ඉතාලියේ ක්රීඩා සමාජයක් වන ජුවෙන්ටස් ක්රීඩා සමාජයට ක්රීඩා කරන පෘතුගාල ජාතික ක්රිස්ටියානෝ රොනාල්ඩෝ නැවතත් එංගලන්තයට ගෙන්වා ගැනීම සඳහා වත්මන් ප්‍රීමියර් ලීග් ශූරයන් වන එංගලන්තයේ මැන්චෙස්ටර් සිටි ක්රීඩා සමාජය දැරූ උත්සාහය අසාර්ථක වී ඇතැයි වාර්තා වේ. මේ අතර අද සවස ලැබුණු අලුත්ම වාර්තාවලින් කියැවෙන්නේ රොනාල්ඩෝ බඳවාගැනීමට මැන්චෙස්ටර් යුනයිටඩ් ක‍ණ්ඩායම සූදානම් වන බවයි.
රොනාල්ඩෝ මැන්චෙස්ටර් සිටි ක්රීඩා සමාජය සමග එක් නොවනු ඇතැයි එම ක්රීඩා සමාජය අද (27 වැනිදා) නිවේදනයක් නිකුත් කරමින් කියා සිටියේය. මැන්චෙස්ටර් සිටි පිලේ උනන්දුව ඉවත යද්දී සිය පැරණි ක්රීඩා සමාජය වන මැන්චෙස්ටර් යුනයිටඩ් පිල සමග එක්වීමට තමන් සූදානම් බව රොනාල්ඩෝ ඔහුගේ කළමණාකරුවා වන ජෝර්ජ් මෙන්ඩස්ට පවසා තිබේ.
මැන්චෙස්ටර් යුනයිටඩ් පිල වෙනුවෙන් වසර 6 ක් ක්රීඩා කළ රොනාල්ඩෝ, වසර 2009 දී ස්පාඤ්ඤයේ රියල් මැඩ්රිඩ් පිලට එක්වූයේ පවුම් මිලියන 80 ක හුවමාරු ගිවිසුමක් අනුවය.
එංගලන්තයේම තවත් ක්රීඩා සමාජයක් වන මැන්චෙස්ටර් යුනයිටඩ් ක්රීඩා සමාජය නියෝජනය කරමින් තරග 292 කට ක්රීඩා කළ රොනාල්ඩෝ, එහිදී ගෝල 118 ක් ලබාගත් අතර 2009 වසරේදී එම ක්රීඩා සමාජයෙන් ඉවත් වූ ඔහු රියල් මැඩ්රිඩ් ක්රීඩා සමාජය සමග එක් විය. එහිදී ඔහු ගතකල කාලය ඔහුගේ ස්වර්ණමය යුගය ලෙස හැඳින්විය හැකි අතර රියල් මැඩ්රිඩ් ක්රීඩා සමාජය නියෝජනය කරමින් පිටියට පිවිසි තරග 438 කදී ගෝල 450 ක් වාර්තා කිරීමට ඔහු සමත් වීම ඊට හේතුව ලෙස සඳහන් කළ හැකිය.
2018 වසරේදී ජුවෙන්ටස් ක්රීඩා සමාජය සමග එක්වූ ක්රිස්ටියානෝ රොනාල්ඩෝ, පිට පිට වසර 3 කදී (2018, 2019 සහ 2020) සෙරී ඒ ශූරතාව සිය ක්රීඩා සමාජයට දිනා දීමට අනගි මෙහෙවරක් ඉටු කළේය. කෙසේ වුවත් මෙවර (2021) සෙරී ඒ ශූරතාවලියේ අවසන් පූර්ව වටයේදී පරාජයට පත්වීම හේතුවෙන් ජුවෙන්ටස් ක්රීඩා සමාජය පිට පිටම 9 වැනි වරටත් එහි ශූරතාව දිනාගැනීමට තිබූ අවස්ථාව අහිමි විය.
