යූරෝ 2020 පාපන්දු තරගාවලියට සහභාගිවී සිටින ක්‍රොයේෂියානු කණ්ඩායමේ ජ්‍යෙෂ්ඨතම ක්‍රීඩක අයිවන් පෙරිසික්ට කොවිඩ්-19 වයිරසය ආසාදනය වී ඇතැයි තරග සංවිධායකයෝ තහවුරු කරති. ඒ අනුව ඔහුට අවසන් 16 දෙනාගේ වටයයේ ස්පාඤ්ඤයට එරෙහිව හෙට (28 වැනිද) පැවැත්වෙන තරගයට සහභාගි වීමේ අවස්ථාව අහිමිවනු ඇත.
ඉතාලියේ ඉන්ටර් මිලාන් පාපන්දු කණ්ඩායමේද ඉදිරි පෙළ ක්‍රීඩකයකු ලෙස කටයුතු කරන පෙරිසික් මේ වන විට දින 10 ක ස්වයං නිරෝධායන කාල සීමාවකටය යටත්ව සිටින බව ක්‍රොයේෂියානු පාපන්දු සම්මේලනය නිවේදනය කරයි.
ඉකුත් 22 වැනිදා ස්කොට්ලන්තයට එරෙහිව ‘ඩී’ කාණ්ඩය යටතේ පැවැති මූලික වටයේ තීරණාත්මක තරගයේදී ක්‍රොයේෂියාව ජයග්‍රහණය කරා මෙහෙයවීමට වැඩි දායකත්වයක් දැක්වූ පෙරිසික්, එහිදී ගෝලයක් ලබාගනිමින් තවත් ගෝලයක් ලබාගැනීම සඳහා සහයෝගය දැක්වීය. ක්‍රොයේෂියාවට අවසන් 16 දෙනාගේ වටයට පිසිවීම සඳහා එම ජයග්‍රහණය මනා රැකුලක් වූ බවත්, ස්පාඤ්ඤයට එරෙහිව පැවැත්වෙන තරගයේදී කිසිසේත්ම ඔහුගේ අඩුව පිරවිය නොහැකි බව කණ්ඩායමේ කලමණාකාරීත්ව පවසයි.
පෙරිසික්ට කොවිඩ්-19 වයිරසය ආසාදනය වී ඇති බවට තහවුරු වුවද, ක්‍රොයේෂියානු කණ්ඩායමේ සෙසු ක්‍රීඩකයන් සහ කාර්යය මණ්ඩලයේ සාමාජිකයන් කිසිවකුට වයිරසය ආසාදනය වී නොමැති බව පරීක්ෂණවලින් අනාවරණය වී තිබේ.
මේ වන විට ක්‍රොයේෂියාව නියෝජනය කරමින් ජාත්‍යන්තර තරග 104 කට ක්‍රීඩා කර ඇති පෙරිසික්, එදා මෙදා තුර පාපන්දු ඉතිහාසයේ ක්රොයේෂියා කණ්ඩායම නියෝජනය කර ඇති දක්ෂතම ක්‍රීඩකයන්ගේ ලැයිස්තුවටද ඇතුළත්ව සිටියි.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
