තරගයක් පරාජය වීමෙන් පසුව විනිසුරුට බැණ වැදීමේ ප්‍රතිපත්තියක් තමා තුළ නොමැති බවත්, ජස්වර් උමාර් මහතාට ලැබී ඇති වසරක කාලය තුළ ඔහු කියූ පාපන්දු වෙනස ඇති කර පෙන්විය යුතු බවත් ශ්‍රී ලංකා පාපන්දු සම්මේලනයේ ඊයේ (30) පැවැති නිලවරණයට තරග වැදී පරාජයට පත්වූ සභාපති ධුර අපේක්ෂක වෛද්‍ය මනිල් ප්‍රනාන්දු මහතා පැවැසීය.
සමහර ලීග් නියෝජිතයන් පොරොන්දු වූ පරිදි තමාට ඡන්ද නොදීමත් සිය ඡන්ද සටන පරාජය වීමට හේතුවක් ලෙස පෙනෙන නමුත් තමන් පැරැදුණේ ඡන්ද හයක අඩුවකින් පමණක් බැවින් පාපන්දු පරිපාලනයේ තවදුරටත් රැඳී සිටීම ගැන තමන්ට ඡන්දය දුන් ලීග 30ක පමණ නියෝජිතයන් මුණගැසී ඉදිරියේදී සාකච්ඡා කරන බවත් ඔහු පැවැසීය.
වෛද්‍ය මනිල් ප්‍රනාන්දු මහතා මෙසේ ද පැවැසීය.
“අපි මේ අවුරුද්ද ජස්වර් මහතාට වැඩ කරන්න ඉඩ දිය යුතුයි. ඔහු නිලවරණයට ඉදිරිපත් කළ ප්‍රතිපත්ති මාලාව ක්‍රියාත්මක කරන්න ඔහුට මේ ලැබුණේ හොඳම අවස්ථාවක්. ඒකට අකුල් හෙළන්න හොඳ නෑ.
ඒ නිසාම තමයි මගේ පරාජයෙන් පස්සේ නිලවරණයට නාමයෝජනා ඉදිරිපත් කරපු අපේ සෙසු කණ්ඩායම තරග වැදීමෙන් ඉවත් වුණේ. දැන් ඔහුට නිදහසට කරුණු කියන්න අවශ්‍ය නෑ. දැන් ඔහු නිලවරණයට ඉදිරිපත් කරපු ප්‍රතිපත්ති ප්‍රකාශය ක්‍රියාත්මක කළ යුතුයි.”
වෛද්‍ය මනිල් ප්‍රනාන්දු මහතා ඊයේ පැවැති පාපන්දු නිලවරණයට තරග වැදුණේ එහි වෛද්‍ය කමිටුවේ සභාපති ධුරය දරමින් සිටියදීය.
- 223
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
