යූරෝ 2020 පාපන්දු තරගාවලියේ ‘බී’ කාණ්ඩ යටතේ සහභාගි වූ මූලික වටයේ තරග 3 ම ජයගත් බෙල්ජියම, සිය අපරාජිත බව රැකගනිමින් අවසන් 16 දෙනාගේ වටයට පිවිසිමේ අවස්ථාව උදා කරගත්තේය. ඒ ඊ‍යේ (21 වැනිදා) පැවැති මූලික වටයේ අවසන් තරගයේදී ෆින්ලන්තයට එරෙහිව ගෝල 2-0 ක ජයක් වාර්තා කරමිනි.
තරගයේ පළමු අර්ධය නිමාවන විට දෙපිලම ගෝල ලබා නොසිටි අතර ෆින්ලන්ත කණ්ඩයමේ දැල රකින්නා ලෙස කටයුතු කළ ලූකස් හරාඩෙකි 74 වැනි විනාඩියේදී අත්වැරදීමකින් තම දැල තුළටම පන්දුව යොමු කිරීම නිසා බෙල්ජියම ගෝල 1-0 ක් ලෙස තරගයේ පෙරමුණට පැමිණියේය.
තරගය නිමාවීමට විනාඩි 9 ක් ඉතිරිව තිබියදී (81 වැනි විනාඩියේදී) කෙවින් ‘ඩි’ බ්‍රයන්ගේ සහයෝගයෙන් ගෝලයක් ලබාගත් රොමේලු ලුකාකු, බෙල්ජියමට ගෝල 2-0 ක ජයක් අත්කර දුන්නේය. එම ගෝලය මෙවර යූරෝ පාපන්දු තරගාවලියේදී ලුකාකු ලබාගත් තෙවැනි ගෝලය වූ අතර මින් පෙර රුසියාවට එරෙහිව පැවැති තරගයේදී ඔහු ගෝල 2 ක් ලබාගත්තේය.
ඒ අනුව මූලික වටයේදී ගෝල 3-0 කින් රුසියාවද, ගෝල 2-1 කින් ඩෙන්මාකයද, ගෝල 2-0 කින් ෆින්ලන්තයද පරාජය කළ ලෝක පාපන්දු ශ්‍රේණිගත කිරීම්හි පෙරමුණේ පසුවන බෙල්ජියම, අවසන් 16 දෙනාගේ වටයේදී ‘ඒ’, ‘ඩී’, ‘ඊ’ හෝ ‘එෆ්’ යන කණ්ඩවල තෙවැනි ස්ථාන හිමිකරගන්නා කණ්ඩායමකට එරෙහිව මේ මස 27 වැනිදා තරග වැදීමට නියමිතය.
මෙම තරගයට පෙර ‘බී’ කාණ්ඩයේ දෙවැනි ස්ථානයේ පසු වූ ෆින්ලන්තය, මෙම තරගයේදී ලැබූ පරාජයත් සමග එම කාණ්ඩයේ තෙවැනි ස්ථානය දක්වා ඇද වැටිණ. කෙසේ වුවත් ෆින්ලන්තයට තවමත් අවසන් 16 දෙනාගේ වටයට සුදුසුකම් ලබාගැනීමේ අවස්ථාව පවතින අතර ඒ සඳහා ඔවුන්ට මූලික වටයේ සෙසු තරග අවසන් වන තෙක් බලා සිටීමට සිදුව ඇත.
මූලික වටයේ තරග අවසානයේ කාණ්ඩ හයේ පළමු සහ දෙවැනි ස්ථාන හිමිකරගන්නා කණ්ඩායම් නිසැකවම අවසන් 16 දෙනාගේ වටයට සුදුසුකම් ලබාගන්නා අතර එම කාණ්ඩවල තෙවැනි ස්ථානවලට පත්වන කණ්ඩායම් 6 න් ඉහළම දස්කම් දක්වන කණ්ඩායම් 4 ටද අවසන් 16 දෙනාගේ වටයට පිවිසීමේ අවස්ථාව උදාවනු ඇත.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
