පැරීසියේ ශාන්ත ජර්මේන් ක්‍රීඩා සමාජයට එක්වූ ආර්ජන්ටිනාවේ පාපන්දු තරුව වන ලයනල් මෙසී පිළිගැනීමට පැරිස් පාපන්දු ලෝලීහු සිය ගණනක් ශාන්ත ජර්මේන් ක්‍රීඩා සමාජයට රැස්ව සිටියහ. ඔවුන්ගේ බලාපොරොත්තුව වූයේ ශාන්ත ජර්මේන් බැනියමෙන් සැරසුන මෙසී දැකගැනීමයි.
මෙසීගේ නව ක්‍රීඩා සමාජයේ සභාපතිවරයා වන කටාර් ජාතික නසාර් අල් කලයිෆි මහතා සමගින් මාධ්‍ය සාකච්ඡාවක් සඳහාත් එක්වූ මෙසී වසර දෙකක ගිවිසුමකට අත්සන් කළේ තුන්වැනි වසර සඳහාත් ඉඩ ප්‍රස්ථාව ඉතිරි කරගනිමිනි. නව ක්‍රීඩා සමාජය සමග ගිවිසුම්ගත වීමෙන් පසු මෙසී පැවසූයේ පස්වැනි වරටත් ශූරයන්ගේ කුසලානය ජයගැනීම තමන්ගේ අපේක්‍ෂාව බවයි.
බාර්සිලෝනා කණ්ඩායම සමගින්, මේ දක්වා ශූරයන්ගේ කුසලාන 4 ක් ජයගෙන සිටින මෙසී අවසන් වරට ශූරයන්ගේ කුසලානයක ජයපැන් බීවේ 2015 දීය.
“මගේ සිහිනය තවත් ශූරයන්ගේ කුසලානයක් දිනාගැනීම කියලා මා බොහෝ අවස්ථාවල දී කියා තියෙනවා. මා හිතනවා මම ඒ ඉලක්කය ජයගැනීමට සඳහා නිවැරදි තැන දැන් ඉන්නවා කියලා” යයි මෙසී පැවසීය.
අවසන් වරට පැවැති ශූරයන්ගේ කුසලාන පාපන්දු තරගාවලියේදී පැරිසියේ ශාන්ත ජර්මේන් (පී.එස්.ජී.) ක්‍රීඩා සමාජය විසන් මෙසී එවකට ක්‍රීඩා කළ බාර්සිලෝනා පිල පරාජය කරන ලදි. පසුව පී.එස්.ජී. පිල තරගාවලියේ අවසන් පූර්ව වටය දක්වාම ඉදිරියට ගියයේය.
වසර 2020 ශූරයන්ගේ කුසලාන තරගාවලියේදී පී.එස්.ජී. පිල අවසන් මහ තරගයේදී පරාජය වූයේය.
මෙම මාධ්‍ය සාකච්ඡාව පැවැති අවස්ථාවට මෙසීගේ බිරිඳ ඇන්ටොනල්ලා, දරුවන් සහ ඔහුගේ පියා වන ජෝර්ජ් මෙසී මහතාද පැමිණ සිටියහ. ජෝර්ජ් මෙසී මහතා ලයනල් මෙසීගේ නියෝජිතයා මෙන්ම කළමණාකරුවාද වෙයි.
බාර්සිලෝනා පිලට කුසලාන 35 ක් දිනා දුන් මෙසී පවසන්නේ පාපන්දු ක්‍රීඩාවත් අවිනිශ්චිත බවයි.
“ඔබට ලෝකයේ හොඳම කණ්ඩායම ඉන්න පුළුවන්. එත් ජයගහණය නැති වෙන්න පුළුවන්. පාපන්දු කියන්නේ ඒක තමයි” යයි මෙසී කීවේය.
පී.එස්.ජී. කණ්ඩායමේ මෙසීගේ අනෙක් සගයන් වන්නේ බ්‍රසීලයේ නේමාර් සහ ප්‍රංශයේ කයිලියන් බාපේය. මේ දෙදෙනා ලෝකයේ විශිෂ්ටතම පාපන්දු ක්‍රීඩකයන් දෙදෙනෙකි. තිදෙනාම එක්වූ කල්හි අතිශය ප්‍රබල ප්‍රහාරක කණ්ඩායමක් පී.එස්.ජී. පිල සතුවෙයි.
පැරීසියේ පාපන්දු සමාජය ලයනල් මෙසීට වසරක් සඳහා ගෙවනු ලබන මුදල යුරෝ මිලියන 35 ක් හෙවත් ඩොලර් මිලියන 41 කි. එය ශ්‍රී ලංකාවේ මුදලින් රුපියල් කෝටි 820 කි. ඒ වෙනුවෙන් පැරිසියේ ශාන්ත ජර්මේන් පිලේ අංක 30 බැනියම ඇඳ ක්‍රීඩා කිරීමට මෙසීට සිදුවනු ඇත. එහෙත් පාපන්දු විචාරකයන් කියන්නේ අංක 30 දරන මෙසීගේ බැනියම විකිණීමෙන් පමණක් පී.එස්.ජී. පිලට මාස 6 කදී එම මුදල උපයාගත හැකි බවයි.
මෙසීට ඇත්තේ එතරම් විශාල පාපන්දු ලෝලීන් පිරිසකි.
- 213
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
