(නාමල් පතිරගේ)
කටාර් ලෝක කුසලාන පාපන්දු තරගාවලියේ ආසියානු කලාපයේ දෙවැනි වටයේ ඉතිරි තරග දෙකට සහභාගි වන ශ්‍රී ලංකා පාපන්දු කණ්ඩායම හෙට (31) රාත්‍රියේදී දිවයිනෙන් පිටත්ව යෑමට නියමිතය. හෙට රාත්‍රී 8.00 ට කටුනායක ගුවන් තොටුපළෙන් ගමන් ආරම්භ කරන ශ්‍රී ලංකා පාපන්දු කණ්ඩායම ජපානය හරහා දකුණු කොරියාවේ සෝල් නුවරට ළඟාවීමට නියමිතය.
සුජාන් පෙරේරාගේ නායකත්වයෙන් යුත් ක්‍රීඩකයන් 22 දෙනකුගෙන් සමන්විත ශ්‍රී ලංකා කණ්ඩායමට පුහුණුකරුවෝ හා සහාය නිලධාරීහු 11 දෙනකු ඇතුළත්ව සිටිති. ශ්‍රී ලංකා කණ්ඩායමේ නිත්‍ය දැල්පන්දු රකින්නා ද වන සුජාන් පෙරේරා, නාවලපිටිය අප්කන්ට්‍රි ලයන්ස් ක්‍රීඩා සමාජ කණ්ඩායමේද නායකයායි.
ලෝක කුසලාන ආසියානු කලාප සුදුසුකම් ලබාගැනීමේ තරග වටයේ ශ්‍රී ලංකාව මෙතෙක් සහභාගි වූ සියලු තරගවලින් පරාජයට පත්ව සිටී. එබැවින් ලෝක කුසලාන සුදුසුකම් තෙවැනි වටයට පිවිසීමට මේ වනවිටත් ඔවුන්ට කිසිදු ඉඩක් ඉතිරි වී නැත. කෙසේ වෙතත් ඉතා ප්‍රබල ප්‍රතිවාදීන් දෙදෙනකු මුණගැසීමට සිදුවන නිසා ජයග්‍රහණය පසෙක තබා ආරක්ෂක උපායමාර්ග සෙවීමට හැකි සෑම වෙරක්ම දරන බව පාපන්දු කණ්ඩායමේ ආරංචි මාර්ග වලින් දැනගන්නට තිබේ.
ශ්‍රී ලංකාව ජුනි 5 වැනිදා ශ්‍රී ලංකා වේලාවෙන් පෙරවරු 11.30 ට ලෙබනනයට එරෙහිව තරග වදී. ජුනි 9 වැනිදා ශ්‍රී ලංකා වේලාවෙන් පස්වරු 4.30 ට දකුණු කොරියාවට එරෙහිව තරග වදී.
මීට පෙර පැවැති තරග වලදී ශ්‍රී ලංකා කණ්ඩායම දකුණු කොරියාව හමුවේ ගෝල 8-0 කින් පරාජය වූ අතර ලෙබනනය හමුවේ ගෝල 3-0 කින් පරාජය වී තිබේ. මෙම තරග වටයේදී ශ්‍රී ලංකාවට ප්‍රතිවාදීන්ගෙන් එල්ලවන පීඩනය වැඩිවී ඇත්තේ ලෙබනනය මෙන්ම දකුණු කොරියාවද ‘එඩ“ කාණ්ඩයේ ශූරයන් වෙමින් ලෝක කුසලාන මීළඟ තරග වටයට පිවිසීමට දරන වෙර බැවිනි.
ශ්‍රී ලංකාව මුහුණ දී සිටින වඩාත්ම අනතුරුදායක තත්ත්වය වන්නේ ලෙබනනය මෙන්ම දකුණු කොරියාවද වැඩිම ගෝල පරතරයකින් ජය ලබා ප්‍රසාද ලකුණු සටහනේ වැඩිම වාසිදායක තත්ත්වයක් උදාකර ගැනීමට දරන උත්සාහයක් නිසාය.
‘එච්’ කාණ්ඩයේ වැඩිම ප්‍රසාද ලකුණු ගණනක් (9 ක්) ලබා පෙරමුණේ පසුවූයේ ඒ වනවිට තරග තුනක් ජයගෙන සිටි තුර්ක්මෙනිස්තානයයි. දකුණු කොරියාව හා ලෙබනනය ඒ වනවිට ප්‍රසාද ලකුණු 8 බැගින් සමව ලබා කාණ්ඩයේ දෙවැනි හා තෙවැනි ස්ථානයේ පසුවිය.
‘එච්’ කාණ්ඩයේ ප්‍රතිවාදීන්ගේ ගණන හතරකට අඩු වූයේ එහි රැඳී සිටි උතුරු කොරියාව ඉකුත්දා තරගයෙන් ඉවත්වන බව ප්‍රකාශ කිරීම හේතුවෙනි.
