මෙවර යූරෝ 2020 පාපන්දු තරගාවලියේ මූලික වටය යටතේ ක්‍රීඩා කළ මුල් තරග දෙකේදී බෙල්ජියම සහ ෆින්ලන්තය හමුවේ පරාජයට පත්වූ ඩෙන්මාර්කය, ඊයේ (21 වැනිදා) පැවැති මූලික වටයේ අවසන් තරගයේදී රුසියාවට එරෙහිව ගෝල 4-1 ක ජයක් වාර්තා කරමින් අවසන් 16 දෙනාගේ වටයට සුදුසුකම් ලබාගැනීමට සමත් විය.
මෙම තරගයට පෙර ‘බී’ කාණ්ඩයේ සිවුවැනි ස්ථානයේ පසුවූ ඩෙන්මාර්කය, මෙම තරගයේදී ලැබූ ජයත් සමග එම කාණ්ඩයේ දෙවැනි ස්ථානය හිමිකරගනිමින් අවසන් 16 දෙනාගේ වටයට පිවිසියේය. අවසන් 16 දෙනාගේ වටයේදී ඩෙන්මාර්කය ‘ඒ’ කාණ්ඩයේ දෙවැනි ස්ථානයට පත් වූ වේල්සයට එරෙහිව මේ මස 26 වැනිදා තරග වැදීමට නියමිතය.
තරගයේ 38 වැනි විනාඩියේදී මිකෙල් ඩම්ස්ගාඩ් ලබාගත් ගෝලයත් සමග පළමු අර්ධය නිමාවන විට ගෝල 1-0 ක් ලෙස පෙරමුණ ගැනීමට ඩෙන්මාර්කය සමත් විය. දෙවැනි අර්ධය ආරම්භ වී විනාඩි 14 ක් ගතවන විට (59 වැනි විනාඩියේදී) ඩෙන්මාර්කය වෙනුවෙන් දෙවැනි ගෝලය ලබාගත් යූසෆ් පෝල්සන් ගෝල 2-0 ක් ලෙස පරතරය වැඩි කළේය.
තරගයේ 70 වැනි විනාඩියේදී දඬුවම් පහරක් සාර්ථක කරගනිමින් රුසියාව වෙනුවෙන් වාර්තා වූ එකම ගෝලය ලබාගැනීමට ආටෙම් ඩිසුබා සමත් විය. එහෙත් ඉන් අනතරුව 79 වැනි සහ 82 වැනි විනාඩිවලදී ඩෙන්මාර්කය වෙනුවෙන් තවත් ගෝල 2 ක් ලබාගත් ඇන්ඩ්‍රියාස් ක්‍රිස්ටෙන්සන් සහ ජෝකීම් මහෙල් සිය කණ්ඩායමට ගෝල 4-1 ක ජයක් අත්කර දීම සඳහා දායක වූහ.
මෙම තරගයේදී ලැබූ පරාජයත් සමග රුසියාවට අවසන් 16 දෙනාගේ වටයට සුදුසුකම් නොලබාම මෙවර යූරෝ පාපන්දු තරගාවලියෙන් ඉවත් වීමට සිදුවිය. මෙවර තරගාවලියේ මූලික වටයේ සෙසු තරගය දෙකේදී ගෝල 1-0 ක් ලෙස ෆින්ලන්තය පරාජය කළ රුසියාව, ගෝල 3-0 ක් ලෙස බෙල්ජියම හමුවේ පරාජයට පත් විය.
ෆින්ලන්තයට එරෙහිව පැවැති මූලික වටයේ තරගය අතරතුර හෘදයාබාධයක් හේතුවෙන් ක්‍රීඩාංගණය මත සිහිසුන්ව ඇද වැටී රෝහල් ගත කළ ඩෙන්මාර්ක කණ්ඩායමේ ඉදිරිපෙළ ක්‍රීඩක ක්‍රිස්ටියන් එරික්සන් මේ වන විට සුවය ලබා රෝහලෙන් පිටත්ව ගොස් ඇත.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
