දකුණු ඇමරිකානු පාපන්දු තරගාවලියේ දෙවැනි සතිය ආරම්භ කරමින් අද (21 වැනිදා) පැවැති ‘එ්’ කාණ්ඩයේ තරගයකදී ගෝල 2-1 ක් ලෙස කොලොම්බියාව පරාජය කිරීමට පේරු රාජ්‍යය සමත් විය. මෙම තරගයට පෙර ‘ඒ’ කාණ්ඩයේ පස්වැනි ස්ථානයේ පසුවූ පේරු රාජ්‍යය, මෙම තරගයේදී ලැබූ ජයත් සමග එම කාණ්ඩයේ තෙවැනි ස්ථානය දක්වා ඉහළට පැමිණියේය.
තරගයේ 17 වැනි විනාඩියේදී ගෝලයක් ලබාගත් සර්ගියෝ පේනා, පළමු අර්ධය නිමාවන විට ගෝල 1-0 ක් ලෙස පේරු රාජ්‍යය පෙරමුණට ගෙන ආවේය. එහෙත් දෙවැනි අර්ධය ආරම්භ වී විනාඩි 8 ක් ගතවන විට එනම් තරගයේ 53 වැනි විනාඩියේදී කොලොම්බියාවට හිමිවූ දඬුවම් පහරක් සාර්ථක කරගත් මිගෙල් බෝර්ජා ගෝල 1-1 ක් ලෙස තරගය සම තත්ත්වයට පත් කළේය.
කෙසේ වුවත් තරගයේ 64 වැනි විනාඩියේදී කොලොම්බියාවේ යෙරී මිනා තම කණ්ඩායමේ දැල තුළටම පන්දුව යොමුකිරීම නිසා පේරු රාජ්‍යයට තවත් ගෝලයක් හිමිවිය. එම ගෝලයත් සමග නියමිත කාලය අවසන් වන විට ගෝල 2-1 ක් ලෙස තරගය ජය ගැනීමට පේරු රාජ්‍යයට හැකි විය. මෙම තරගයේදී පේරු ක්‍රීඩකයන් දෙදෙනකුද, එක් කොලොම්බියා ක්‍රීඩකයකුද කහ පැහැති කාඩ්පත් ලැබූහ.
මේ අතර අද වෙනිසියුලාව සහ ඉක්වදෝරය අතර පැවැති ‘එ්’ කාණ්ඩයේ සෙසු තරගය ගෝල 2-2 ක් ලෙස ජය පැරදු‍මකින් තොරව නිමාවට පත් විය. 39 වැනි විනාඩියේදී ගෝලයක් ලබාගත් අයර්ටන් ප්‍රෙසියාඩෝ, පළමු අර්ධය නිමාවන විට ගෝල 1-0 ක් ලෙස තරගයේ පෙරමුණ ගැනීමට ඉක්වදෝරයට අවස්ථාව උදාකර දුන්නේය.
දෙවැනි අර්ධය ආරම්භ වී විනාඩි 6 ක් ගතවන විට (51 වැනි විනාඩියේදී) වෙනිසියුලාව වෙනුවෙන් ගෝලයක් ලබාගත් එඩ්සන් කැස්ටිලෝ ගෝල 1-1 ක් ලෙස තරගය සම තත්ත්වයට පත්කළේය. එහෙත් 71 වැනි විනාඩියේදී ඉක්වදෝරය වෙනුවෙන් දෙවැනි ගෝලය ලබාගත් ගොන්සාලෝ ප්ලාටා ගෝල 2-1 ක් ලෙස නැවතත් සිය කණ්ඩායම පෙරමුණට රැගෙන ආවේය.
කෙසේ වුවත් තරගයේ අතිරේක කාලයේදී වෙනිසියුලාව වෙනුවෙන් දෙවැනි ගෝලය ලබාගත් රොනල්ඩ් හර්නෑන්ඩස් ගෝල 2-2 ක් ලෙස යළිත් තරගය සම තත්ත්වයට පත් කළේය. ඉක්වදෝර කණ්ඩයාමේ ක්‍රීඩකයන් තිදෙනෙක් මෙම තරගයේදී කහ පැහැති කාඩ්පත් ලැබූහ. මෙම තරගය සම වීම හේතුවෙන් වෙනිසියුලාව ‘ඒ’ කාණ්ඩයේ සිවුවැනි ස්ථානයටත්, ඉක්වදෝරය එහි පස්වැනි ස්ථානයටත් ඇද වැටිණ.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
