චෙක් ජනරජයට එරෙහිව පැවැති මූලික වටයේ අවසන් තරගයේදී ගෝල 1-0 ක ජයක් වාර්තා කළ එංගලන්තය ‘ඩී’ කාණ්ඩයේ පළමු ස්ථානය දිනාගත් කණ්ඩායම ලෙසින් අවසන් 16 දෙනාගේ වටයට සුදුසුකම් ලබාගත්තේය. බුකායෝ සාකාගේ සහ ජැක් ග්‍රීලිෂ්ගේ සහයෝගයෙන් තරගයේ 12 වැනි විනාඩියේදී එංගලන්තය වෙනුවෙන් ජයග්‍රාහී ගෝලය ලබාගැනීමට රහීම් ස්ටර්ලින් සමත් විය.
මෙම තරගයේදී එංගලන්තය වෙනුවෙන් ජයග්‍රාහී ගෝලය ලබාගත් රහීම් ස්ටර්ලින්, මෙවර තරග‍ාවලියේදී ලබාගත් දෙවැනි ගෝලය එය වූ අතර මින් පෙර ක්‍රොයේෂියාව පරාජය කිරීම සඳහා එංගලන්තය වෙනුවෙන් ජයග්‍රාහී ගෝලය ලබාගත්තේද ඔහුය. ඒ අනුව මූලික වටයේදී එංගලන්තය වෙනුවෙන් වාර්තා වූ ගෝල දෙකේම හිමිකරුවා වන්නේ ස්ටර්ලින්ය.
කෙසේ වුවත් එංගලන්තයේ ඉදිරි ගමන තරමක් කටුක එකකි. අවසන් 16 දෙනාගේ වටයේදී ප්‍රංශය, පෘතුගාලය හෝ ජර්මනිය යන ප්‍රබල රටවල් අතරන් එකකට එරෙහිව ඔවුන්ට තරග වැදීමට සිදුවීම ඊට හේතුව ලෙස දැක්විය හැකිය. එංගලන්තය මේ වන විට ලෝක පාපන්දු ශ්‍රේණිගත කිරීම් අතරේ 4 වැනි ස්ථානයේ පසුවන අතර ප්‍රංශය එහි 2 වැනි ස්ථානයේද, පෘතුගාලය 5 වැනි ස්ථානයේද, ජර්මනිය 12 වැනි ස්ථානයේද රැදී සිටියි.
මෙම තරගයට පෙර ‘ඩී’ කාණ්ඩයේ දෙවැනි ස්ථානයේ පසුවූ එංගලන්තය, මෙම තරගයේදී ලැබූ ජයත් සමග එම කාණ්ඩයේ පෙරමුණට පැමිණියේය. මින් පෙර පැවැති මූලික වටයේ තරගයකදී ගෝල 1-0 ක් ලෙස ක්‍රොයේෂියාව පරාජය කළ එංගලන්තය, ඉන් අනතුරුව ස්කොට්ලන්තයට එරෙහිව පැවැති තරගය ගෝල 0-0 ක් ලෙස ජය පැරදුමෙන් තොරව අවසන් කරගත්තේය.
මෙම තරගයේදී එංගලන්තය හමුවේ පරාජයට පත්වුවද අවසන් 16 දෙනාගේ වටයට සුදුසකම් ලබාගැනීම සඳහා චෙක් ජනරජයට තවමත් අවස්ථාව පවතින නමුත් ඒ සඳහා ඔවුන්ට මූලික වටයේ සෙසු තරග අවසන් වන තෙක් බලා සිටීමට සිදුවනු ඇත. මූලික වටයේදී ස්කොට්ලන්තයට එරෙහිව ගෝල 2-0 ක ජයක් වාර්තා කළ චෙක් ජනරජය, ක්‍රොයේෂියාවට එරෙහිව පැවැති තරගය ගෝල 1-1 ක් ලෙස ජය පැරදුමෙන් තොරව අවසන් කළේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