මේ දක්වා අවස්ථා 36 කදී සෙරී ඒ ශූරතාවට හිමිකම් කියා ඇති ජුවෙන්ටස් ක්රීඩා සමාජය 2012 වසරේ සිට 2020 වසර දක්වා නොකඩවාම එම ශූරතාව තමන් සතුකර ගෙන තිබිණ. සෙරී ඒ ශූරතාවලිය ආරම්භ වූයේ 1898 වසරේදී වුවත්, ජුවෙන්ටස් ක්රීඩා සමාජය පළමු වරට එහි ශූරතාවට හිමිකම් කීවේ ඉන් වසර 33 කට පසු එනම් 1931 දීය.
36 හැවිරිදි රොනාල්ඩෝ, මෙම වසරේ (2021) සෙරී ඒ ශූරතාවලිය නිමාවන තෙක් තමන් සමග රැදී සිටිනු ඇතැයි ජුවෙන්ටස් ක්රීඩා සමාජය නිවේදනය කළේය. එහෙත් ජුවෙන්ටස් ක්රීඩා සමාජයෙන් ඉවත්වීමට රොනාල්ඩෝ තීරණය කර ඇතැයි ඉතාලි මාධ්‍ය වාර්තා කළේය.
ඉතාලියේ ස්කයි ස්පෝර්ට් නාලිකාව ඉකුත්දා වාර්තා කළේ රොනාල්ඩෝ, මේ වන විටත් ජුවෙන්ටස් ක්රීඩා සමාජයේ ක්‍රීඩක විවේකාගාරය තුළ ඔහුට වෙන්කර තිබූ ලාච්චුව පවා අස්කරගෙන ගොස් හමාර බවය. එමෙන්ම මෙම සති අන්තයේදී එම්පොලි ක්රීඩා සමාජයට එරෙහිව පැවැත්වෙන තරගයට ජුවෙන්ට්ස් පිල වෙනුවෙන් ක්රීඩා කිරීම ඔහු මැලිවන බවද එම නාලිකාව වාර්තා කළේය.
කෙසේ වුවත් ක්රීඩා සමාජ අතර මාරුවීම සඳහා ක්‍රීඩකයන්ට ලබාදී ඇති කාලය ලබන අඟහරුවාදායින් අවසන් වන බැවින් වෙනත් ක්රීඩා සමාජයක් සමග ගිවිසුම්ගත වීම සඳහා රොනාල්ඩෝට ඇත්තේ තවත් දින කිහිපයක් පමණි.
එංගලන්ත නායක හැරි කේන් මැන්චෙස්ටර් සිටි පිල හැර යෑමෙන් අනතුරුව පස් වරක් ලොව දක්ෂතම පාපන්දු ක්‍රීඩකයා ලෙස බැලන් ඩි’ඕර් සම්මානයට හිමිකම් කියා ඇති පෘතුගාල නායක රොනාල්ඩෝ සමග පුළුල් සම්බන්ධතාවක් පැවැත්වීමට මැන්චෙස්ටර් සිටි ක්රීඩා සමාජය කටයුතු කළේය.
ජුවෙන්ටස් ක්රීඩා සමාජය සහ රොනාල්ඩෝ අතර පවතින ගිවිසුම් කාලය අවසන් වීමට තවත් වසරක් ඉතිරිව ඇති නමුත් මේ වන විට ඔහු මැන්චෙස්ටර් සිටි ක්රීඩා සමාජයට අමතරව ප්‍රංශයේ ශාන්ත ජර්මේන් ක්රීඩා සමාජය සහ ස්පාඤ්ඤයේ රියල් මැඩ්රිඩ් ක්රීඩා සමාජය සමගද සාකච්ඡා සම්බන්ධතා පවත්වමින් සිටින බවද වාර්තා වේ. බාර්සිලෝනා පිල වෙනුවෙන් ක්රීඩා කරමින් සිටි ලයනල් මෙසී තමන් වෙත ගෙන්වා ගැනීමට ප්‍රංශයේ ශාන්ත ජර්මේන් (පී.එස්.ජී.) ක්රීඩා සමාජය පසුගියදා සමත් විය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
