අවසන් 16 දෙනාගේ වටයේදී ඕස්ට්‍රියාවට එරෙහිව සෙනසුරාදා පැවැති තරගය ගෝල 2-1 ක් ලෙස ජයගත් ඉතාලිය, යූරෝ 2020 තරගාවලියේ අර්ධ අවසන් පූර්ව වටයට සුදුසුකම් ලබාගත්තේය. තරගයේ නියමිත කාලය අවසන් වන විට දෙපිලම ගෝල ලබා නොසිටීම හේතුවෙන් ජයග්‍රාහකයන් තෝරා ගැනීම සඳහා අතිරේක කාලයක් ලබාදුන් අතර එහිදී ගෝල 2 ක් ලබාගැනීමට ඉතාලිය සමත් වෙද්දී, ඔස්ට්‍රියාවට ලබාගත හැකි වූයේ එක් ගෝලයක් පමණි.
ඉඩෝරයකට වැස්සක් වැටෙන්නාක් මෙන් තරගයේ 95 වැනි විනාඩියේදී ලියනාඩෝ ස්පිනසෝලාගේ සහයෝගයෙන් ගෝලයක් ලබාගත් ෆෙඩරිකෝ චීසා, දැඩි නිහැඬියාවකින් පසුව ගෝල 1-0 ක් ලෙස ඉතාලිය පෙරමු‍ණට ගෙන අ‍ාවේය. ඉන් අනතුරුව ක්‍රියාත්මක වූ මැටියෝ පෙසිනා තරගයේ 105 වැනි විනාඩියේදී ෆ්‍රැන්චෙස්කෝ ඇසර්බිගේ සහයෝගයෙන් දෙවැනි ගෝලය ලබාගනිමන් ඉතාලිය තවත් ඉහළට ඔසවා තැබීය.
තරගයේ 114 වැනි විනාඩියේදී ලුවිස් ෂාබ්ගේ දක්ෂ පන්දු යොමු කිරීමක් ඔස්සේ තමා වෙත පැමිණි පන්දුව හිසෙන් දැල තුළට යොමුකිරීමට සාසා කලාඩ්සික් සමත් වුවද, ඔස්ට්‍රියාව පරාජයෙන් මුදවාගැනීමට එය ප්‍රමාණවත් නොවීය. ඒ අනුව අතිරේක කාලය නිමාවට පත්වන විට ගෝල 2-1 ක් ලෙස ඉදිරියෙන් සිටි ඉතාලිය, සිය ප්‍රතිවාදීන් වූ ඔස්ට්‍රියාව තරගාවලියෙන් ඉවතට ඇද දමමින් අර්ධ අවසන් පූර්ව වටයට සුදුසුකම් ලැබුවේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
