දකුණු ඇමරිකානු පාපන්දු තරගාවලියේ අද (25 වැනිදා) පැවැති 'ඒ' කාණ්ඩයේ තවත් මූලික වටයේ තරගයකදී ගෝල 2-0 ක් ලෙස චිලී රාජ්‍යය පරාජය කිරීමට පැරගුවේ සමත් විය. මෙවර තරගාවලියේදී මේ දක්වා තරග 3 කට සහභාගි වී ඇති පැරගුවේ කණ්ඩායම එහිදී ලැබූ දෙවැනි ජය මෙයයි.
තරගයේ 33 වැනි විනාඩියේදී පැරගුවේ කණ්ඩායම වෙනුවෙන් පළමු ගෝලය ලබාගැනීමට බී. සමුන්ඩියෝ සමත් වූ අතර එම ගෝලයත් සමග ගෝල 1-0 ක් ලෙස පැරගුවේ කණ්ඩායමට පෙරමුණ ගෙන දෙමින් පළමු අර්ධය නිමාවට පත්විය.
දෙවැනි අර්ධය ආරම්භ වී විනාඩි 13 ක් ගතවන විට (58 වැනි විනාඩියේදී) පැරගුවේ කණ්ඩායමට හිමිවූ දඬුවම් පහරක් සාර්ථක කරගැනීමට සමත් වූ එම්. ඇල්මිරොන්, සිය කණ්ඩායමට ගෝල 2-0 ක ජයක් අත්කර දුන්නේය. මෙම තරගයේදී විනය විරෝධී ක්‍රියාවන් හේතුවෙන් චිලී ක්‍රීඩකයන් තිදෙනෙක් සහ පැරගුවේ ක්‍රීඩකයකු කහ පැහැති කාඩ්පත් ලැබූහ.
මෙම තරගයට පෙර 'ඒ' කාණ්ඩයේ තෙවැනි ස්ථානයේ පසු වූ පැරගුවේ කණ්ඩායම, මෙම තරගයේදී ලැබු ජයත් සමග එම කාණ්ඩයේ දෙවැනි ස්ථානය දක්වා ඉහළට පැමිණියේය. මින් පෙර පැවැති තරගවලදී බොලීවියාවවට එරෙහිව ගෝල 3-1 ක ජයක් වාර්තා කළ පැරගුවේ කණ්ඩායම, ආර්ජන්ටිනාව හමුවේ ගෝල 1-0 ක් ලෙස පරාජයට පත්විය.
මෙම තරගයට පෙර 'ඒ' කාණ්ඩයේ දෙවැනි ස්ථානයේ රැදී සිටි චිලී රාජ්‍යය, මෙම තරගයේදී ලැබූ පරාජයත් සමග එම කාණ්ඩයේ තෙවැනි ස්ථානය දක්වා පහලට ඇද වැටිණ. මින් පෙර පැවැති තරගවලදී බොලීවියාවට එරෙහිව ගෝල 1-0 ක ජයක් වාර්තා කළ චිලී රාජ්‍යය, ආර්ජන්ටිනාව සමග ගෝල 1-1 ක් ලෙස සමවිය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
