දකුණු ඇමරිකානු පාපන්දු තරගාවලියේ දෙවැනි සතිය අවසන් වන විට තවදුරටත් ‘ඒ’ කාණ්ඩයේ පෙරමුණ රැක ගැනීමට ආර්ජන්ටිනාවත්, ‘බී’ කාණ්ඩයේ පෙරමුණ රැක ගැනීමට සත්කාරක බ්‍රසීලයත් සමත්ව සිටියි. මේ වන විට තරගාවලියේ මූලික වටයේ තරග 16 ක් අවසන් වී ඇති අතර තවත් තරග 4 ක් ඉදිරි දින 2 තුළ පැවැත්වීමට නියමිතය.
එහිදී ‘බී’ කාණ්ඩය යටතේ බ්‍රසීලට එරෙහිව ඉක්වදෝරයත්, වෙනිසියුලාවට එරෙහිව පේරු රාජ්‍යයත් හෙට (28 වැනිදා) තරග බිමට පිවිසෙන අතර උරුගුවේට එරෙහිව පැරගුවේද, ආර්ජන්ටිනාවට එරෙහිව බොලීවියාවද අනිද්දා (29 වැනිදා) තරග වදිනු ඇත.
එම තරග 4 න් පසුව මූලික වටය අවසන් වන අතර ‘ඒ’ සහ ‘බී’ කාණ්ඩ දෙකේ මුල් ස්ථාන 4 හිමිකරගන්නා කණ්ඩායම් 8 අර්ධ අවසන් පූර්ව වටයට සුදුසුකම් ලබාගනු ඇත. එතැන් පටන් තරගාවලිය පිළිමළුන් පිටුදැකීමේ ක්‍රමයට අනුව පැවැත්වේ.
තරගාවලියේ අර්ධ අවසන් පූර්ව තරග ජූලි මස 3 සහ 4 යන දිනවලදීද, අවසන් පූර්ව තරග ජූලි මස 6 සහ 7 යන දිනවලදීද පැවැත්වෙන අතර තෙවැනි ස්ථානය තේරීමේ තරගය ජූලි මස 10 වැනිදාද, අවසන් මහ තරගය ජූලි මස 11 වැනිදාද පැවැත්වීමට නියමිතය.
මෙතෙක් සහභාගි වූ තරග තුනේදී ජයග්‍රහණ 2 ක් අත්කර ගනිමින් සෙසු තරගය ජය පැරදුමෙන් තොරව අවසන් කරගත් අර්ජන්ටිනාව, මේ වන විට ලකුණු 7 ක් ලබා සිටියි. එහිදී උරුගුවේට එරෙහිව ගෝල 1-0 ක ජයක් සහ පැරගුවේට එරෙහිව ගෝල 1-0 ක ජයක් වාර්තා කළ ආර්ජන්ටිනාව, චිලී රාජ්‍යය සමග ගෝල 1-1 ක් ලෙස සම විය.
මේ දක්වා තරග 3 කට සහභාගි වූ බ්‍රසීලය එම තරග 3 ම ජයගනිමින් ලකුණු 8 ක් ලබා අපරාජිතව සිටියි. එහිදී වෙනිසියුලාවට එරෙහිව ගෝල 3-0 ක් ලෙසද, පේරු රාජ්‍යයට එරෙහිව ගෝල 4-0 ක් ලෙසද, කොලොම්බියාවට එරෙහිව ගෝල 2-1 ක් ලෙසද ජය වාර්තා කිරීමට බ්‍රසීලය සමත් විය.
මේ වන විට තරග 2 ක් ජය ගෙන, එක් තරගයක් පරාජය වී සිටින පැරගුවේ කණ්ඩායම (ලකුණු 6) ‘ඒ’ කාණ්ඩයේ දෙවැනි ස්ථානයේද, එක් තරගයක් ජයගෙන, තරග 2 ක් පරාජය වී, තවත් තරගයක් ජය පැරදුමෙන් තොරව අවසන් කරගෙන සිටින කොලොම්බියාව (ලකුණු 4) ‘බී’ කාණ්ඩයේ දෙවැනි ස්ථානයේද පසුවේ.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
