(නාමල් පතිරගේ)
ශ්‍රී ලාංකික සම්භවයකින් යුත් මුසිතීර් මුහමද් රසීක් ක්‍රීඩකයා ශ්‍රී ලංකාවේ පුරවැසිභාවය අවසන් කර ඇති බවට නියෝජ්‍ය පාලක (පුරවැසි) තැන විසින් තහවුරු කර තිබෙන බැවින් වෙන්නප්පුව නිව් යංග්ස් ක්‍රීඩා සමාජයට එරෙහිව කොළඹ ක්‍රීඩා සමාජය ලැබූ සුපර් ලීග් තරගයේ ජය අවලංගු කර එහි ජයග්‍රහණය නිව් යංග්ස් කණ්ඩායමට ප්‍රදානය කළ යුතු බව වෙන්නප්පුව නිව්යංග්ස් පාපන්දු පෞද්ගලික සමාගමේ ලේකම් රෝහිත ප්‍රනාන්දු මහතා ශ්‍රී ලංකා පාපන්දු සම්මේලනයෙන් ඉල්ලා සිටී.
දෙපිල අතර පැවැති මෙම තරගයෙන් කොළඹ ක්‍රීඩා සමාජය ගෝල 4-0 ක ජයක් ලැබීය. එහිදී නිව්යංග්ස් ක්‍රීඩා සමාජය විරෝධතාවක් ගොනු කරමින් කියා සිටියේ, කොළඹ කණ්ඩායමට ක්‍රීඩා කළ මුසිතීර් මුහමද් රසීක් ක්‍රීඩකයා තරගාවලියේ නීති රීති උල්ලංඝණය කරමින් තරගයට සහභාගි වී ඇති බවයි.
ඔහු ශ්‍රී ලංකාවේ පුරවැසියකු නොවන බවට චෝදනා එල්ල වී තිබේ.
නිව්යංග්ස් ක්‍රීඩා සමාජය තොරතුරු දැන ගැනීමේ පනත යටතේ මෙම ක්‍රීඩකයාගේ ජාතිකත්වය පිළිබඳව තොරතුරු ආගමන හා විගමන දෙපාර්තමේන්තුවෙන් (පාලක ජනරාල්ගෙන්) විමසා තිබේ. එහිදී නියෝජ්‍ය පාලකවරයා (පුරවැසි) නිව්යංග්ස් පාපන්දු පෞද්ගලික සමාගමේ ලේකම්වරයාට යොමු කළ දැනුවත් කිරීමේ ලිපියකින් අවධාරණය කර ඇත්තේ, ජර්මනියේ පුරවැසිභාවය හිමි ඉහත ක්‍රීඩකයා පුරවැසි පනතේ 20 (2) (ඇ) වගන්තියට අනුව සිදු කළ පරීක්ෂාවේදී ඔහුගේ වයස 22 සම්පූර්ණ වන 2021 පෙබරවාරි 19 වැනිදා වන විට ඔහු ශ්‍රී ලංකාවේ පුරවැසියකු වීම අවසන් වන බව නිරීක්ෂණය වූ බවයි.
මේ සම්බන්ධයෙන් තමන් පාපන්දු සම්මේලනයේ ප්‍රතිචාරය අපේක්ෂාවෙන් පසුවන බවත් රෝහිත ප්‍රනාන්දු මහතා පවසයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
