(නාමල් පතිරගේ)
ලෝක කුසලාන (2022 - කටාර්) සුදුසුකම් ලැබීමේ වටයේ ඉදිරි තරග දෙකේදී ශ්‍රී ලංකා ජාතික පාපන්දු කණ්ඩායම වෙතින් පැහැදිලි ප්‍රවර්ධනයක් පෙන්නුම් කළ යුතු බව ජාතික පාපන්දු පුහුණුකරු අමීර් ඇලජික් මහතාට ශ්‍රී ලංකා පාපන්දු සම්මේලනය අවධාරණය කර තිබේ.
විදේශීය පුහුණුකරුවකුගේ සේවය ලබාගැනීමෙන් ශ්‍රී ලංකාව අපේක්ෂා කළේ ජාතික කණ්ඩායමේ පැහැදිලි ප්‍රවර්ධනයක් දැකීමේ අරමුණින් බවත්, ලෝක කුසලාන සුදුසුකම් ලැබීමේ තරග දෙකේදී එය තහවුරු කිරීම බොස්නියානු පුහුණුකරු අමීර් ඇලජික් මහතාගේ වගකීමක් බවත් පාපන්දු සම්මේලනයේ ප්‍රධානීන් අවධාරණය කර ඇත්තේ ඔහු සමග නොබෝදා පැවැති විශේෂ සාකච්ඡාවකදීය.
ලෝක කුසලාන (2022) ආසියානු කලාප සුදුසුකම් ලැබීමේ දෙවැනි වටයේ ඉදිරි තරග දෙකකට සහභාගි වීම සඳහා ශ්‍රී ලංකා ජාතික පාපන්දු කණ්ඩායම මෙම 31 වැනිදා දකුණු කොරියාවේ ‘සෝල්’ නුවර බලා පිටත්ව යාමට නියමිතය. ඒ සඳහා සූදානමින් ජාතික පාපන්දු සංචිතය මේ දිනවල කෝට්ටේ බැද්දගාන ජාතික පාපන්දු සංවර්ධන මධ්‍යස්ථානයේදී ජෛව බුබුළක් ලෙස ක්‍රියා කරමින් නේවාසික පුහුණුවීම් පවත්වාගෙන යයි.
ශ්‍රී ලංකාව සහභාගි වන ඉදිරි ලෝක කුසලාන තරග දෙකට සත්කාරය දරන දකුණු කොරියාව එරටට ඇතුළු වන ශ්‍රී ලංකාවේ හා ලෙබනනයේ පාපන්දු කණ්ඩායම් වෙත නිරෝධායන කොන්දේසි මාලාවක් ලබා දී තිබේ. ඒ අනුව ශ්‍රී ලංකා ජාතික පාපන්දු සංචිතයේ ක්‍රීඩකයන් හා පරිවාර නිලධාරීන් ඇතුළු පුහුණුකරුවන් එරටට ඇතුළුවීමට පෙර අවම වශයෙන් දින 15ක නිරෝධායන කාලසීමාවක් ගෙවා අවසන් කරන ලෙස දැනුම් දී තිබේ.
ශ්‍රී ලංකාවෙන් පිටව යාමට පෙරත් දකුණු කොරියාවට ඇතුළු වූ විගසත් ශ්‍රී ලංකා පාපන්දු කණ්ඩායම හා එහි නිලධාරීන් පී.සී.ආර්. පරීක්ෂණයන්ට භාජනය විය යුතුය.
ලෙබනනයට එරෙහිව ජුනි 5 වැනිදාත්, සත්කාරක දකුණු කොරියාවට එරෙහිව ජුනි 9 වැනිදාත් ශ්‍රී ලංකාව තරග වදී.
එම තරග වටයේ උතුරු කොරියාව සමග ශ්‍රී ලංකාව සහභාගි වීමට නියමිතව තිබූ තරගය අහෝසි වූයේ ඔවුන් මෙම තරග වටයේ ඉතිරි තරගවලින් ඉවත් වන බවට නිවේදනය කළ බැවිනි.
