ශ්‍රී ලංකා පාපන්දු සම්මේලනයේ පසුගිය 30 වැනිදා පැවැති නිලවරණය ඡන්ද 96-90ක් ලෙස ජස්වර් උමාර් මහතා ජයගත්තද, ලීග දෙකක මතය වෙනස් වූයේ නම් ඡන්ද ප්‍රතිඵලය වෙනස් මුහුණුවරක් ගැනීමටත් එක් ලීගයක මතය වෙනස් වූයේ නම් ඡන්දය සමවීමටත් ඉඩ තිබුණු බව පාපන්දු ප්‍රවීණයෝ කියති.
වාර්තා වන පරිදි මෙවර නිලවරණයේ දී ඇතැම් පාපන්දු ලීග දෙපාර්ශවයටම මනාපය ප්‍රකාශ කර තිබේ. පාපන්දු නිලවරණය පැවැත්වෙන්නේ රහස් ඡන්දයකින් වූවත් පාපන්දු ලීග 62 න් ලීග 15 ක් පමණ දෙපිල බෙදී ඇතැයි යන්න ප්‍රසිද්ධ කාරණාවකි. එක ලීගයකට ඡන්ද 3 ක් බැගින් පාපන්දු ලීග 62 න් ඡන්ද 186 ක් තිබේ.
ජාතික ක්‍රීඩා සංගම් නිලවරණයකදී ඡන්දය ප්‍රකාශ කිරීමේ සාමාන්‍ය සම්ප්‍රදාය වන්නේ ප්‍රාදේශීය ලීගයේ නැතහොත් සාමාජික ක්‍රීඩා සමාජයේ හෝ දිස්ත්‍රික් නැතහොත් අනුබද්ධ ක්‍රීඩා සංගමයේ බහුතර කැමැත්ත අනුව ජාතික ක්‍රීඩා සංගම් නිලවරණයේදී ඡන්දය ප්‍රකාශ කිරීමයි. එහෙත් දැන් සිදුවන්නේ එක් එක් නිලධාරීන් තම තමන්ගේ සිත් ගත් පාර්ශ්වයන් වෙත ඡන්දය ප්‍රකාශ කිරීමයි.
“මේවායින් ප්‍රාදේශීය සංගම් වල ඉන්න නිලධාරීන්ට වාසි ලැබෙනවා මිසක් ක්‍රීඩාවට වෙන සෙතක් නෑ. ඊයේ පෙරේදා ගම්පොළ පාපන්දු ලීගයේ නිලවරණය සම්බන්ධයෙන් ප්‍රශ්නයක් ඇති වුණේත් මේවා හින්දාම තමයි“ යයි ගම්පොල පාපන්දු ලීගයේ සාමාජිකයෙක් පැවසීය.
පාපන්දු සංගම් නිලවරණයේ දී එක් ලීගයකට ඡන්ද තුනක් හිමිවන අතර ඒ සඳහා පාපන්දු ලීගයකින් නියෝජිතයෝ තිදෙනෙක් සහභාගි වෙති. එහෙත් පාපන්දු ලීග 15 ක පමණ සභාපතිවරයාත්, ලේකම්වරයාත්, භාණ්ඩාගාරිකවරයාත් පිල් කිහිපයකට බෙදී සිටින්නේ ඒ ඒ පාර්ශ්වයන් කෙරේ හොඳහිත පවත්වා ගැනීමේ අරමුණ ඇතිවය.
මේ අතර මනිල් ප්‍රනාන්දු පාර්ශවයේ ආරංචි මාර්ග සඳහන් කරන්නේ බදාදා පැවැති නිලවරණයෙන් පත් වූ පාපන්දු විධායක සභාව වසරක නිල කාලයකට පමණක් සීමා වන බැවින් වඩාත් ශක්තිමත් ඡන්ද ව්‍යාපාරයක් අරඹමින් මීළඟ නිලවරණයටත් ඉදිරිපත් වීමට වෛද්‍ය මනිල් ප්‍රනාන්දු මහතා තීරණය කර ඇති බවයි.
- 223
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
