දකුණු ඇමරිකානු පාපන්දු තරගාවලියේ ‘බී’ කාණ්ඩ‍ය ය‍ටතේ බදාදා (23 වැනිදා) මූලික වටයේ තරගයකදී කොලොම්බියාවට එරෙහිව ගෝල 2-1 ක ජයක් වාර්තා කිරීමට බ්‍රසීලය සමත් විය. මේ දක්වා තරග 3 කට සහභාගි වී ඇති බ්‍රසීලය එම තරග 3 න්ම ජය ලබා ලකුණු 9 ක් හිමිකර ගනිමින් අපරාජිතව ‘බී’ කාණ්ඩයේ පෙරමුණේ රැදී සිටියි.
තරගයේ 10 වැනි විනාඩියේදී ගෝලයක් ලබාගත් ලුවිස් ඩයස් කොලොම්බියාවට සාර්ථක ආරම්භයක් ලබාදුන් අතර එම ගෝලයත් සමග ගෝල 1-0 ක් ලෙස කොලොම්බියාවට පෙරමුණ ගෙන දෙමින් පළමු අර්ධය නිමාවට පත් විය.
පළමු ගෝලය ලබා ගැනීමෙන් අනතුරුව පැයක පමණ කාලයක් පුරා දෙපිලම ගෝල ලබාගැනීමට අසමත් වූ නමුත් 78 වැනි විනාඩියේදී බ්‍රසීලය වෙනුවෙන් පළමු ගෝලය ලබාගත් රොබර්ටෝ ෆර්මිනෝ තරගය ගෝල 1-1 ක් ලෙස සම තත්ත්වයට පත්කළේය.
තරගය අවසන් වීමට ඔන්න මෙන්න කියා තිබියදී, එනම් අතිරේක කාලයේදී, බ්‍රසීලය වෙනුවෙන් ජයග්‍රාහී ගෝලය වාර්තා කිරීමට කා‍ර්ලෝස් කැසිමිරෝ සමත් විය. එම ගෝලයත් සමග බ්‍රසීලයට ගෝල 2-1 ක ජයක් හිමිවූ අතර අපරාජිත බව රැකගැනීමටද හැකි විය.
මෙම තරගයේදී බ්‍රසීල ක්‍රීඩකයෝ තිදෙනෙක්ද, කොලොම්බියා ක්‍රීඩකයෝ සිවුදෙනෙක්ද කහ පැහැති කාඩ්පත් ලැබූහ. මෙම තරගයේදී පරාජයට පත් වුවද තවදුරටත් ‘බී’ කාණ්ඩයේ දෙවැනි ස්ථානයේ රැදී සිටීමට කොලොම්බියාවට අවස්ථාව හිමිවිය.
- 036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
