යුරෝපීය පාපන්දු සම්මේලනය සංවිධානය කරන යූරෝ 2020 පාපන්දු ශූරතාවලිය මේ මස 11 වැනිදා සිට ජූලි මස 11 වැනිදා දක්වා රටවල් 24 ක සහභාගීත්වයෙන් ක්‍රීඩාංගණ 11 කදී පැවැත්වේ. ඉකුත් වසරේදී (2020) පැවැත්වීමට නියමිතව තිබූ මෙම තරගාවලිය කොරෝනා වසංගතය හේතුවෙන් මෙම වසර දක්වා කල් දැමීමට සංවිධායකයන්ට සිදුවිය.
16 වැනි වරට පැවැත්වෙන මෙවර තරගාවලියේ පළමු තරගය රෝමයේ ඔලිම්පික් ක්‍රීඩාංගණයේදී පැවැත්වීමට නියමිත අතර එහිදී තුර්කියට එරෙහිව ඉතාලිය තරග බිවට පිවිසෙනු ඇත. තරගාවලියේ අවසන් පූර්ව තරග සහ අවසන් මහ තරගය පැවැත්වීම සඳහා ලන්ඩන්හි වෙම්බිලි ක්‍රීඩාංගණය තෝරාගෙන තිබේ.
පාපන්දු ලෝක කුසලාන තරගාවලිය මෙන්ම වසර 4 කට වරක් පැවැත්වෙන මෙම තරගාවලිය අවසන් වරට පැවැතියේ 2016 වසරේදීය. අතිරේක කාලයේදී ගෝල 1-0 ක් ලෙස ප්‍රංශය පරාජයට පත් කළ පෘතුගාලය එම තරගාවලියේ ශූරයන් බවට පත් විය. පෘතුගාලය එදා මෙදා තුර යුරෝ පාපන්දු ශූරතාවලියක් ජයගත් පළමු අවස්ථාව ලෙසද එය සටහන් විය.
මේ දක්වා පැවැති යූරෝ පාපන්දු කුසලාන තරගාවලි 15 දී ශූරතා 3 බැගින් දිනාගැනීමට ජර්මනිය (1972, 1980, 1996) සහ ස්පාඤ්ඤය (1964, 2008, 2012) සමත්ව ඇති අතර ප්‍රංශය (1984, 2000) ශූරතා 2 ක් දිනාගෙන තිබේ. සෝවියට් රුසියාව (1960), ඉතාලිය (1968), චෙක් ජනරජය (1976), පෘතුගාලය (2016), නෙදර්ලන්තය (1988), ඩෙන්මාර්කය (1992) සහ ග්‍රීසිය (2004) එක් ශූරතාවකට බැගින් හිමිකම් කියයි.
මෙවර තරගාවලියේ මූලික වටයේ තරග කණ්ඩායම් 4 බැගින් වූ කාණ්ඩ 6 ක් යටතේ ලීග් ක්‍රමයට අනුව පැවැත්වෙන අතර එක් එක් කාණ්ඩවල ශූරයන් සහ අනු ශූරයන් ඍජුවම පෙර අර්ධ අවසන් පූරව වටයට සුදුසුකම් ලබනු ඇත. එම කාණ්ඩවල තෙවැනි ස්ථානවලට පත්වන කණ්ඩායම් 6 අතරින් ඉහළම ලකුණු ලබාගන්නා කණ්ඩායම් 4 ටද පෙර අර්ධ අවසන් පූර්ව වටයට පිවිසීමේ අවස්ථාව උදා වනු ඇත. එතැන් පටන් තරගාවලිය පිළිමළුන් පිටුදැකීමේ ක්‍රමයට අනුව පැවැත්වේ.
‘ඒ’ කාණ්ඩය
ඉතාලිය, ස්විට්සර්ලන්තය, තුර්කිය සහ වේල්සය
‘බී’ කාණ්ඩය
බෙල්ජියම, ඩෙන්මාර්කය, ෆින්ලන්තය සහ රුසියාව
‘සී’ කාණ්ඩය
ඔස්ට්‍රියාව, නෙදර්ලන්තය, දකුණු මැසිඩෝනියාව සහ යුක්රේනය
‘ඩී’ කාණ්ඩය
ක්‍රොයේෂියාව, චෙක් ජනරජය, එංගලන්තය සහ ස්කොට්ලන්තය
‘ඊ’ කාණ්ඩය
පෝලන්තය, ස්ලෝවැකියාව, ස්පාඤ්ඤය සහ ස්වීඩනය
‘එෆ්’ කාණ්ඩය
ප්‍රංශය, ජර්මනිය, හංගේරියාව සහ පෘතුගාලය
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