මෙම සංචාරය ශ්‍රී ලංකාවේ ජාතික පාපන්දු පුහුණුකරු අමීර් ඇලජික් මහතා පෞද්ගලිකව මුහුණ දෙන දැඩි අභියෝගයක් බවටද පත්ව තිබේ. මන්දයත් වසර 2020 පෙබරවාරි මාසයේ සිට ශ්‍රී ලංකාවේ සේවය බාරගත් බොස්නියානු ජාතිකයා, ශ්‍රී ලංකාව අන්තර්ජාතික පාපන්දු තරගයකදී මෙහෙයවන පළමු අවස්ථාව මෙය බැවිනි. ඔහු තවත් අසීරුතාවට පත්වන සිදුවීම වන්නේ ශ්‍රී ලංකාව මෙම තරගයට පිවිසෙන්නේ ලෝක පාපන්දු ශ්‍රේණිගත කිරීම අනුව 204 වැනි ස්ථානයේත්, ආසියානු ශ්‍රේණිගත කිරීම අනුව අන්තිමයාත් වී සිටින තත්ත්වයක් තුළය.
මෙම තරග වටයේදී මෙතෙක් පැවැති තරගවලදී සියලුම ප්‍රතිවාදීන් ශ්‍රී ලංකාවට එරෙහිව ගෝල 10 ක් ලබාගත්හ. එහෙත් ශ්‍රී ලංකා කණ්ඩායමට එකම ගෝලයක් හෝ වාර්තා කිරීමට නොහැකි විය.
ප්‍රේක්ෂකයන් 41,311කට අසුන් ගත හැකි සෝල් නුවර ‘හොයෑන්ග්’ ක්‍රීඩාංගනයේදී තරග දෙකම පැවැත්වේ. 2019 ඔක්තෝබර් 10 වැනිදා දෙරට අතර පළමු තරගය ‘හැවසෙඔන්ග්’ ක්‍රීඩාංගනයේදී පවත්වා ඇත්තේ ප්‍රේක්ෂකයන් 23,522 ක සහභාගීත්වයෙනි. එහෙත් මෙවර තරගය ගෝලීය කොවිඩ් වසංගත තත්ත්වය මත ප්‍රේක්ෂකයින්ට විවෘත නොකරන බව ද වාර්තා වේ.
ශ්‍රී ලංකා කණ්ඩායමේ ගෝල රකින්නන්ගේ පුහුණුකරු ද බොස්නියානු ජාතිකයකු වන අතර ඔහු අමීර් ඩොක්සකල්ටික් මහතායි. කවිඳු ඉෂාන් හා වසිම් රසික් යන දෙදෙනාම කණ්ඩායමේ උප නායකයෝ ලෙස කටයුතු කරති.
සංචාරක ශ්‍රී ලංකා පාපන්දු සංචිතය:-
සුජාන් පෙරේරා (නායක), ප්‍රභාත් රුවන් අරුණසිරි, ආර්.පී. ධනුෂ්ක, හර්ෂ ප්‍රනාන්දු, රොෂාන් අප්පුහාමි, චමෝද් ඩිල්ෂාන්, චරිත බණ්ඩාර, ඩුක්ෂන් ෆස්ලස්, චතුරංග මධුෂාන්, මර්වින් හැමිල්ටන්, චලන චමීර, ජූඩ් සුපුන්, මොහොමඩ් මුස්ටාක්, මොහොමඩ් ෆසාල්, ඩිලෝන්ග් සෙනන් ද සිල්වා, කවිඳු ඉෂාන්, අහමඩ් වසීම් රහීක්, මොහොමඩ් අකීබ්, අයිතූර් රහුමාන්, මොහොමඩ් හස්මීර්, සුපුන් ධනංජය, රිෆ්කාන් මොහොමඩ්.
නිලධාරීහු - ප්‍රධාන පුහුණුකරු අමීර් ඇලජික්, කළමනාකරු අසීෆ් අන්සර්, සහය පුහුණුකරු (ගෝල් රකින්නන්ගේ අංශය) අමීර් ඩොක්සකල්ටික්, වෛද්‍ය නිලධාරී - එම්.ආර්.එෆ්. ජයසූරිය, මාධ්‍ය නිලධාරී - මධුවන්ත බණ්ඩාර, තාක්ෂණික නිලධාරී - ඊසා ඉබ්‍රහීම්, ශාරීරික යෝග්‍යතා පුහුණුකරු - අෂාන් චතුරංග ගම්ලත්, දත්ත විශ්ලේෂක – සංඛ ජයමිණ, භෞත චිකිත්සක – අබ්දුල් බසීක්, සම්බාහක – ප්‍රීතික ජීවන කල්දේරා, ගමන් මළු භාර සේවක – රොෂාන් ප්‍රදීප් යන මහත්වරු.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
