(නාමල් පතිරගේ)
බාහිර පාර්ශ්වයන් විසින් බලහත්කාරයෙන් පාපන්දු නිලවරණය පැවැත්වීමට උත්සාහ කළහොත් එය ශ්‍රී ලංකාව අන්තර්ජාතික පාපන්දු සම්මේලනයේ උදහසට ලක්විය හැකි කරුණක් විය හැකි බව ශ්‍රී ලංකා පාපන්දු සම්මේලනයේ සභාපති අනුර ද සිල්වා මහතා පවසයි.
ගවුම්, චීත්ත හා වේට්ටි ඇඳගත් පාර්ශ්වයන් විසින් පාපන්දු සම්මේලනයේ නිලවරණය උවමනාවෙන් කල්දැමීමට උත්සාහ ගන්නා බවට මේ දිනවල චෝදනා නගමින් සිටින බවත්, එහෙත් සිය පාර්ශ්වයේ උත්සාහයද නිලවරණය හැකි ඉක්මණින් පවත්වා අවසන් කිරීම බවත් එහිදී අනුර ද සිල්වා මහතා වැඩිදුරටත් පැවසීය.
පාපන්දු සම්මේලනයේ නිලවරණය ඊයේ (22) කැඳවීමට ගත් පස්වැනි උත්සාහයත් අසාර්ථක විය. ඒ අතර මෙම 30 වැනිදාට පෙර නිලවරණය පවත්වා අවසන් ක්‍රීඩා අධ්‍යක්‍ෂ ජනරාල්වරයා මේ වනවිට ප්‍රකාශ කර තිබේ.
මේ අතර පාපන්දු නිලවරණය මෙම 30 වැනිදාට පෙර පවත්වා අවසන් කිරීම සඳහා ගතයුතු ක්‍රියාමර්ග සම්බන්ධයෙන් ඊයේ ක්‍රීඩා අධ්‍යක්‍ෂ ජනරාල් අමල් එදිරිසූරිය මහතාගේ ප්‍රධානත්වයෙන් ක්‍රීඩා අමාත්‍යාංශයේදී සාකච්ඡාවක් පවත්වා තිබේ. කෙසේ වුවත් ඒ සඳහා නිලවරණ කමිටුවේ සභාපතිනී විශ්‍රාමික මහාධිකරණ විනිසුරුවරියක්වන රෝහිනී මාරසිංහ මහත්මියට ආරාධනා කළත් ඇය ඊට සහභාගීවී නැත.
පාපන්දු සම්මේලනයේ ලේකම් ජස්වර් උමාර් මහතා එම සාකච්ඡාවට පැමිණ තිබෙන අතර පාපන්දු සම්මේලනයේ සභාපති අනුර ද සිල්වා මහතා සාකච්ඡාවෙන් පසුව දුරකථනයෙන් ක්‍රීඩා අධ්‍යක්‍ෂ ජනරාල්වරයා හා සම්බන්ධ වූ බව වාර්තාවේ.
මෙම පැනයට විසඳුමක් ලෙස ක්‍රීඩා අධ්‍යක්‍ෂ ජනරාල්වරයා යෝජනා කර ඇත්තේ එත්තැනකට විශාල පිරිසක් ඒකරාශීවීම වළක්වා ගැනීම සඳහා පාපන්දු සම්මේලනයේ නිලවරණයේ ඡන්ද විමසුම දිවයිනේ මධ්‍යස්ථාන තුනකදී එකවර සිදුකළ යුතු බවයි.
එහිදී කොවිඩ් මාර්ගෝපදේශයන්ට අනුගත වෙමින් නම් කෙරෙන මධ්‍යස්ථානවලදී ඡන්ද විමසුම සඳහා නියෝජිතයන් කාණ්ඩවලට බෙදා සහභාගීකර ගැනේ. ඒ වරකට රැස්වන පිරිස අවම කර ගැනීම සඳහාය.
දැනට යෝජනා වී ඇති පරිදි පොළොන්නරුව, ගාල්ල හා නාවලපිටියේදී පාපන්දු නිලවරණ සඳහා ඡන්ද මධ්‍යස්ථාන පිහිටුවේ. ඊට සහභාගීවන ලීග 62 ක නියෝජිතයන් ආසන්නතම ඡන්ද මධ්‍යස්ථානයට යොමු කෙරේ. එහිදී නිලවරණ කමිටුවේ සාමාජිකයන් තිදෙනා නිලවරණය මෙහෙයවමින් එකී ඡන්ද මධ්‍යස්ථාන තුනේ එක් අයෙකු බැගින් රැඳී සිටින අතර සූම් තාක්ෂණය ඔස්සේ එම ඡන්ද මධ්‍යස්ථාන කටයුතු නිරීක්ෂණය කිරීමද ඔවුන් විසින් සිදු කෙරේ. අනතුරුව මුද්‍රා තැබූ ඡන්ද පෙට්ටි කොළඹට රැගෙනවිත් නිලවරණ කමිටුව ඉදිරියේ ගණන්කර ප්‍රකාශයට පත් කෙරේ.
මෙම යෝජනාවලියට තම පාර්ශ්වය එකඟ බව සභාපති අපේක්‍ෂක ජස්වර් උමාර් මහතා පැවසීය.
කෙසේ වුවත් ඒ පිළිබඳව කරුණු අධ්‍යයනයකින් තොරව සිය පාර්ශ්වයට ප්‍රකාශයක් කළ නොහැකි බව වත්මන් සභාපති හා ලේකම් අපේක්‍ෂක අනුර ද සිල්වා මහතා පැවසීය.
ක්‍රීඩා අධ්‍යක්‍ෂ ජනරාල් අමල් එදිරිසූරිය මහතා පැවසුවේ මෙම යෝජනාවලිය අනුමැතිය සඳහා නිලවරණ කමිටුවට යොමු කරන බවයි. කෙසේ වුවත් ක්‍රීඩා අමාත්‍යාංශ ආරංචිමාර්ග සඳහන් කරන අන්දමට ඊයේ ක්‍රීඩා අධ්‍යක්‍ෂ ජනරාල්වරයා හා දුරකථනයෙන් සම්බන්ධවී ඇති නිලවරණ කමිටුවේ සභාපතිනි රෝහිනී මාරසිංහ මහත්මිය මෙවැනි ඡන්ද ක්‍රමයක් මීට පෙර පාපන්දු නිලවරණයට යොදාගෙන නොමැති බැවින් ඊට අනුමැතිය දීම ගැන තමන්ට සළකා බැලීමට සිදුවන බවයි.
ක්‍රීඩා අධ්‍යක්‍ෂ ජනරාල්වරයා වැඩිදුරටත් පැවසුවේ සංචරණ සීමා ප්‍රශ්නය අද හෙට විසඳෙන ප්‍රශ්නයක් නොවන බැවින් නිලවරණ කමිටුව මෙම 30 වැනිදාට පෙර නිලවරණය පවත්වා අවසන් නොකරන්නේ නම් එයින් පසුව පාපන්දු සම්මේලනය සිය බාරයට ගෙන නිලවරණ පැවැත්වීමට ක්‍රීඩා අමාත්‍යාංශය කටයුතු කරන බවයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
