බ්‍රසීලයේදී පැවැත්වෙන දකුණු ඇමරිකානු පාපන්දු තරගාවලියේ අද (22 වැනිදා) පැවැති ‘ඒ’ කාණ්ඩයේ තරගයකදී පැරගුවේට එරෙහිව ගෝල 1-0 ක ජයක් වාර්තා කිරීමට ආර්ජන්ටිනාව සමත් විය. එම ජයත් සමග තවදුරටත් ‘ඒ’ කාණ්ඩයේ පෙරමුණ රැක ගැනීමට ආර්ජන්ටිනාවට හැකි වූ අතර මේ දක්වා තරග 3 කට සහභාගි වී ඇති ඔවුහු, ඉන් තරග 2 ක් ජයගෙන සෙසු තරගය ජය පැරදුමෙන් තොරව අවසන් කරගෙන සිටිති.
තරගයේ 10 වැනි විනාඩියේදී ඇලජන්ඩෝ ඩැරියෝ, ආර්ජන්ටිනාව වෙනුවෙන් ජයග්‍රාහී ගෝලය ලබාගත් අතර ඉන් අනතුරුව ගෝල ලබාගැනීමට දෙපිලේම ක්‍රීඩකයන් අසමත් වීම හේතුවෙන් ආර්ජන්ටිනාවට ගෝල 1-0 ක ජයක් හිමිවිය. මෙම තරගයේදී පැරගුවේ ක්‍රීඩකයන් දෙදෙනකු සහ ආර්ජන්ටිනා ක්‍රීඩකයකු කහ පැහැති කාඩ්පත් ලැබූහ.
මෙම තරගයේදී පරාජයට පත්වුවද තවදුරටත් ‘ඒ’ කාණ්ඩයේ තෙවැනි ස්ථානයේ රැදී සිටීමට මේ දක්වා තරගයක් ජයගෙන තරගයක් පරාජය වී සිටින පැරගුවේ කණ්ඩායමට අවස්ථාව උදාවිය. ඊට‍හේතු වූයේ චිලී රාජ්‍යය සහ උරුගුවේ අතර අද පැවැති ‘එ්’ කාණ්ඩයේ සෙසු තරගය ගෝල 1-1 ක් ලෙස ජය පැරදුමකින් තොරව නිමාවට පත්වීමය.
එම තරගයේ 26 වැනි විනාඩියේදී ගෝලයක් ලබාගත් එඩ්වාඩෝ වර්ගස්, පළමු අර්ධය නිමාවන විට ගෝල -0 ක් ලෙස චිලී රාජ්‍යය පෙරමුණට ගෙන ආවේය. කෙසේ වුවත් 66 වැනි විනාඩියේදී චිලී කණ්ඩායමේ ආටූරෝ විඩාල් අත්වැරදීමකින් තම කණ්ඩායමේ දැල තුළටම පන්දුව යොමු කිරීම හේතුවෙන් උරුගුවේ කණ්ඩායමට ගෝලයක් හිමිවිය.
මේ වන විට තරග 3 කට සහභාගි වී ඇති චිලී රාජ්‍යය ඉන් එක් තරගයක් ජයගෙන සෙසු තරග 2 ජය පැරදුමෙන් තොරව අවසන් කරගෙන ‘එ්’ කාණ්ඩයේ දෙවැනි ස්ථානයේ රැදී සිටියි. මේ දක්වා තරග 2 කට සහභාගි වී ඇති උරුගුවේ කණ්ඩායම ‘ඒ’ කාණ්ඩයේ සිවුවැනි ස්ථානයේ රැදී සිටින්නේ එක් තරගයක් පරාජයට පත්වී සෙසු තරගය ජය පැරදුමෙන් තොරව අවසන් කරගනිමිනි.
අනිද්දා (24 වැනිදා) තරගාවලියේ ‘බී’ කාණ්ඩය යටතේ බ්‍රසීලයට එරෙහිව කොලොම්බියාවද, ඉක්වදෝරයට එරෙහිව පේරු රාජ්‍යයද තරග වදින අතර එළ‍ඹෙන සිකුරාදා (25 වැනිදා) ‘එ’ කාණ්ඩය යටතේ බොලීවියාවට එරෙහිව උරුගුවේද, චිලී රාජ්‍යයට එරෙහිව පැරගුවේද තරග බිමට පිවිසීමට සූදානමින් සිටිති.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
