(නාමල් පතිරගේ)
ජුනි 30 වැනිදාට පෙර නිලවරණය පවත්වා අවසන් කිරීමට ශ්‍රී ලංකා පාපන්දු සම්මේලනය සමත් නොවන්නේ නම් එදින සිට පාපන්දු සම්මේලනය ක්‍රීඩා අධ්යක්ෂ ජනරාල්වරයා බාරයට පත්වනු ඇතැයි වාර්තා වේ. අද (22) පැවැත්වීමට සූදානම් කර තිබූ ශ්‍රී ලංකා පාපන්දු සම්මේලනයේ නිලවරණයට සෞඛ්‍ය බලධාරීන්ගේ අවසරය නොලැබීම නිසා එය පස්වැනි වතාවටත් කල් දැමීමට සිදුව තිබේ.
පාපන්දු සම්මේලනයේ නිලවරණය අද (22 වැනිදා) පැවැත්වීමට අනුමැතිය ඉල්ලා එහි සභාපති අනුර ද සිල්වා මහතා යොමු කළ ලිපියකට ප්රතිචාර දක්වා තිබෙන සෞඛ්‍ය සේවා අධ්යක්ෂ ජනරාල් වෛද්‍ය අසේල ගුණවර්ධන මහතා රට තුළ පවතින කොවිඩ් වසංගත තත්වය තුළ ඊට අවසර දිය නොහැකි බව දැනුම් දී තිබේ. ඒ පිළිබඳව අනුර ද සිල්වා මහතා ‘‘ලංකාදීප’’යට පැවසුවේ ජුනි 30 වැනිදාට පාපන්දු සම්මේලනයේ වත්මන් නිල කාලය අවසන් වන බැවින් ඊට පෙර නිලවරණය පවත්වා අවසන් නොවීමෙන් එහි පරිපාලන අර්බුදයක් පැන නැගිය හැකි බවයි.
කෙසේ වුවත් අන්තර් ජාතික පාපන්දු සම්මේලනය අතුරු කමිටු පිහිටුවීම අනුමත නොකරන බැවින් ජුනි 30 වැනිදාට පෙර නිලවරණය පවත්වා අවසන් කිරීමට ගත හැකි සෑම ක්‍රියා මාර්ගයක්ම ගන්නා බවත් ඔහු පැවසීය.
මේ සම්බන්ධයෙන් ක්‍රීඩා අධ්යක්ෂ ජනරාල් අමල් එදිරිසූරිය මහතා මෙසේ පැවසීය.
‘‘පාපන්දු නිලවරණය පැවැත්වීම සඳහා අනුමැතිය ඉල්ලලා මමත් ලිපියක් සෞඛ්‍ය බලධාරීන්ට යොමු කළා. නමුත් ඊට මට මේ මොහොත වන විටත් මට උත්තරයක් ඇවිත් තිබ්බෙ නෑ. නමුත් පාපන්දු සභාපතිවරයාට උත්තරයක් ලැබිලා තිබෙනවා.
ක්‍රීඩා ඇමැතිවරයා උපදෙස් දුන්නේ ජුනි 30 වැනිදාට පෙර කිසියම් හෝ තාක්‍ෂණික ක්‍රමවේදයක් යොදා ගනිමින් පාපන්දු නිලවරණය පවත්වා අවසන් කරන ලෙසයි. නමුත් ඒ සඳහා පාපන්දු සම්මේලනය කෙතරම් දුරට උනන්දු වුණා ද කියන්න මා දන්නෙ නෑ. ඔවුන් කළ යුත්තේ ඒකරාශීවීම හැකිතාක් අවම කර ගනිමින් හෝ නිලවරණය පවත්වා අවසන් කිරීමයි.
“එසේ නොවුණහොත් ජුනි 30 වැනිදායින් පසුව එය ක්‍රීඩා අධ්යක්ෂ ජනරාල්වරයාගේ බාරයට පත් වෙනවා. එතන දී නිලවරණය මගේ බාරයේ පවත්වන්න සිද්ධ වේවි. නමුත් තවදුරටත් එය වළක්වා ගන්න පාපන්දු සම්මේලනයට හැකියාව තිබෙනවා.’’
මැයි 30 වැනිදා සිට අවස්ථා හතරක දීම පාපන්දු නිලවරණය පැවැත්වීමට උත්සහ දරා තිබුණි. එය පැවැත්වීම සංකීර්ණ ගැටලුවක් බවට දැන් පත්ව ඇත්තේ එහි ඡන්ද විමසුම රහස් ඡන්දයක් ඔස්සේ සිදුවන බැවිනි.
පාපන්දු ලීග 62 ක නියෝජිතයෝ 186 ක් ඡන්ද විමසුම සඳහා කැඳවීම් ලබති. පාපන්දු සම්මේලනයේ වත්මන් ලේකම් ජස්වර් උමාර් හා එහි වෛද්‍ය කමිටුවේ සභාපති වෛද්‍ය මනිල් ප්‍රනාන්දු යන මහත්වරු ප්‍රතිවිරුද්ධ ප්‍රධාන පාර්ශව දෙකකින් මෙවර පාපන්දු සම්මේලනයේ නිලවරණයේ දී සභාපති ධුරයට නාම යෝජනා බාර දී තිබේ. හිටපු සභාපතිවරයා වන රංජිත් රුද්‍රිගු මහතා ජස්වර් උමාර් මහතාට සහයෝගය පළ කරමින් උප සභාපති ධුරයකට නාමයෝජනා බාර දී තිබෙන අතර ඡායා අපේක්‍ෂකයකු ලෙස සභාපති ධුරයට ද නාම යෝජනා බාර දී තිබේ.
වත්මන් සභාපති අනුර ද සිල්වා මහතා වෛද්‍ය මනිල් ප්‍රනාන්දු මහතාට සහයෝගය පළ කරමින් මෙවර ප්‍රධාන ලේකම් ධුරයට තරග වදියි. ජස්වර් මහතාගේ පාර්ශ්වයෙන් ප්‍රධාන ලේකම් ධුරයට නාම යෝජනා බාර දී ඇත්තේ පාපන්දු පරිපාලනයේ තනතුරු කීපයක්ම මීට පෙර දරා ඇති හිටපු නියෝජ්‍ය පොලිස්පති උපාලි හේවගේ මහතාය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
