්කොට්ලන්තයේ ග්ලාස්ගොව්හිදී පැවැත්වීමට නියමිතය.
ලෝක කුසලාන තරගාවලියට සුදුසුකම් ලබන සෙසු කණ්ඩායම් දෙක තෝරා ගැනීම සඳහා අන්තර් කළාපීය පිළිමළුන් පිටුදැකීමේ තරග වටයක් පැවැත්වේ. ඒ සඳහා කලාප 4 කින් කණ්ඩායම් 4 ක් සහභාගී වීමට නියමිතය.
දකුණු ඇමරිකානු කලාපයෙන් පේරු රාජ්‍යයත්, ‘උතුරු, මධ්‍යම ඇමරිකානු සහ කැරිබියන්’ කලාපයෙන් කොස්ටාරිකාවත්, ශාන්තිකර කලාපයෙන් නවසීලන්තයත් මේ වන විට පිළිමළුන් පිටුදැකීමේ තරග වටයට ඇතුළත්ව සිටිති.
කෙසේ වුවත් ආසියානු කලාපයෙන් පිළිමළුන් පිටුදැකීමේ තරග වටයට ඇතුළත් වන කණ්ඩායම තවමත් තෝරාගෙන නොමැත. ජූනි මස 7 වැනිදා එක්සත් අරාබි එමීර් රාජ්‍යය සහ ඕස්ටේ්‍රලියාව අතර පැවැත්වෙන තරගයේ ජයග්‍රාහකයන් ආසියානු කලාපය නියෝජනය කරමින් එම තරග වටයට ඇතුළත් වනු ඇත.
අන්තර් කළාපීය පිළිමළුන් පිටුදැකීමේ තරග වටයේදී තරග 2 ක් පැවැත්වෙන අතර එහිදී පේරු රාජ්‍යයට එරෙහිව එක්සත් අරාබි එමීර් රාජ්‍යය හෝ ඕස්ටේ්‍රලියාවත්, නවසීලන්තයට එරෙහිව කොස්ටාරිකාවත්, තරග බිමට පිවිසීමට නියමිතය. ජූනි මස 13 වැනිදා හෝ 14 වැනිදා පැවැත්වෙන එම තරග දෙකේ ජයග්‍රාහකයන් 2022 පාපන්දු ලෝක කුසාලන තරගාවලියට සුදුසුකම් ලබාගන්නා අවසන් කණ්ඩායම් දෙක බවට පත්වනු ඇත.
සත්කාරක කටාර් රාජ්‍යය සමගින් රටවල් 29 ක් මේ වන විටත් ලෝක කුසලාන තරගාවලිය සඳහා සුදුසුකම් ලබා සිටිති. ජර්මනිය, ඩෙන්මාර්කය, බ්‍රසීලය, ප්‍රංශය, බෙල්ජියම, ක්‍රොඒෂියාව, ස්පාඤ්ඤය, සර්බියාව, එංගලන්තය, ස්විට්සර්ලන්තය, නෙදර්ලන්තය සහ ආර්ජන්ටිනාව යන රටවල් ඉකුත් වසර (2021) අවසන් වන විටත් ඊට සුදුසුකම් ලබා සිටියහ.
ඉරානය මෙම වසරේ (2022) ජනවාරි මාසයේදීද, දකුණ කොරියාව පෙබරවාරි මාසයේදීද ලෝක කුසලාන තරගාවලියට සුදුසුකම් ලබාගත්හ. ජපානය, සෞදි අරාබිය, ඉක්වදෝරය, උරුගුවේ, කැනඩාව, ඝනාව, සෙනගලය, පෘතුගාලය, පෝලන්තය, ටියුනීසියාව, මොරොක්කෝව, කැමරූනය, ඇමරිකාව සහ මෙක්සිකෝව ඊට සුදුසුකම් ලැබුවේ මාර්තු මාසයේදීය.
මෙවර ලෝක කුසලාන පාපන්දු තරගාවලිය සඳහා කළාප 6 ක් යටතේ සුදුසුකම් ලැබීමේ තරගාවලි පැවැත්විණ. ඒ අනුව යූරෝපීය කලාපයෙන් කණ්ඩායම් 13 ක්ද, ආසියානු කලාපයෙන් සහ දකුණු ඇමරිකානු කලාපයෙන් රටවල් 10 ක්ද, අප්‍රිකානු කලාපයෙන් කණ්ඩායම් 5 ක්ද, ‘උතරු, මධ්‍යම ඇමරිකානු සහ කැරිබියන්’ කලාපයෙන් සහ ශාන්තිකර කලාපයෙන් කණ්ඩායම් 4 ක්ද මෙවර ලෝක කුසාලන තරගාවලියට සහභාගිවීමට නියමිතය.
කණ්ඩායම් 32 ක සහභාගිත්වයෙන් පාපන්දු ලෝක කුසලන තරගාවලිය අවසන් වරට පැවැත්වෙන වතාව මෙයයි. වසර 2026 දී පැවැත්වීමට නියමිත මීළඟ පාපන්දු ලෝක කුසලාන තරගාවලිය සඳහා කණ්ඩායම් 48 ක් සුදුසුකම් ලබාගනු ඇත.
(සැකසුම - ශානුක අරවින්ද)
Beckham Saturday, 02 April 2022 03:57 PM
වේල්සය, ඕස්ට්‍රේලියාව සහ නවසීලන්තය
Reply 0 0
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