මේ අතර ජාතික පාපන්දු කණ්ඩායමේ වත්මන් තත්ත්වය පිළිබඳව බොස්නියානු පුහුණුකරු ඇලජික් මහතා පාපන්දු ප්‍රධානීන්ගේ සාකච්ඡාවේදී පෙන්වා දී ඇත්තේ ඉතා ප්‍රබල ප්‍රතිවාදීන් දෙදෙනකු මුණගැසෙන බැවින් මෙම තරග දෙකේදී ශ්‍රී ලංකාව වඩාත් අවදානම් තත්ත්වයක පසුවන බවයි. පසුගිය කාලයේදී ශ්‍රී ලංකා කණ්ඩායම සැලකිය යුතු තරම් ප්‍රගතියකට පැමිණ ඇතැයි තමන්ට සහතික විය නොහැකි බවත් ජාතික පුහුණුකරුවා ශ්‍රී ලංකාවේ පාපන්දු ප්‍රධානීන්ට අවධාරණය කර ඇතැයි ද වාර්තා වේ.
ඒ පිළිබඳව ‘ලංකාදීප’ කළ විමසුමකදී ශ්‍රී ලංකා පාපන්දු සම්මේලනයේ සභාපති අනුර ද සිල්වා මහතා මෙසේ පැවැසීය.
“අපිට මේ තරග දෙකේදී ජයග්‍රහණය පිළිබඳව විශ්වාසය ඉතා අඩුයි. නමුත් විදේශීය පුහුණුකරුවකුගේ සේවය තුළින් අපි අපේක්ෂා කළේ ශ්‍රී ලංකා පාපන්දු කණ්ඩායමට තාක්ෂණික පැත්තෙන්වත් යම් දියුණුවක් අත්කර දීමයි.“
“ඒ තුළින් තමයි පාපන්දු කණ්ඩායමක් දස්කම් අතරට එන්නේ. කොවිඩ් ප්‍රශ්නය ශ්‍රී ලංකාවට විතරක් බලපාපු එකක් නොවෙයි. දකුණු කොරියාව පවා පසුගිය වසරක කාලයක් තුළදී සහභාගි වෙලා තියෙන්නේ එක සුහද ජාත්‍යන්තර තරගයකට විතරයි. අනෙක් රටවල් බහුතරයකුත් මේ ප්‍රශ්නයටම මුහුණ දුන්නා“
“ඒ නිසා අමීර් ඇලජික් මහතාගෙන් අපි මේ ලෝක කුසලාන තරග දෙකේදී පාහැදිලි වෙනසක් බලාපොරොත්තු වෙනවා“ යයිද අනුර ද සිල්වා මහතා පැවසීය.
පාපන්දු සම්මේලන ආරංචි මාර්ග සඳහන් කරන අන්දමට මෙම තරග දෙකේදී ශ්‍රී ලංකාව අත්කර ගන්නා ප්‍රතිඵලය ඇලජික් මහතාගේ සේවා දිගුවට දැඩි බලපෑමක් එල්ල කෙරෙනු ඇත.
වසර 2020 පෙබරවාරි මෙරට සේවය බාරගත් බොස්නියානු පුහුණුකරු අමීර් ඇලජික් මහතා මේ වනවිට ශ්‍රී ලංකා පාපන්දු සම්මේලනයේ තාක්ෂණික අධ්‍යක්ෂවරයා ලෙසත් කටයුතු කරයි. කෙසේ වුවත් ඔහු යටතේ ශ්‍රී ලංකාව මුහුණදෙන පළමු ජාත්‍යන්තර පාපන්දු තරගය බවට පත්ව ඇත්තේ ලබන ජුනි 5 වැනිදා ලෙබනනයට එරෙහිව පැවැත්වෙන ලෝක කුසලාන සුදුසුකම් තරගයයි.
ඇලජික් මහතා වැඩ බාර ගත්තේ වසර 2020 පෙබරවාරි මාසයේදී වන අතර එම වසරේ මාර්තු මාසයේ පටන් මේ දක්වාම මෙරටට කොවිඩ් වසංගතයෙන් එල්ලවූ බලපෑමෙන් මෙරට පාපන්දු ක්‍රීඩා කටයුතු ද ඇණහිටිනි. ඒ අතර ජාත්‍යන්තර පාපන්දු තරග මාලා සහභාගිත්වයද ශ්‍රී ලංකාවේ පමණක් නොව ලොව පුරාම ඇණහිටියේය.
