අවසන් 16 දෙනාගේ වටයේදී වේල්ස්යට එරෙහිව සෙනසුරාදා පැවැති තරගයෙන් ගෝල 4-0 ක ජයක් වාර්තා කළ ඩෙන්මාර්කය, කල්‍ වේලා ඇතිවම යූරෝ 2020 පාපන්දු තරගාවලියේ අර්ධ අවසන් පූර්ව වටයේ ස්ථානයක් වෙන්කරවා ගත්තේය. මෙම තරගයේදී ලැබූ ජයත් සමග මේ දක්වා වේල්සයට එරෙහිව තරග වැදුණ අවස්ථා 11 න් 7 කදීම ජය වාර්තා කිරීමට ඩෙන්මාර්කය සමත්ව සිටියි.
මූලික වටයේ තරග අවසානයේ ‘ඒ’ කාණ්ඩයේ දෙවැනි ස්ථානය හිමිකර ගැනීමින් වේල්සය අවසන් 16 දෙනාගේ වටයට පිවිසියේය. ඩෙන්මාර්කය ඊට සුදුසුකම් ලබාගත්තේ ‘බී’ කාණ්ඩයේ දෙවැනි ස්ථානයට පත් වෙමිනි. මෙම තරගයට පෙර ඩෙන්මාර්කය ලෝක පාපන්දු ශ්‍රේණිගත කිරීම්හි 10 වැනි ස්ථානයේද, වේල්සය එහි 17 වැනි ස්ථානයේ පසුවූහ.
තරගයේ 27 වැනි විනාඩියේදී මිකිල් ඩෑම්ස්ගාඩ්ගෙන් පන්දුව ලබාගත් කැස්පර් ඩොල්බර්ග් පළමු අර්ධය නිමාවන විට ගෝල 1-0 ක් ලෙස ඩෙන්මාර්කයට පෙරමුණට ගෙන ගියේය. ඉන් නොනැවතුන ඔහු දෙවැනි අර්ධය ආරම්භ වී විනාඩි 3 ක් ගතවන විට (48 වැනි විනාඩියේදී) තවත් ගෝලයක් ලබාගනිමින් සිය කණ්ඩායම ගෝල 2-0 ක් ලෙස ඉදිරියට ගෙන ආවේය.
තරගය නිමාවීමට විනාඩි 2 ක් තිබියදී එනම් 88 වැනි විනාඩියේදී මතායස් ජෙන්සන්ගේ සහයෝගයෙන් ගෝලයක් ලබාගත් ජෝකිම් මහේල්‍ ගෝල 3-0 ක් ලෙස ප්‍රතිවාදී කණ්ඩායම තවත් පීඩනයට පත්කළේය. එහි ප්‍රතිඵලයක් ලෙස 90 වැනි විනාඩියේදී මහේල්ට බාධා කරමින් නීති විරෝධී අයුරින් හැසිරීම නිසා වේල්සයේ අතිරේක ක්‍රීඩක හැරි විල්සන්ට රතු පැහැති කාඩ්පත පෙන්වා ඔහුව පිටියෙන් ඉවත් කිරීමට විනිසුරුවරයා පියවර ගත්තේය.
ඩෙන්මාර්කයේ සටන්කාමී ක්‍රීඩා විලාසය එතැනින් නතර නොවූ අතර තරගයේ අතිරේක කාලයේදී (94 වැනි විනාඩියේදී) ඇන්ඩ්‍රියාස් කොර්නේලියස්ගේ සහයෝගයෙන් ගෝලයක් ලබාගත් මාටින් බ්‍රැත්වේට් සිය කණ්ඩායමට ගෝල 4-0 ක ජයක් අත්කර දුන්නේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