මෙම තත්ත්වය තුළ බොස්නියානු ජාතික අමීර් ඇලජික් මහතාගේ සේවය ආරම්භයේ පටන් සීමාසහිත විය. ශ්‍රී ලංකා පාපන්දු සම්මේලනය හා ඔහු අතර ඇතිකරගෙන තිබෙන සේවා ගිවිසුම අනුව පූර්ව දැනුම්දීමකින් පසුව දෙපාර්ශවයෙන් ඕනෑම අයකුට ගිවිසුම අවසන් කළ හැකිය.
ශ්‍රී ලංකාව ලෝක කුසලාන (2022) ආසියානු කලාප දෙවැනි වටයේ මෙතෙක් සහභාගිවී තිබෙන තරග පහෙන්ම පරාජයට පත්ව තිබේ. මෙම වටයේදී ප්‍රතිවාදීන් එකිනෙකා දෙවතාවක් මුණගැසේ.
ඒ අනුව ශ්‍රී ලංකාව පළමු මුණගැසීමේදී දකුණු කොරියාව හමුවේ ගෝල 8-0කින්ද හා ලෙබනනය හමුවේ ගෝල 3-0 කින්ද පරාජය වී තිබේ.
ශ්‍රී ලංකාව ජාත්‍යන්තර පාපන්දු තරගයකදී ලබාගත් අවසන් ජයග්‍රහණය සත්කාරක බංගලාදේශයට එරෙහිව එරටදී ගෝල 1-0ක ජයකි. එය වාර්තා වූයේ වසර 2018 අගෝස්තු 29 වැනිදාය.
බැද්දගානේදී දැන් නේවාසික පුහුණුවීම් පවත්වාගෙන යන ජාතික පාපන්දු සංචිතයට ද්විත්ව පුරවැසිලාභී ශ්‍රී ලාංකික ක්‍රීඩකයෝ තිදෙනෙක්ද ඇතුළත් වෙති. රිෆ් සෙබස්තියන් පීරිස්, මර්වින් හැමිල්ටන් හා ඩිලෝන් ද සිල්වා ඔවුහු වෙති.
ලෝක කුසලාන සුදුසුකම් තරග වටයට පුහුණුවීම් ඇරඹූ ශ්‍රී ලංකා සංචිතය:
සුජාන් පෙරේරා (නායක - අප්කන්ට්‍රි ලයන්ස්), ප්‍රභාත් රුවන් අරුණසිරි (බ්ලූ ඊගල්ස්), ආර්.පී. ධනුජන (නිව් යංග්ස්), හර්ෂ ප්‍රනාන්දු (බ්ලූ ඊගල්ස්), ඒ.ඒ.එස්.ආර්. අප්පුහාමි (ඩිෆෙන්ඩර්ස්), සෙබස්තියන් පීරිස් (එංගලන්තය), චමෝද් ඩිල්ෂාන් (කොළඹ), චරිත රත්නායක (කොළඹ), ඩක්සන් ෆස්ලාස් (නිව් යංග්ස්), චතුරංග මධුෂාන් (අප්කන්ට්‍රි ලයන්ස්), මර්වින් හැමිල්ටන් (ද්විත්ව පුරවැසි), චලන චමීර (කොළඹ), ජූඩ් සුපුන් (රිනවුන්), මොහොමඩ් මුස්තාක් (අප්කන්ට්‍රි ලයන්ස්), මොහොමඩ් ෆසාල් (බ්ලු ස්ටාර්), සර්වාන් ජොහාර් (කොළඹ), කවිඳු ඉෂාන් (අප්කන්ට්‍රි ලයන්ස්), ඩිලෝන් ද සිල්වා (ද්විත්ව පුරවැසි), අහමඩ් වසිම් රසික් (අප්කන්ට්‍රි ලයන්ස්), එම්.එස්.එම්. අකීබ් (කොළඹ), අසීකුර් රහුමාන් (ඩිෆෙන්ඩර්ස්), එම්.ඒ.එම්. හස්මීර් (සී-හෝක්ස්), එස්.ඩී. විජේසිංහ (රෙඩ් ස්ටාර්)
● අතිරේක:- රිෆ්කාන් මොහොමඩ් (ඩිෆෙන්ඩර්ස්), රිෆ්කාන් ෆයිසාර් (ජාවාලේන්), මහේන්ද්‍රන් දිනේෂ් (පොලිස්), යූ.එස්.වී. ධනුෂ්ක (නිව් යංග්ස්), මොහොමඩ් සබීර් රහුනියා (කොළඹ), මධුෂාන් ප්‍රනාන්දු (බ්ලූ ඊගල්ස්).
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
